Dés glaches et inne prone

Chés gindarmes du Rhône is n'in sont coér restés tout étombis , ébeubis quante sémdi passéï is dmind'te à inne voéturette sains pérmis ed s'arter !
Cho'v voéture al o yeu du mau dé stoper toute , et pour coeuse . La d'dins s'intiquoait'te neuf galibiers pértis queur des glaches .

Chés cadoreus is ont aconduit tout cho'c clique mon ch'commissariat . Ch'est leu pérints à chés jones nivlets qu'is sont vnus lés r'queurs . Daucuns i leuz ont prins inne rute volée* , qu'étoait bien méritéï .
Pou n'in définir ed cho'v vérlée la ….dés glaches fondues é-pi inne prone pou chés pérints .

*Volée = Raclée

Maquer du tchien

Chés jones coréens dé ch'sud is treuv't-é qu'i n'y o un "os" quique'pért ! Atandis qu'leu pérints , tayons , ratayons is maquoait't -é pu d'un million d'tchiens pér an , du contraire eux is treuv'te qué d'mier du tchien a n'est poin régalant  !

Cha faisoait un momint qu'chés défenseurs ed chés bétails is attindoait't inne décision conme cha ! Un tribunal i l'o jugé iilégal d'abatte des tchiens pour maquer leu vianne .

Nouzote chés français on maque dés cuiches ed guérnoules ; pi on " CROUAAAA " bien fouére !

I n'feut mie gadrouiller toute !

L'eute coeup din m'boéte à lettes j'ai r'cheu un papier , avoéc mérqué d'sur "repair café " J' ém dit à pért mi , cor eune réclame pour un cabaret  .
Et in y r'béyant d'un molé pu prés ch'étoait poin un café conme éz-z eutes ; nan, ch'est un café d'u qu'on rabistoque toute inne sorte d'agobilles , d'outieus , o bien coér ed manicraques !

Bréf , on n'garotte pu rin a l'ouste , ichi on arringe , pour éviter d'racater du neu !  Mi j'dit qu'ch'est fin bien ,os vnez avuc voz incrinquillaches d'sous l'bros , pi la n'y-o toute inne étchipe qu'al vou baille un molé d'ayude pour réparer vo affaires .

Ej rigoloais a pért mi ; pachque j'ém disos si qu't as un poste ed radio , a fouére réparer , ch'est aisié d'é l'ramener , mais si t'as un lave-z'écwuelles ; la ch'est inne eute poaire ed manche !!!!

Escofié pér és mére

La bos mon chés Indonésiens chés cérémonies pour chés défunctés is peut't-é durer eune coupe ed jours , aveuc do'd danse , musik, ; pi on éscofie* minme un buffe .

Qué coup d'malsaveur és jour la pour un Indonésien ed 40 ans d'age , qu'étoait la pour lés funérailles dé s'mére ; hormis qu'la os ons yeu un intéremint pou l'prix d'deuy' !!
Vlo ch'qu'i s'a passéï . Alorss qu'is montoait't ech luzet * dé s'mére pou l'incrinquer au couplet d'chol tour funéraire , ech cérceuil i l'o glichéï pi i l'o queu su sin fiu .
Fin éstourbi , in'n a poin récapéï ch'paure honme .

*Escofier = Tuer
*Luzet = Cercueil

Ch'permis d'rouler mon ch'cabartier

Eune fénme à Dunkéque qu'al o déjà d'z autos écoles à elle ; al vient d'ovrir inne sorte ed cabaret pou qu'chés candidats is peuch't-é s'déssoéler pi collation.ner tout in révisant ch'code su dés tchots cassis* d'manicraques , et des caksses*.

Grace à un liméro d'idintifiant chol directrice al peut suire ch'l évolution d'ses éléves et pi corriger leu berlures . Mi j'dis qu'ch'est fin bien
J'ai idéeï eq din ch'café lo i n'y a mie d'liceinche 4 !!!!

*Tchots cassis d'manicraques = Tablettes
*Caksses = Casques

Qué témps qu'i va fouére ?

Chés baigneux* in vagances à Mélimont* is s'édmind't-é bien si ch'témps i va s'éclairchir o bien s'grimoucher . Feut'-i prinne sin canneçon d'bain o bien sin parapleuf' ?

