In-nhui el 31 d'janvier , eune éclipse leunaire totale a s'produiro au momint d'eune pleine leune " bleuse " . Chés astronon.mes is appel't-é cho super leune bleuse ed sang .
Os pourrez l'erbeyer ! M'afin , si cho'm météo al est d'la partie ! Sin cha os srez d'l arvue !
Bonjour tertous , j'a crée ch'blog pour tous ceux qu'is ont quére cho'l langue Picarde . Ej veux moutrer ichi qu'in Picard oz peut bérdler ed toute sans t'éte malhonnéte , ni foaire dél réclame pi in esséyant dé n'poin nommer chés gins . Mais os n'oublirons poin d'rigoler . Alors' , OZ-Y-VO !!
mercredi 31 janvier 2018
mardi 30 janvier 2018
Niffler n'est poin jué
Eune chance a ch'gratache , eune chance a ch'nifflache !
Ej connaichoais déjo ech "patch" pour arter d'funquer* ; vlo qu'asteure mon chés Finlandais is vont téster sur pu d'eine chintaine ed gins un spray nasal conte chés jux d'lurlure* !
I falloait démucher un produit qu'i l'agit rapidemint .
O sait tartous éq l'invie d'gratter chés tickets , cha vous prins conme inne invie d'picher !
Ej vous dirai quoi dins un an édmi , quante chés Finlandais is bailleront chés résultats ! ch'est d'lo qu'os sairons si ch'truc foait " éspray" i l'o té éfficace !!
*Arter d'funquer = Arrêter de fumer
*Lurlure = Hasard
Ej connaichoais déjo ech "patch" pour arter d'funquer* ; vlo qu'asteure mon chés Finlandais is vont téster sur pu d'eine chintaine ed gins un spray nasal conte chés jux d'lurlure* !
I falloait démucher un produit qu'i l'agit rapidemint .
O sait tartous éq l'invie d'gratter chés tickets , cha vous prins conme inne invie d'picher !
Ej vous dirai quoi dins un an édmi , quante chés Finlandais is bailleront chés résultats ! ch'est d'lo qu'os sairons si ch'truc foait " éspray" i l'o té éfficace !!
*Arter d'funquer = Arrêter de fumer
*Lurlure = Hasard
lundi 29 janvier 2018
GPS in raque
Un GPS ch'est fin bien , os rintrez cho'v ville d'où qu'os vous rindez , pi d'où qu'os partez ! Après os roulez pi y-o eune tchote voéx d'bonne fénme qu'a vous dit , tornez a main gueuche , a droéte ; soin* a vous dvant ch'est un séns interdit !
Dusqu'a* lo tout i est parfait , ch'est seurmint cho qu'is ont foait troés pérsonnes din l'Vermont in Amérique . Chés troés gazires lo is ont foait inne confianche avule* a leu GPS ! Hormis qu'la euss is s'sont r'treuvés in plein mitan dé ch'lac Champlain !!
Portant is n'avoait't-é poin lapé inne goutte d'alcool ! a intinde dire chés gindarmes cha sroait ch'témps pourri qu'i fsoait ch'jour la !!
A noter qu'leu application d'portabe al s'délonme WASE , édon cha n'est mie 'tonant qu'is finich't-é din la wase *!!!!!!
*Soin = Attention
*Dusqu'a = Jusqu'à
*Avule = Aveugle
*Wase = Vase
Dusqu'a* lo tout i est parfait , ch'est seurmint cho qu'is ont foait troés pérsonnes din l'Vermont in Amérique . Chés troés gazires lo is ont foait inne confianche avule* a leu GPS ! Hormis qu'la euss is s'sont r'treuvés in plein mitan dé ch'lac Champlain !!
Portant is n'avoait't-é poin lapé inne goutte d'alcool ! a intinde dire chés gindarmes cha sroait ch'témps pourri qu'i fsoait ch'jour la !!
A noter qu'leu application d'portabe al s'délonme WASE , édon cha n'est mie 'tonant qu'is finich't-é din la wase *!!!!!!
*Soin = Attention
*Dusqu'a = Jusqu'à
*Avule = Aveugle
*Wase = Vase
dimanche 28 janvier 2018
Intermarché-moi d'sus
Intermarché -moi d'sus et j'vous direz rin !
Mais qué brén , qué brén din tout chés grands magasins d'France pour déteuper sin (sés) pot d'Nutella .
A Calais coér bien qu'i y-avoait ch'vigile qu'i ziutoait bien chés gins ,pisqu'i l'o vu eune tchote fille qu'a s'faisoait écatir* pér inne palette a coeuse eq chés gins is s'poussoait't-é l'un l'eute pour savoèr echtilo qu'i ravinro* el pluss ed pots d'Nutella ; quitte à écrabouiller inne tchote guérnoule . Dins qué monne o vit non dés z'os !!
In-nhui ch'est fini tout ch'carpin lo chés étagéres is sont vuides* . Eune fénme un molé pardu a dminde a chu chéf ed rayon .
- Mais d'habitude le nute est la !?
- Sié qu'i rinfique ech't honme , mais pou l'momint i l'est pus la ; os ons été dévaliséye ; arvénez dmain !!!!!
*Ecatir = Ecraser
*Ravinro = Vienr de ravinde = Amener vers soi
*Vuide = Vide
Mais qué brén , qué brén din tout chés grands magasins d'France pour déteuper sin (sés) pot d'Nutella .
