I n'mainque poin d'gingin

Conme d'éffét ch'est bien connu eq pour poin s'foaire vir , i feut s'foaire érmarquer !
Quante chés crapules is veut'té passer do'd drogue à l'frontière is n'sont mie inchpés , is treuv'té tojours moéyen d'moéyener !! Mais quiques foés is s'foait'té pequer pér chés douéniers !

El 15 d'Ahoute n'y o eune binde d'originales qu'is ont inséyé ed berlurer chés doéniers in inscrivant su ch'capot d'leu camionnette " Convoi exceptionnel " Mais ch'est poin à chés viux sinches qu'oz apprins à grigner .
I s'sont foait péquer qua-minme . Cho qui o sanner drole à chés cadoreux , ch'est qu'cho'f phrase al étoait ecrite in Français pi in Espagnole !!

Poin d'waters, poin d'mériage !

Os l'savoéte ti vouzote eq mon chés Indiens eune fénme al peut disvorcer* dé s'n honme siq dins leu moaison i n'y-o poin d'waters  . Pour seur qu'a n'est mie indurabe pour chés fénmes . Acoutez bien!
I feut qu'is attind'té qu'i foaiche brun soér pou s'n aller leu soulager dins ch'courti * .

A n'est mie pinsabe , maginez zz- angouches* du diabe qu'is doét'te incorser* dins leu panche .
Pour se foaire ch'Premier minisse Indien i l'o promis d'ahanser* dés toélettes dins tous chés moaisons d'ichi à 2019 .

*Disvorcer = Divorcer
*Courti = Jardin , potager
*Angouche = Douleur
*Incorser = Endurer , supporter
*Ahanser = Construire

Gatieu impouésonné

Quate , chonq candeilles * d'sur un gatieu cha dépind d'l age ed chés nazus , o bien soéchantes dix , quaté-vingt cha dépind d'l age ed chés viux .
Ed tout sin ch'est du ménme parél cha dépind dé ch'ti qu'i souffe * !  Os dvez chertainemint vos dire quoé qu'i ratruche* ech Zéf ?  Bin vlo ...

Mr Dawson éspecialisé dins cho's sétchurité d'chés alimints i l'o foait eune étude su chés bactéries qu'is finit'te su chés gatieux d'anniversaire quanq'o souffe su chés candeilles . Chu r'cord i r'vient "au glaçage" adou qu'i n'y in éroait 1 400% bactéries in plus qu'eune surface intact .
M'einfin , j'én vourroais mie vous foute les freus , os n'attraprez mie vo crake * si ch'tilo qu'i souffe su ch'gatieu i n'est poin malate

*Candeilles = Chandelle (utilisé ici dans le sens de bougies )
*Souffe = Souffle
*Ratruche = Ergoter , radoter
*Crake = Une maladie

Cho'c coeuchie blanque

Atandis ch'temps la chés températures is n'bach'té poin .  A l'os en gelé* o frole chés 40° casi tous les jours durant chés bieux jours .
Adon !chés blouses blanques* i s-sont dit : Et si qu'o pinturoait cho'c coeuchie in blanc  . Oh , poin tous chés rues jusse éne sécant chés principales . Is appel'té cho " les cool pavements" = Coeuchie* fraique si os ainmez miux . I sanne à vir eq cho'c couleur blanque al foaiche bacher chés degrés , raport a ch'bitume noèr eq li i prind 80 à 95% ed chol leumiére dé ch'solé .
Tout cho est fin bien;  mapinse* un peu , ed qué couleur qu'is sont chés passaches cloutés . Si cha tombe is sont noèrs . Népoint !

*L'os en gelé = Los angeles ( humour Picard)
*Blouses blanques = Chercheurs
*Coeuchie = Route
*Mapinse = Je me demande

Un moés dins ch'monte-gins

Ej sais mie si défuncter dins un monte-gins* ch'est eune biélle mort o bien poin !!
Tours* est ti qu'un honme ed 82 ans i l'o té r'treuvé mort dins ch'l ascenseur el 5 juhiet darnier! Pus d'un moés , portant i l'o peuché* 2 foés su ch'pipion* pour avoér ed l'ayude .
Eune inquéte al o été ouverte pour savoér a coeuse eq parsonne i s'o aboulé pour seuver ch'paure honme !
Ch'est dés gins dé ch'batimints qu'is treuvoait"t qui n'y avoait dés rutes flairinnées * vnant dé ch'parkinge in travaux à ch'moins 2 . Ch'est in ouvrant chés portes qu'is ont vu ch'malheur .
És sœur à ch't honme al s'o radiné rondébilis , chés cadoreux is l'l ont laissié passer in li disant :
Ah os quaisez adréme* cha foait un momint qu'i l'est " LA SANS SOEUR "  .... PDMM ( Oué quoé qu'os volez ozo l'humour qu'o mérite )

*Monte -gins = Ascenseur
*Peuché = Poussé
*Pipion = Bouton
*Flairinnées = Mauvaises odeurs
*Os quaisez adréme = (local)  Vous tombez bien

El queue d'nou cat al est bienvnue

Sié, tout arrife un jour à ch'ti qui sait attinde !
Ch'est in fouissant* sin gardin un bieu jour ed l"an 2004 qu'eune Canadienne al o pardu s'bague ed fiançailles .  Ch't aladon qu'treize ans pu térd ch'dorlot i l'o raparu conme pér mirac alintour d'eune carotte tortuse * ed sin viu courti* .
Quiéche qu'i sait , al n'est pététe déjo pu éc és n'honme !!