*Baigneux = C'est comme ça qu'on appelle les estivants à Berck (62)
*Mélimont = Merlimont

Couscouil ; hayayaye !!

Un honme ed 75 ans i est mort din ch"massif du Canigou (PO 66) . On pourroait pinser qu'i s'a foait attaquer pér un tchien . Nan !!! El massi du Canigou ch'est mie foque pour ches tchiens , tout l'monne i peut s'y proumener .

Ch'paure honme i l'o défuncté in mingeant unne plante vrimeuse . Is vouloait't , li pi s'fénme ramasser du couscouil ; mais is leuz ont bérlureï , is ont prins d'l aconit .

Mi j'dis eq quante on s'y "aconit" poin , on foait conme aveuc chés champignons ; on dminde ed l'ayude mon ch'l apotiquaire !!

Yvette

Cordéonneu ej sus toudis joéyeux , soér au matin ej foais danser chés gins .
Ej cachoais pér après unne intame un molé rigolote pour dviser d'min billet rapport à Yvette Horner , el reine du piano à bértelle . Malheurésmint , al va s'in aller à ch'camp d'soéle , à 95 ans ch'est un bél age conme on dit à mzure .

Os l'savoéte ti vouzote qué s'n honme René Droesch i l'étoait jueu d'football . Sié , poin din chés divisions d'u qu'i a tout chés gros maqués à million , nan , din chélale din t'sous ! Ch'est dja bieuy' tout l'monne n'el foait poin .
Il a juéï à Lens , Roubaix , mais surtout mon chés girondins d'Bordeaux . Et pi l'a fini s'carriére Anmiens mon chés maqueux d'gueugues in 1946 .
René , Yvette , Yvette René , is s'ainmoait't bien touté deux , Yvette à n'n étoait aragée d'sin René . Pi li , René i n'voéyoait " qu' HORNER" ….surtout qu'su l'terrain ch'est tojours li qu'i z'zés tiroait !!!!!!

Y-o un oche quéques part

Asteure ej n'erbéyerais pu do'm minme méniére chés honmes qu'is tiénn't-é un tchien din leu main. A coeuse qu'ej dis cha ?!
Ej pinse a cho'p pauve fénme din lés invirons d'Agen , in rintrant d'œuvrer quante al a overt el porte éd sin garache et qu'al a queue néz a néz avuc un honme qu'i t'noait sin tchien pér él co* . Ch't honme il l'o détalé conme un iéfe , magré tout chés cadoreux is l'ont péqueï à s'maison , piq cho'f fénme al avoait vu s'trogne* à ch'coco la !

chés gindarmes is voloait't l'atchuser ed violation d'maison pi sévices séssuéls d'sur bétail doméstique . L'eute crapule i s'ardréche conme un co d'sur un mont d'fien , pi i déclaque à chés cadoreux : Os,  vous berlurez , j'sus l'amant du mari d'madame , et pi j'inséyoais juste ed foaire freumer sin clapet à ch'tchien qu'i n'décésser d'aboéyer  .

*Co = Cou
*Trogne = Visage

Chés aigues royals ed l'armée

Soin à vous mes gins , si os vos proumenez din chés pyrenées , pinsez à bin miler din ch'temps* pour vir si n'y o poin d'aigues royals qu'is tornicotroait't alintour ed vo cawoétes , ch'est qu'is poroait't vous foncher d'sus , est daingereux . Os pinsez vir un "faux con" mais dés foés ch'est un vrai!!!

Ch'est ch'qu est arrivé à inne jonne fille qu'al étoait in vagance el 17 d'avri , a s'a foait attaquer pér un aigue royal  . I sanne à vir qu'a sroait à coeuse ed sin giyet* qu'al avoait neuéï alintour ed ses hanques .
Probabe qu'éch bétail i l'o prins cho't tchote pour un "drone" . Feut dire étou qu'din léz invirons chés aigues royals is sont intrainés pér l'armée Française pour défier chés érignies volantes  .
Os m'avourez qu'ch'est inne "drone d'histoére " .

*Ch'temps = Le ciel
*Giyet = Gilet

Mi panchu ?