A Calais coér bien qu'i y-avoait ch'vigile qu'i ziutoait bien chés gins ,pisqu'i l'o vu eune tchote fille qu'a s'faisoait écatir* pér inne palette a coeuse eq chés gins is s'poussoait't-é l'un l'eute pour savoèr echtilo qu'i ravinro* el pluss ed pots d'Nutella ; quitte à écrabouiller inne tchote guérnoule . Dins qué monne o vit non dés z'os !!
In-nhui ch'est fini tout ch'carpin lo chés étagéres is sont vuides* . Eune fénme un molé pardu a dminde a chu chéf ed rayon .
- Mais d'habitude le nute est la !?
- Sié qu'i rinfique ech't honme , mais pou l'momint i l'est pus la ; os ons été dévaliséye ; arvénez dmain !!!!!
*Ecatir = Ecraser
*Ravinro = Vienr de ravinde = Amener vers soi
*Vuide = Vide
samedi 27 janvier 2018
Feut oser
El Tongien ( eq ch'est un habitant du Tonga) i s'a lanché* un rute défi Pér après avoér pérticipé a chés J-O d'Rio in 2016 Din l'épreufe du Taekwondo .
Achteure pour chés J-O in février a Pyeongchang i l'o décidé d'coeucher les skis pour inne épreufe dés ski d'fond . Pour un habitant dé ch'l archipel polynésien ; ch'est osé qua-minme .
I sanne a vir qu'i s'seuche* intrainé durant eune énnée d'sur dés rollers-skis din l'caleur dé s'n ile tropicale .
Boin courache à li a n'sro poin aisié !
*Lanché = Lancé
*S'seuche = Se soit
Achteure pour chés J-O in février a Pyeongchang i l'o décidé d'coeucher les skis pour inne épreufe dés ski d'fond . Pour un habitant dé ch'l archipel polynésien ; ch'est osé qua-minme .
I sanne a vir qu'i s'seuche* intrainé durant eune énnée d'sur dés rollers-skis din l'caleur dé s'n ile tropicale .
Boin courache à li a n'sro poin aisié !
*Lanché = Lancé
*S'seuche = Se soit
vendredi 26 janvier 2018
Jojo Todynho
Nan nan , ch'est poin du nouvieu Picard obien dés mots qu'j éroais invintion.né !
Jojo Todynho ch'est inne canteuse Brésiyénne qu'al foait gramint causer d'elle in ch'momint ! I sanne a vir qu'és canchon al éroait té vu pu d'20millions d'foés su ch'l arnitoéle * ... Manne un peu , a coeuse qu'eune canchon al peut ratiriner* dés gins conme cho ?
Au tout début cha pourroait r'sanner à eune "blague" el music a cminche pér eune phrase qu'a dit: C'est quoi se tir ? pi o z'intind eune déflagration , pi après cho'm music al continue ! Dusqu'a* lo tout i vo fin bien ! Mais n'y-o tchot malins qu'is tourne'té des tchotes vidéos d'où qu'o z'zés voét s'trondeler* a terre pér après qu'cho'c canteuse al euche dit " C 'est quoi se tir "
Os pouvez vir cho'v vidéo su YouTube . Mi j'ai coési d'én poin l'métte ! Os vivons eine drole d'époque !!!!!!!
*Arnitoéle = La toile (le net)
*Ratriner = Attirer
*Dusqu'a = Jusqu'à
*Trondeler = SE rouler
Jojo Todynho ch'est inne canteuse Brésiyénne qu'al foait gramint causer d'elle in ch'momint ! I sanne a vir qu'és canchon al éroait té vu pu d'20millions d'foés su ch'l arnitoéle * ... Manne un peu , a coeuse qu'eune canchon al peut ratiriner* dés gins conme cho ?
Au tout début cha pourroait r'sanner à eune "blague" el music a cminche pér eune phrase qu'a dit: C'est quoi se tir ? pi o z'intind eune déflagration , pi après cho'm music al continue ! Dusqu'a* lo tout i vo fin bien ! Mais n'y-o tchot malins qu'is tourne'té des tchotes vidéos d'où qu'o z'zés voét s'trondeler* a terre pér après qu'cho'c canteuse al euche dit " C 'est quoi se tir "
Os pouvez vir cho'v vidéo su YouTube . Mi j'ai coési d'én poin l'métte ! Os vivons eine drole d'époque !!!!!!!
*Arnitoéle = La toile (le net)
*Ratriner = Attirer
*Dusqu'a = Jusqu'à
*Trondeler = SE rouler
jeudi 25 janvier 2018
J'vous in " BRIE "
J'vous in "brie" sarvez vous ! Au momint d'chés fétes ed fin d'énées j'connaichoés chés déroufleux* d''z huites , ed Champagne , ed jaja ! Mais du fromache j'avoais coér janmoés intindu dire !
Din ch'Puy-d'dôme ; un producteur affineur i s'o foait déroufler inter six chint pi sept chint St -nectaires . A 16€ piéche , cha foait inne pérte ed pu d'dix mille euros pou ch't honme .
Sans compter qu'i feut coér rabistoquer* cho'p porte éd cave !
Ch't honme i l'étoait "bleu" d'Auvergne bié -seur !!!!!!