*Fouissant = Vient de (fouir) : bêcher
*Tortus(e)  = Tordue .Employé ici dans le sens de biscornue
*Courti = Jardin , potager

Os n'éroét't ti poin vu min grand père ?

Probabe qu'al est aditée* ed rinde visite à sin grand père eune foés pér ésmainne . Mais ch'coup chi cha n's'o mie passé conme d'habitude . Eune foés passé chu grand colidor ,ch'est cho'd darinne* porte à droéte ; al buke ... Parsonne i répond , al rinte qua-minme et la surprinse , pu d'grand-père dins cho'c cambe .
Ahite *, ahite al parte queur cho'd directrice , qu'al étoait lo tout étombie , pi qu'a n'in savoait wére* ed plus !  Adon , is décid'té d'appler chés gindarmes . Au vrépe chés cadoreux is ont r'treuvé ch'grand père ed 93 ans dins un parc ed la ville avoéc és boéne amie bros d'sus bros d'sous .
Manne un peu ; y-o pu d'viélléche , et dire qu'o n'éroait pu déclencher l'alerte inlevemint !!!!

*Aditée = Habituée
*Darinne = Derniere
*Ahite = Vite
Wère = Guère

N' feut poin gadrouiller*

Ej brais conme inne madeleine a chaque coeup qu'o baptise un batieu

-Pourquoé , t'os œuvré dins chés chantiers naval à St Nazaire dins l'temps ?!

- Nan ! Mais j'comprindrais janmoés qu'o peuche berziller* eune boutéle pleine !!!!   PDMM*


*Gadrouiller = Brader , gâcher
*Berziller = Casser
*PDMM = Piche dins mes maronnes : C'est le" LOL " Picard

Chinquante six points

Bé, n'in vlo d'un eute . A mzure* o peut pérde troés , quate chonq points su sin pérmis d'rouler , o peut ménme tout pérde , la os srez obligé d'arter d'rouler pi d'recouer* vo points .
Fuche ! A Marseille n'y-o un gazier qu'i n'veut poin n'n intinde pérler . Cha foait douze ans qu'i roule sains pérmis . Pi a plache ed carrier droét pou n'poin foaire pérler d'li , tout du contraire i l'o inne gron.né* d'amendes ; béyez putôt :  21 excès d'vitéche ; et 8 pour avoér téléfon.né in roulant . T'nez vous bin , cha foait qu'i doét recouer 56 points !
Vintchu ! i vo au moins passer eune ésmainne a chu cente ed rattrapache ed chés points ! 

*A mzure = Parfois
*Recouer = Recuperer
*Gron.né = Grande quantité

Ch'est poin mi ch'est li

Os ons tartous un nom d'famille pus ou moins dur à porter . Ah , quanq'o s'délonme Durant , Dupont , Martin tout i vo fin bien . Mais maginez un molé qu'os vos appléche* Fillon ; François Fillon conme chu politique qu'i s'o foait houler à ch'premier tour ed chés présidintielles ; la os n'erez* poin fini d'vous foaire salir , maltraité  ed toute pért .
Ch'est arrivé à un journalisse d'un jornal , i n-n'étoait réyu* , téné* , à tél poin qu'i l'o du canger sin nom su chés réseaux social . Coér bien  qu'sin blanc bonnet a n's appelle mie Pénélope ; ch'éroait-té l'passe-route* !!!

*Appléche = Appeliez
*Erez = Aurez
*Réyus , téné = Fatigué lassé
* L'passe-route : Le comble , le bouquet final

Neymar et sés doubes

A vo avis combien qu'i feuroait* ed millions ed lites d'heule d'olife* pour acater Neymar  ? Os savez ch'footeu Brésïen qu'i s'a aboulé mon ch"Péris St Germains cho's smainne passé .
Si j'vous dvise ed tout cho ch'est pachque j'ai li un billet dins chu jornal qu'i m'o foait risoter dins més berbes ! N' y-o un jueu d'football miyu d'terrain au Ghana ed 25 ans , qui a mzure foait dés rimplachmints pour avoèr un molé* d'pécaille in ramindo* . Mais lo ch'est .un titchot villache Turcq qu'i n'o poin d'trop lés moéyens ; pour se foaire is ont yeu l'idée d'li bailler 10 lites d'heule d'olife in guise ed salaire

Feut dire étou qué ch'footbaleu i l'avoait r'fusé ed toucher dés ronds a coeuse qu'i l'etoait invité dins ch'villache , pér ech maire probabe
I sanne à vir qu'el PSG i l'euche volu poayer Neymar in sauce Catalane mais i l'o r'fusé ... Allez savoèr à coeuse !!!!!