Ch'est qu'asteure chés grands Bretons is foait't attintion a leu poéd*

I sanne à lire qu'is n'ont janmoés si peu lapés d'alcool  . In 20017 pu d'sept mille gins d'au moins seize ans  ont té intérrogées . Foque 57% avoait't bu d' l alcool durant chol sémainne . Atandis qu'in 2005 is étoait't cazi 65% .
Vouzote os n'el voéyez pététe poin vu qu'os habitez din chés térres . Mais mi qué j'su né natif dé l'cote d'opale ; ej pu vous dire qu'a n'est poin dés mintiries . Falloait z'zés vir chés Inglés din z'z énnées 70 din chés grands magasins is r'sortoait't ed la d'ins avuc leu caddis houlé* ed pak ed biéres ! Asteure o n'in voét moins' !  Bye !!!!

*Poéd = Poid
*Houlé = Rempli

FBI ed Denver

Din l'Colorado , i veut miu s'n aller danser avu sin gilet par balles . Un ageint du FBI ed denver étaoit su chol piste in route a s'déhantcher , quante tout à coup sin pistolet à glinché à l'arriére dé s'maron.ne , pér après avoér foait un salto arriére , vlo ch'pistolet qu'i s'trondéle su cho'p piste .

ch'est un voulant l'raveinne , qu'i l'éroait sans l'fouére ésprés , appoyé su cho'g gachette pi affolé* eine pratique* à s'gambe . Bin atombé qué ch't honme i va n'in r'venir !
Adon os m'avourez qu'cha foait peur qua-minme ! népoint !

*Affolé =Bléssé
*Pratique = Client

Épeutnard

N'y o conme un flair*

Din chés aréoplanes , mi j'l ai janmoés prins , mais a intinne dire qu'i y'éroait dés tchots saclets* in cas qu'i éroait dés gins qu'is dégobilleroait't .

Lo , din ch'l avion pérti des Canaries , pour érjoinne Amsterdam , y-o gramint d'monne qu'i leuz on mis à démaquer ! Quoé qu'i s'passe qu'a s'édminde chés hotéches ed l'air ; cho'n nourriture al sroait ti trutée ?  Nan ; quéque temps per apres os ons su ch'bout qu'i va dvant quante eune coupe ed passagers i leuz ont plains qu'i avoait un houstaba noér conme du carbon  qu'i puoait la chorche !

ch'commandant i l'o décidé d'attérir au pus rade , in attindant is ont inclané ch'crapi din lés waters pour qu'a seuche pu indurabe .
Mi j'dis éq si ch'l aréoplane i l'éroait attérit à USHUAYA  notre honme i l'éroait pu s'doucher !!!!!

*Flair = Mauvaise odeur
*Saclets = Sachets

1774

N'allez poin croére ichi eq ch'est inne nouvélle biére qu'a s'in va concurincher "la 1664"

Nan , 1774 ch'est l"énnée d'chés troés boutéles ed vin jaune du jura , qu'is étoait't jouquées din unne cafe * d'pis huit générations .
Au rado edpis deux chint z'ans . cho'v vigne al date ed Louis XV . Deux boutéles d'inne mi,me cuvée is avoait't é dja été vindu à chés inchéres pour 57000€

*Cafe = Cave

Mordure ed sérpint

Os aveu ti djo vu inne affouére paréle ! Eune mordue ed sérpint qu'al éscofie deux gins d'un coup ! Ecmint qu'est ti possibe ?

Atandis qu'al étoait al coyette din s'moaison inroute à don.ner l'gougoute a s'file , un serpint i s'a feufilé din l'moaison pi l'o vnu piquer cho'f fénme , qu'a n'él l'avoait poin vu vnir pisqu'al s'avoait adové . Mais chol décarsure al alloait arriver , non seulmint cho'f fénme al o défuncté quiques temps pér après éte arrivée a l'houpital , mais sin tchot nénin étou al o défuncté  .

Cmint qu'est possibe os vous dmindez qu'unne mordure al foaiche 2 morts ?!  Ben conme cho'f fénme a s'a mie apperchu qu'al savoait foait piquer tout d'suite , ch'venin i l'o yeu l'temps d'impoésonner ch'lait !  Qué coup d'malsaveur