*Déroufler = Voler
*Rabistoquer = réparer
Din ch'Puy-d'dôme ; un producteur affineur i s'o foait déroufler inter six chint pi sept chint St -nectaires . A 16€ piéche , cha foait inne pérte ed pu d'dix mille euros pou ch't honme .
Sans compter qu'i feut coér rabistoquer* cho'p porte éd cave !
Ch't honme i l'étoait "bleu" d'Auvergne bié -seur !!!!!!
*Déroufler = Voler
*Rabistoquer = réparer
mercredi 24 janvier 2018
Cmint qu't es harnéqué
Ch'est nouzote su l'cote d'Opale os poroéme coér dire a mzure : Arguette écmint qu't es gréyeille* !
Pole emploé * din chés Heuts d'France is ont dmindé à tout chés agents d'raviser din leu z'améres* pi d'bailler a tout chés chomeux * leu z'habits qu'is n'métt'té pu !
Qu'a seuche dés keuchures , dés patalons , des kmiches , costumes croates* ; montes , o bien minme téléphon.ne portabe !
Mi j'dis qu'ch'est bien , est vrai qu'si té vux dégoter un molé d'ouvrage ; feut coér éte bien nipper ! Poin conme un AS ed pic ! Hormis qu'si tu caches inne plache ed croupier !!!
*Gréyeille = Mal habillé
*Chomeux = Chômeurs
*Croate = Cravate
Pole emploé * din chés Heuts d'France is ont dmindé à tout chés agents d'raviser din leu z'améres* pi d'bailler a tout chés chomeux * leu z'habits qu'is n'métt'té pu !
Qu'a seuche dés keuchures , dés patalons , des kmiches , costumes croates* ; montes , o bien minme téléphon.ne portabe !
Mi j'dis qu'ch'est bien , est vrai qu'si té vux dégoter un molé d'ouvrage ; feut coér éte bien nipper ! Poin conme un AS ed pic ! Hormis qu'si tu caches inne plache ed croupier !!!
*Gréyeille = Mal habillé
*Chomeux = Chômeurs
*Croate = Cravate
lundi 22 janvier 2018
Carte obien pécaille
El quéte ; os ons bieu y-éte prépéré , oz est toudis surprins quanqu'o voét chés éfants d'tchoeurs s'abouler avu cho'c corbeille pour foaire el quéte ! Tojours el minme quéstion , os ons ti prins un molé d'avinche* ?
Inne tchote révolution a s'prépére din chés églises . Edpis hier din eune église dé ch'seiziéme arrondichemint d'Péris os povez bailler* pour cho'c quéte in carté-bleuse sans contac ; os coésichez ch'montant in buquant d'sur , os passez vo carte su ch'tchot cassi* noèr , pi ch'coup i est foait .
Pou n'poin éffoayer* chés fidèles , chétlos* qu'is sont adités* d'donner dés pécaillons is trouvaront tojours din chés allées un éfant d'tchoeur avu leu corbeille in osier .
ALÉA JACTA EST
*Avinche = Monnaie
*Bailler = Donner
*Cassi = Petite fenêtre
*Effoayer = Effrayer
*Chétlos = Ceux la
*Adités = Habitués
Inne tchote révolution a s'prépére din chés églises . Edpis hier din eune église dé ch'seiziéme arrondichemint d'Péris os povez bailler* pour cho'c quéte in carté-bleuse sans contac ; os coésichez ch'montant in buquant d'sur , os passez vo carte su ch'tchot cassi* noèr , pi ch'coup i est foait .
Pou n'poin éffoayer* chés fidèles , chétlos* qu'is sont adités* d'donner dés pécaillons is trouvaront tojours din chés allées un éfant d'tchoeur avu leu corbeille in osier .
ALÉA JACTA EST
*Avinche = Monnaie
*Bailler = Donner
*Cassi = Petite fenêtre
*Effoayer = Effrayer
*Chétlos = Ceux la
*Adités = Habitués
samedi 20 janvier 2018
Chucolat rose
Chés Jape-au-nez * pi chés coréns dé ch'sud* is sont chés preumes à avoèr invintion.né ch'chucolat ROSE ! Pér après ch'blanc , ch'lait pi ch'noèr ; vlo ch'rose .
Pou l'momint tout l'monne i n'pouro poin l'avoér din s'n amére * , piqu'ch'est* un produit limité (5000) pi surtout d'luxe ( 3€ pour un tchot morcieu) .
I n'y o poin d'tricherie pour cho'c couleur tout est foait naturelmint qu'is dit't !
PS: Un tchot méssache a ch'poays d'où qué ch'solé i s'saque édvant z'z eutes . Si n'y o quiqu'un qui vut m'invoéyer un tchot morcieu , j 'y baillerai m'n adréche in privé ! Merci
*Jape au nez et coréns dé ch'sud = Japonais et coréens du sud
*Amére = Armoire
*Piqu'ch'est = Puisque c'est
Pou l'momint tout l'monne i n'pouro poin l'avoér din s'n amére * , piqu'ch'est* un produit limité (5000) pi surtout d'luxe ( 3€ pour un tchot morcieu) .
I n'y o poin d'tricherie pour cho'c couleur tout est foait naturelmint qu'is dit't !