*Feuroait= Faudrait
*Heule d'olife = HUile d'olive
*Un molé = Un peu
*Ramindo = En supplément

Coeup d'bé

Qué coeup d'malsaveur * !  Atandis qu'i l'étoait lo étampi* su ch'pont d'un batieu pindant in voéyache in Indonesie avu s'fenme , bé , pérlons n-n'in dé s'fenme in quittant s'cabéne* pour érjoinde és n' honme al o yeu l' surprise ed vir qu'i l'etoait lo coutché dins eune mére* ed sang avoéc un treu à sin co*
Is l'l ont mené à l'hosto rondébilis et ch'est in foaisant d'z imaches qu'is ont vu qué ch't honme i s'avoait foait attaquer pér un éspadon , i l'avoait coér el pointe  ed sin bé* dins sin co à un miliméte dé s'carotide !!
Qua-minme ech pichon i l'eroait pu s'estchuser pi dire pér ézempe  : 'spadon j'l ai mie foait ésprés !!

*Malsaveur = Malchance
*Etampi = Debout , dresser
*Cabéne = Cabine
*Mére = Mare
*Co = Cou
*Bé = Bec

Cha r'sanne à du iéfe !

Tout l'monne n'él froait poin ! Un maire d'un tchot poéys dés Landes i l'avoait périé* éq Barcelone n'éroait poin pu mérquer 6 buts à Péris à chu match értour ed cho'l ligue dés campions .
Bernique ! is l-l ont foait chés catalans is ont guégné 6-1 . Adon ch'maire i l'o pardu et i l'o du minger du ...ragondin . Dans eune tchoté-vidéo qu'os pourez r'beyer su ch'l arnitoéle* ; o l'voét à tabe dins un réstaurant , bérét jouqué* su s'cawoéte avoéc un ragondin dins s'n assiette .
Ch'est fin régalant qu'i l'eroait déclaqué ..Cha r'sanne à du iéfe *

*Périé = Parié
*L'arnitoéle = La toile : le net
*Jouqué = Juché
*Ièfe = lièvre

Sin violon dingue ch'est d'berziller...

Sié , ed berziller* dés violons . 54 violons et 70 archets qu'eune Chinoése ed 34 ans al o déwigné* . Is appartenoait't à s'n honme , coèr inne histoère ed divorce qu'al o torné-mal .
I nn'o qua-minme pour huit chint mille euros d-dégat . Rien qu'ech violon Itaïen à li tout seu i coutoait 380 000 € .
Al o ptététe poin quére cho'm music ; mais a n'mainque poin  " d'air "  !!

*Berziller = Casser , briser
*Déwigné = Disloqué

Cadoreux taxi

 Qué toupion* ! I nn'o qu'i n'mainque poin d'tchulot  Alorss qu'i sortoait dé ch'dancing dins chol nuit ed vindérdi à sémdi . Un honme prind sin téléfone pi appel chés cadoreux in leu disant qu'i l'est intouré d"éne dijaine d'houstapiats* armés d'alleuméles * .
Eune foés rindu sur plache , chés gindarmes is ont flairé ch'linfilure* qu'a s'tramoait .  I n'étoait mie quéstion d'grabuge* ; ch'étoait jusse qu'éch ferlampier lo i l'avoait invie dé s'foaire ramener a s'moaison pér chés cadoreux .
Ch'aladon qu'chés gindarmes is l-l'ont imener qua-ménme . Soin ! poin a s'baraque ; nan,  diréc dins l'gayole* . Feut dire qu'i l'avoait 0,5 g d'alcool dins l'sang !

*Toupion = Toupet
*Houstapiats = Individus bizarres
*Alleuméles = Grands couteaux (lames)
*Infilure = Ruse
*Gayole = Cage . Employé ici dans le sens de prison

El pu viu d'chés Français

Ch'est eune  fenme ed 114 ans ! El doéyenne ed chés Français al est Bretonne , natif ed Paimpol!
M'einfin , asteure al reste dins l'midi à St Maximin la sainte Baume . Probabe qu'ech solé est bien pu racachant qu'él pleuf' pour sés romatikes .
Chés gins qu'is oeuve'té dins cho'm moaison d'ertraite is sont tartous fin rétus* ; piq'is ont foait vnir pour sés ages un groupe folklorique guingampais !
Ed tout sin*, al cminchoait dé nn'avoér marre d'avoér éd z'andimoles* tout l'z ans conme présent .
Peut qu'manquer , eq quante o viusi o n'o poin télmint  quère ed mier dés crapettes* . Pachque quante o voét cho'c crêpe os ons l'sinsation bizarre dé s'vir au matin dvant ch'miloèr* !! 

*Rétus = gentils
*Ed tout sin = De toute façon
*Andimoles = Crêpes
*Crapettes = c'est comme ça que l'on dit "crêpe " du côté de Berck
*Miloèr = Miroir