PS: Un tchot méssache a ch'poays d'où qué ch'solé i s'saque édvant z'z eutes . Si n'y o quiqu'un qui vut m'invoéyer un tchot morcieu , j 'y baillerai m'n adréche in privé ! Merci
*Jape au nez et coréns dé ch'sud = Japonais et coréens du sud
*Amére = Armoire
*Piqu'ch'est = Puisque c'est
vendredi 19 janvier 2018
Eune prone , po d'drone
Si qu'os vous frez péquer , jé n'sais mie cobien d'points su vo pérmis d'droner* o va vous saquer !
Dins ch'l état New York mon chés Ricains is ont adopté eune loé qu'al interdit a tertous ed foaire voler un drone si qu'os éte brindzingue * .
Pi is n'rigol'té poin , os pourez avoér inne ameinde ed 1000€ o bien 6 moés d'cabéne* ! A mzure lés deux ...
Chés érignies volantes* is foait't el brén din tout chés coins ; is déturb'te* ech l attérissache ed chés aréoplanes . Is détub'te étou chés pompiers durant leu'z intervintions . Et is transpor't-é del drogue pour bailler a chés prison.niers in gayole* .
*Droner = Piloter un drone
*Brindzingue = Saoul
*Cabéne = Cabane (ici dans le sens de prison )
*Erignies volantes = Bin quoi ...un drone ça ressemble pas à ça ??)
*Déturber = Perturber
*Gayole = Cage (ici dans le sens de prison )
Dins ch'l état New York mon chés Ricains is ont adopté eune loé qu'al interdit a tertous ed foaire voler un drone si qu'os éte brindzingue * .
Pi is n'rigol'té poin , os pourez avoér inne ameinde ed 1000€ o bien 6 moés d'cabéne* ! A mzure lés deux ...
Chés érignies volantes* is foait't el brén din tout chés coins ; is déturb'te* ech l attérissache ed chés aréoplanes . Is détub'te étou chés pompiers durant leu'z intervintions . Et is transpor't-é del drogue pour bailler a chés prison.niers in gayole* .
*Droner = Piloter un drone
*Brindzingue = Saoul
*Cabéne = Cabane (ici dans le sens de prison )
*Erignies volantes = Bin quoi ...un drone ça ressemble pas à ça ??)
*Déturber = Perturber
*Gayole = Cage (ici dans le sens de prison )
jeudi 18 janvier 2018
Quiéche el chéf
Achteure sartains concerts classiques is sont connéctés ! Fini ch'témps adou qu'o vous dmindoais ed souffler* vo portabe edvant qu'chu concert i cminche pou n'poin berziller chés euréles ed chu chéf d'ortchéstre !!
Du contraire asteure ch'est li qu'i vous dminde dé l-laissier branché , pour qu'os puchéche* li bailler un molé d'ayude* El darin coup ch'étoait à Lille eune application su vou portabe al permet d'invoéyer durant ch'concert dés "tempos " , "des nuances" qu'is sront értransmis à chu chéf d'ortchéstre d'sur eine écrant géant !!
*Souffler = Ici dans le sens d'éteindre
*Puchéche = Puissiez
*Ayude = Aide
Du contraire asteure ch'est li qu'i vous dminde dé l-laissier branché , pour qu'os puchéche* li bailler un molé d'ayude* El darin coup ch'étoait à Lille eune application su vou portabe al permet d'invoéyer durant ch'concert dés "tempos " , "des nuances" qu'is sront értransmis à chu chéf d'ortchéstre d'sur eine écrant géant !!
*Souffler = Ici dans le sens d'éteindre
*Puchéche = Puissiez
*Ayude = Aide
mercredi 17 janvier 2018
Ch'dépleumé
Conme chaque énnée tous chés capitales du monne is dréch'te d'sur inne granne plache un sapin d'Noé ! Rome in Italie al déroge poin à la régue !
Hormis qu'la à peinne étampi* eq chu sapin i l'étoait djo guerzi* . Tertous chés Itaïens is rigoloait't conme des bochus ed vir ech dépleumé " Le spelacchio" conme is l'appel'te !
Ed tout sin chu sapin i l'éro inne deuxiéme vie pisqu'i vo servir à lés jones manmans pour qu'is s'occupt't-é d'allaiter leu papar *
*Etampi = Dressé
*Guérzi = Cramer
*Papar = Bébé
Hormis qu'la à peinne étampi* eq chu sapin i l'étoait djo guerzi* . Tertous chés Itaïens is rigoloait't conme des bochus ed vir ech dépleumé " Le spelacchio" conme is l'appel'te !
Ed tout sin chu sapin i l'éro inne deuxiéme vie pisqu'i vo servir à lés jones manmans pour qu'is s'occupt't-é d'allaiter leu papar *
*Etampi = Dressé
*Guérzi = Cramer
*Papar = Bébé
mardi 16 janvier 2018
Macron à m'moaison
M'einfin à coté dé m'baraque ! tartous is n'él sait't pététe poin mais j'réste à Calais , à la plage.
Pi si qu'os suivez un molé chés actualités os avez intindu qu'nou présideint , i vient nous vir !
Cha va putôt éte un rute brén din cho'v ville , aveuc tout chés rues bloquées ; aller d'un sin érpartir ed l'eute ! Qué ju !!
Oué a coté d'ém baraque pachqu'à none ech présidint pi s'clique i varront minger in face cazi d'ém moaison
Ej vous direz quoé qu'i l'o mié ! Pou ch'fromache ch'est sur i prindro du "PRÉSIDENT" !!
Pi si qu'os suivez un molé chés actualités os avez intindu qu'nou présideint , i vient nous vir !
Cha va putôt éte un rute brén din cho'v ville , aveuc tout chés rues bloquées ; aller d'un sin érpartir ed l'eute ! Qué ju !!
Oué a coté d'ém baraque pachqu'à none ech présidint pi s'clique i varront minger in face cazi d'ém moaison
Ej vous direz quoé qu'i l'o mié ! Pou ch'fromache ch'est sur i prindro du "PRÉSIDENT" !!
lundi 15 janvier 2018
In r'tard à ch'l église
Mériez vous mais n'seuchez mie in r'tard ! Téné* d'attinde chés coupes* qu'is doét't-é s'unir din s'n église , el vicaire d'inne tchote paroisse au nord ed l'Ingleterre i l'o décidé d'imposer eune ameinde ed 110€ .
Hormis ceuss qu'is sont qu'is sont bloqués din un imbouteillache su chés autoroutes .
Si os étoéte mon ch'cabartier in route a laper quéques bistouilles , i feuro* raquer chés 110€ .
Tout chés pécaillons récoués* is iront pou ch'carillonneux , ch'bedeau, o bien chés éfants d'cœur qu'is sont obligés d'attinde ...
Mériez vous belle jonesse !!
*Téné= Fatigué
*Coupes =Couples
*Feuro = Faudra
*Récouer = Récupérer
Hormis ceuss qu'is sont qu'is sont bloqués din un imbouteillache su chés autoroutes .
Si os étoéte mon ch'cabartier in route a laper quéques bistouilles , i feuro* raquer chés 110€ .
Tout chés pécaillons récoués* is iront pou ch'carillonneux , ch'bedeau, o bien chés éfants d'cœur qu'is sont obligés d'attinde ...
Mériez vous belle jonesse !!
*Téné= Fatigué
*Coupes =Couples
*Feuro = Faudra
*Récouer = Récupérer
dimanche 14 janvier 2018
Galettes dés roés "du disco "
Coér in-nhui os allons mier gramint d'galettes des roés . Chés boulingers is n'minqu't-é poin d'gingin pour treuver dés féves originales . Mais pou ch'qui n'n est ed chol galette al o toudis yeu el minme forme est couleur .
Hormis qu'la un boulinger ed Nancy qu'és boutique al est plache du pain levé (cha n's invinte poin) i l'o yeu l'idée ed foaire eine galette in forme ed disque vinyle un 33 tours .
I l'o prind du carbon végétal pour foaire cho'c couleur noérte . Pi bé seur chés galettes is sront vindues din dés pochettes ed disques ; Madonna , AC/DC ; Beatles , Dalida ; et pi bié seur Johnny ...noér ch'est noér
J'va insayer d'vous ruer chol tchote vidéo , si cha n'marche poin os érez eune photo , ch'est diminche feut poin m'in dminder d'trop !! Adé , et pourléquez vous bien avu chés galettes ! Binde éd d'galaffes !!!!!!
Hormis qu'la un boulinger ed Nancy qu'és boutique al est plache du pain levé (cha n's invinte poin) i l'o yeu l'idée ed foaire eine galette in forme ed disque vinyle un 33 tours .
I l'o prind du carbon végétal pour foaire cho'c couleur noérte . Pi bé seur chés galettes is sront vindues din dés pochettes ed disques ; Madonna , AC/DC ; Beatles , Dalida ; et pi bié seur Johnny ...noér ch'est noér
J'va insayer d'vous ruer chol tchote vidéo , si cha n'marche poin os érez eune photo , ch'est diminche feut poin m'in dminder d'trop !! Adé , et pourléquez vous bien avu chés galettes ! Binde éd d'galaffes !!!!!!
samedi 13 janvier 2018
Ed moins in moins
Din chés Heuts d'France in 20 ans pu du mitan d'chés moénieux qu'is nichoait't din chés milleux agricoles is ont dispéru a coeuse d'eune "intensification agricole" ch'est valabe pour tout l'Europe , a coeuse del suppréssion d'chés hayes , d'chés patures , et patis .
N'y o des moénieux qu'o voét cazimint pu conme chés linottes mélodieuses , obien coér chés tourtrelles des boés ! R'beyez cho'f foto in dsous d'inne biéle linotte mélodieuse
N'y o des moénieux qu'o voét cazimint pu conme chés linottes mélodieuses , obien coér chés tourtrelles des boés ! R'beyez cho'f foto in dsous d'inne biéle linotte mélodieuse
vendredi 12 janvier 2018
I l'éroét du métte sés palmes
In tout cas li i l'éro* poin chop'palmé-d'or ed Canne ! portant i l'o bien foait sin cinéma ! I l'o tout foait vir a chés cadoreux qu'is l'poursuivoait't !
Tout a cminché a l'sortie d'Canne limite Mandelieu ...La bocca pour chétlo qu'is connait'te el coin !
Un type avoéc dél drogue su li i tente d'écapper a un contrôle ed police ! I détale conme un iéfe edvant chés cadoreux , qu'is s'métte al poursuire* !
Voéyant qu'i n'iroait poin bien loi conme o , in plus i perdoait sés tchots saclets* d'drogue pér driére li ; i y-o prind eune lubrie a ch'noércassier* la , quoé qu'i l'o foait , i s'a jéjté a l'ieu et i l'o nagé in suivant ch'trait d'côte in pinsant smer chés policiers !
Peine pardu , is l'l ont péqué quiques métes pus loin !
*L'éro = L'aura
*Poursuire = Poursuivre
*Saclets = Sachets
*Noércassiers = Individu pas clair
Tout a cminché a l'sortie d'Canne limite Mandelieu ...La bocca pour chétlo qu'is connait'te el coin !
Un type avoéc dél drogue su li i tente d'écapper a un contrôle ed police ! I détale conme un iéfe edvant chés cadoreux , qu'is s'métte al poursuire* !
Voéyant qu'i n'iroait poin bien loi conme o , in plus i perdoait sés tchots saclets* d'drogue pér driére li ; i y-o prind eune lubrie a ch'noércassier* la , quoé qu'i l'o foait , i s'a jéjté a l'ieu et i l'o nagé in suivant ch'trait d'côte in pinsant smer chés policiers !
Peine pardu , is l'l ont péqué quiques métes pus loin !
*L'éro = L'aura
*Poursuire = Poursuivre
*Saclets = Sachets
*Noércassiers = Individu pas clair
jeudi 11 janvier 2018
Cha Plagne pour mi
Si os voulez n'in métte plein lés quinqets* à vou fenme durant chés vagances dé ski , os pourrez l'inmer in dameuse éd-lusque*
Chl éstation d'la Plagne in Savoie al o agincé inne dameuse aveuc méneu d'dameuse bien seur , ch'l eingin i l'est keuffé* , os pouvez r'béyer dés fimes ; n'y o tou * dow-wifi , pi un grand lit ; chu champagne i est offert .
Arrivé a chu sommet d'l arpette (2400M) , n'y o inne salle aveuc bain balnéo .
Pi l-lindmain ch'méneu d'dameuse i vient vous r'queur . Feuro* qua-minme raquer 320€ pér nuit !
*Quinquets = Yeux
*Lusque = Luxe
*Keuffé= Chauffé
*Tou = Aussi
*Feuro = Faudra
Chl éstation d'la Plagne in Savoie al o agincé inne dameuse aveuc méneu d'dameuse bien seur , ch'l eingin i l'est keuffé* , os pouvez r'béyer dés fimes ; n'y o tou * dow-wifi , pi un grand lit ; chu champagne i est offert .
Arrivé a chu sommet d'l arpette (2400M) , n'y o inne salle aveuc bain balnéo .
Pi l-lindmain ch'méneu d'dameuse i vient vous r'queur . Feuro* qua-minme raquer 320€ pér nuit !
*Quinquets = Yeux
*Lusque = Luxe
*Keuffé= Chauffé
*Tou = Aussi
*Feuro = Faudra
mercredi 10 janvier 2018
Déroufleux d'train
Pour seur eq chés deux z'halbrans la is déraill't-é complétemint !!
Pér après avoér écapé* a chés 2 infirmiers d'garde ed l'hôpital sikatrike* ed Bourges . Deux types ont décidé tout simplemint ed déroufler* un train ! M'einfin is ont bien insayé , eune foés incrinqué din cho'c cabéne ed méneu d'train , vlo ti poin qu'is ont cminché ed buquer* su tout chés pipions* pou l' foaire démarrer .
Mais rien a foaire ch'l eingin n'o janmoés voulu avincher d'eine flépe . Al fin dés fins is s-sont foait péquer pér chés policiers in voulant monter din ch'train pour Péris . Du coup chés cadoreux is z'z ont ramnés maison d'chés fous !
*Sikatrike = Psychiatrique
*Déroufler = Voler
*Buquer = Taper , frapper
*Pipions = Boutons
Pér après avoér écapé* a chés 2 infirmiers d'garde ed l'hôpital sikatrike* ed Bourges . Deux types ont décidé tout simplemint ed déroufler* un train ! M'einfin is ont bien insayé , eune foés incrinqué din cho'c cabéne ed méneu d'train , vlo ti poin qu'is ont cminché ed buquer* su tout chés pipions* pou l' foaire démarrer .
Mais rien a foaire ch'l eingin n'o janmoés voulu avincher d'eine flépe . Al fin dés fins is s-sont foait péquer pér chés policiers in voulant monter din ch'train pour Péris . Du coup chés cadoreux is z'z ont ramnés maison d'chés fous !
*Sikatrike = Psychiatrique
*Déroufler = Voler
*Buquer = Taper , frapper
*Pipions = Boutons
mardi 9 janvier 2018
Oz est miu déhors
Réyus* , ércran , téné d'attinde edpis inne heure pour sortir dé ch'l aéroplane* , ein passager dol compannie ryanair qu'al foait Londres ; Malaga; o saqué* su chom manette qu'a cminde éch'l ovérture ed cho'p porte .
I l'o ziuté dehors pour vir si n'y avoait parsonne ; i l' o r'torné queur* sin sac-à dos et i l'est pérti s'assir su....l'aile dé ch'l avion !
*Réyus , ércran , téné= Fatigué
*Aéroplane = Avion
*Saqué = Tiré
*Queur = Chercher
I l'o ziuté dehors pour vir si n'y avoait parsonne ; i l' o r'torné queur* sin sac-à dos et i l'est pérti s'assir su....l'aile dé ch'l avion !
*Réyus , ércran , téné= Fatigué
*Aéroplane = Avion
*Saqué = Tiré
*Queur = Chercher
lundi 8 janvier 2018
Ch'golf ed Ruminghem
Ej vourai * saluer in-nhui inne fin boéne idée qu'is ont yeu chés r'prindeux * dé ch'golf ed Ruminghem
Ch'est ch'l achuchon* Cap énergie qu'i o r'prind ch'golf et qu'o décidé ed foaire un golf géré pér dés afligés* tertous salariés cazimint in CDI . Os ons coér janmoés vu cho in France .
Pou l'momint is sont 7 ; mais a l'fin dés fin is sront eine doujaine .
Ch'est bieu tout l'monne n'el foait poin !!
*Vourai = Voudrai
*R'prindeux = Repreneurs
*Achuchon = Association
*Afigés = Infirmes , handicapés
Ch'est ch'l achuchon* Cap énergie qu'i o r'prind ch'golf et qu'o décidé ed foaire un golf géré pér dés afligés* tertous salariés cazimint in CDI . Os ons coér janmoés vu cho in France .
Pou l'momint is sont 7 ; mais a l'fin dés fin is sront eine doujaine .
Ch'est bieu tout l'monne n'el foait poin !!
*Vourai = Voudrai
*R'prindeux = Repreneurs
*Achuchon = Association
*Afigés = Infirmes , handicapés
dimanche 7 janvier 2018
Eune course au Mans
A intinde dire chol radio locale France bleue Maine pou n'poin l'lonmer * ; un éfant d'chinq ans , l'o été péqué* pér chés gindarmes à bord d'eune audi A5 .
Ech tchot i l'o rintré din ch'fourgon d'chés cadoreux* in voulant échapper a chés forches ed l'orde !
Quante ch'est gindarmes i li ont dmindé ; d'où qu'i comptoait aller ! I l'o déclaqué conme cho !
Foaire eune course au Mans !!
*Lonmer = Nommer
*Péqué = Pêché , utilisé ici dans le sens d'attraper
*Cadoreux = Gendarmes , policiers
Ech tchot i l'o rintré din ch'fourgon d'chés cadoreux* in voulant échapper a chés forches ed l'orde !
Quante ch'est gindarmes i li ont dmindé ; d'où qu'i comptoait aller ! I l'o déclaqué conme cho !
Foaire eune course au Mans !!
*Lonmer = Nommer
*Péqué = Pêché , utilisé ici dans le sens d'attraper
*Cadoreux = Gendarmes , policiers
samedi 6 janvier 2018
Dictons Picard
- si plut pour chés roés , blé aussi heut qué ch'toét !
- Sécréche in janvier ,richesse dé ch'cinsier !
- Saint Vincent clair et bieu , pus d'vint qué d'ieu !
- Janvier d'ieu chiche , foait ch'poaysan riche !
vendredi 5 janvier 2018
Bien au keud
Al coyette conme o dit à mzure ! ... Quiéche ? mi ? Nan , i n'foait mie si froéd qu'cho su cho'c côte d'opale pour qu'éj reste bien au keud* ! Al pointelette* i foait 6 o 7° pi après none os ons 10 o 12° .
Du contraire chés manchots royaux ed chu zoo ed Calgary au Canada is ont té wardés bien au keud ; margré* qu'chés dés bétails qu'is sont foait pour indurer ch'froéd , mais dés qu'i foait pus d'moins 25° is rest't-é din leu cabane , et diminche passé au Canada i fsoait moins 30 , aveuc inne sinsation ed moins 40 a coeuse dé ch'vint d'voleux qu'i fsoait !!
Pour seur éq mi aveuc un froéd parél ej préfére m'inclaner* din chés casinos pour juer a ch'bandit " manchot" !!!!!!
*Keud = Chaud
*Pointelette = Au point du jour , à l'aube
*Margré = Malgré
*Inclaner = Enfermer
Du contraire chés manchots royaux ed chu zoo ed Calgary au Canada is ont té wardés bien au keud ; margré* qu'chés dés bétails qu'is sont foait pour indurer ch'froéd , mais dés qu'i foait pus d'moins 25° is rest't-é din leu cabane , et diminche passé au Canada i fsoait moins 30 , aveuc inne sinsation ed moins 40 a coeuse dé ch'vint d'voleux qu'i fsoait !!
Pour seur éq mi aveuc un froéd parél ej préfére m'inclaner* din chés casinos pour juer a ch'bandit " manchot" !!!!!!
*Keud = Chaud
*Pointelette = Au point du jour , à l'aube
*Margré = Malgré
*Inclaner = Enfermer
jeudi 4 janvier 2018
Foaisez intrer ch'l atchusé
ch'l atchusé , cha n'est mie toudis ch'ti a qui o pinse !
Ma pinse un peu... ! N'y-o dés cadoreux in Suisse qu'ont té* atchusés ed "Délit d'chauffard" pér ech tribunal d'la heute sétchurité judiciaire ! Vinguette , cha n'rigole poin mon chés Suisses !
Quoé qu'is ont foait ?? Ben , leu travail tout simplemint . Est vrai qu'is rouloait't à 130 a plache ed 50 km/h ! Mais bon , o n'péque poin chés agripeux* in roulant à 50 .
Pi d'tout sin is avoai't mis leu corne* et chol leumiére bleuse qu'al tournicotoait !
I n'n o qua-minme prins pour 1 an aveuc surcis !!
Mi j'vous l'dit ; cha malva*
*Té = Été
*Agripeux = Voleurs
*Corne = Siréne
*Cha malva = Ca va mal
Ma pinse un peu... ! N'y-o dés cadoreux in Suisse qu'ont té* atchusés ed "Délit d'chauffard" pér ech tribunal d'la heute sétchurité judiciaire ! Vinguette , cha n'rigole poin mon chés Suisses !
Quoé qu'is ont foait ?? Ben , leu travail tout simplemint . Est vrai qu'is rouloait't à 130 a plache ed 50 km/h ! Mais bon , o n'péque poin chés agripeux* in roulant à 50 .
Pi d'tout sin is avoai't mis leu corne* et chol leumiére bleuse qu'al tournicotoait !
I n'n o qua-minme prins pour 1 an aveuc surcis !!
Mi j'vous l'dit ; cha malva*
*Té = Été
*Agripeux = Voleurs
*Corne = Siréne
*Cha malva = Ca va mal
mercredi 3 janvier 2018
Ch'téléphonne i brait
Chés cabines ed téléphonne à piéches is ont teindance à disparaite i n'in reste ti un chint in-nhui *din toute la France ??
J'ém raminteu* quante j'étoais tchot y-avoait eune cabine a ch'coin dém rue , à piéche bié-seur ! J étoais in admiration dvant tout chés piéches qu'is quaiyoait't* à coté dé ch'combiné ; ej pinsoés toudis qu'j éroais pu z'zés récouer à la fin , mais nan!!
Aveuc més copains quanq'i drachoait o s'lanchoait d-din quique-foés os étoéme à six la d'din ; et quante eune parsonne al vouloait téléphonner ; os mousoéme * à coeuse qu'i falloait décaniller !
Achteure nou cabine al n'est mie pu a ch'coin d'no rue , al est pértie a chol chinmtiére ed chés cabines conme gramint d'eute !!
Asteure os ons chés portabes ,ch'est l'progrès ; mi j'dis qu'ch'est insu"portabe" !!
*In-nhui = Aujourd'hui
*Raminteu = Se ramintuver = Se rappeler
*Quaiyoait't = Tombaient
*Mousoéme = Râlions
J'ém raminteu* quante j'étoais tchot y-avoait eune cabine a ch'coin dém rue , à piéche bié-seur ! J étoais in admiration dvant tout chés piéches qu'is quaiyoait't* à coté dé ch'combiné ; ej pinsoés toudis qu'j éroais pu z'zés récouer à la fin , mais nan!!
Aveuc més copains quanq'i drachoait o s'lanchoait d-din quique-foés os étoéme à six la d'din ; et quante eune parsonne al vouloait téléphonner ; os mousoéme * à coeuse qu'i falloait décaniller !
Achteure nou cabine al n'est mie pu a ch'coin d'no rue , al est pértie a chol chinmtiére ed chés cabines conme gramint d'eute !!
Asteure os ons chés portabes ,ch'est l'progrès ; mi j'dis qu'ch'est insu"portabe" !!
*In-nhui = Aujourd'hui
*Raminteu = Se ramintuver = Se rappeler
*Quaiyoait't = Tombaient
*Mousoéme = Râlions
mardi 2 janvier 2018
Boéne énnée
Os y sonmes tarte à prones !!
Mi ez Zéf ej souhaite à tartous chés gins qu'is lit't-é min blog ? inne BOÉNE ET HEUREUSSE ÉNNÉE 2018 ! pi surtout cheul santé , conme o dit , sans cha quoé qu'o peut bien foaire ??
Cha va biétôt foaire 1 an qué j'vous r'traduit in Picard éd z'infos du monne intier un molé rédeuses(insolites) . Pi j'vo m'atchénir ed continuer , pour foaire vive chol langue Picarde , pour poin qu'al meurche . Si j'peux apporter min tchot bloc à ch'mur ( la pierre à l'édifice ) , j'in sroais biénaise pour tartous !
Édon , coér eine boéne énnée pi n'obliez poin : un cot , un tchien , inne mouque , met du Picard din t'bouque !!!
Adé , a biétôt conme dé bien qu'j éroais coér inne saquoé à dire ....
Ez ZÉF
Mi ez Zéf ej souhaite à tartous chés gins qu'is lit't-é min blog ? inne BOÉNE ET HEUREUSSE ÉNNÉE 2018 ! pi surtout cheul santé , conme o dit , sans cha quoé qu'o peut bien foaire ??
Cha va biétôt foaire 1 an qué j'vous r'traduit in Picard éd z'infos du monne intier un molé rédeuses(insolites) . Pi j'vo m'atchénir ed continuer , pour foaire vive chol langue Picarde , pour poin qu'al meurche . Si j'peux apporter min tchot bloc à ch'mur ( la pierre à l'édifice ) , j'in sroais biénaise pour tartous !
Édon , coér eine boéne énnée pi n'obliez poin : un cot , un tchien , inne mouque , met du Picard din t'bouque !!!
Adé , a biétôt conme dé bien qu'j éroais coér inne saquoé à dire ....
Ez ZÉF
Inscription à :
Articles (Atom)