Pérti à teupe

Qué bieu jour quante o s'mérit * ; o voét sés gins qu'oz o poin vu dpis un boin momint , pi après i-o ch'répilet* , dou qu'o s'in mét eine boéne panchie , pi o dance étou , bréf ; éq du bonheur !

Pi lin-nmain , os cachez* din chu jornal din cho'r rubrique "mériache" pour vir vo nom pi eine photo ! Hormis qu'lo i l'o bieu r'luquer ch'jornal ed bistinbout* , i n'voét RIEN passé rien !
És fénme al jette un ziux , pi au bout d'dix minutes , al dit a s'n honme , ha y est j'ai treuvé d'où qu'on ai , ch'est mie 'tonant qu'tu n'trouvoais poin , is nos ont boutés din l'rubrique ed chés DÉFUNCTÉS* ... 
Os m'avourez qu'o n'in voét d'drole !  Ej sais bien qu'o dit toudis in rigolant qué s'mérier ch'est s'mette el corde au cou ; mais qua -minme !!!  

*S'mérit = Vient de " marier " 

*Répilet =Banquet 

*Cachez= Cherchez ( ou trachez) 

*Bistinbout = D'un bout à l'autre 

*Défunctés = Morts 

Nérnu dvant chés gindarmes

A Lamballe din chés côtes d'Armor , chés cadoreux qu'is rodailloait't* alintour ed cho'g gare is ont cru avoèr inne bleuse-vue
Su les coup dés 3h du matin , i voét't un honme nérnu* conme un ver , in train d'prinde la pose aveuc in fusil à l'épeule* . In s'rapprochant un molé pu prés is s'appércheu'te eq cha n'est mie un fusil mais...un ramon  !!
Chés cadoreux is li dminde un molé d'asplique* , et ch'gazier la i leu déclaque conme cho : J'ai pérdu un pari , édon j'doés imiter min sport eq j'a quére nérnu conme un ver !
Et quoé qu'ch'est don vo sport qu'os foaisez ? Qui dminde chés cadoreux !
Ej foais du biathlon ...
Nan mais o voéro d'toute !!

*Rodayer = Rôder
*Nérnu = Nu
*L'épeule = Epaule
*Asplique = Explication

Bache ét'tiête

Sié , bache* ét'tiête , a coeuse qué j'vos dit cho ?!  A coeuse ed cho'p pubicité su ch'quèrpion* !
Déjo qu'edvant d'avoér do'p pub su ch'trottoèr chés gins is avoait't toudis leu tiête bachées in route à r'béyer leu portabe !

Vlo qu'asteure is pourront lire dés méssaches pubicitaires ; nin vlo d'un eute !
Minne si ch'méssache i doét poin foaire glicher chés passant , et au bout d'dix jours i doét s'déffacer* tout seu , pi msurer* wére pluss éd-deux métes carré .
Qua-minme , os m'avourez qu'os ons* plus bieu à vir su nou terre in lvant s'cawoéte putôt qu'dél bacher !  Népoint * .

*Bache = Baisse
*Querpion  Trottoir (surtout utilisé dans le Nord 59)
*S'déffacer = S' effacer
*Ons = Avons

Tchot Jésus l'o disparu

Ch'est con , einfin j'devrai putôt dire " chi-con " mais ch'est vraimint arrivé !

Cha foait deux coups in chinq ans qu'o dérouffle ech'tiot Jésus din cho'c créche ed Viverols din ch'Puy d'dôme , et qu'a plache dé ch'tchot Jésus o treuve un CHICON .

El darin* coeup is l'avoait't értreuvé deux jours pus térd !
Chés roés mages is vont qua-minme poin réstés avu chés cadeaux sous leu bros * , non dé boé !

*Darin = Dernier
*Bros = Bras

Galipette ed l'acoupa

Quante os avez un voésin qu'is vos berzille vos éréles* in foaisant dés galipettes a la patronne dusqu'a dés heures du diape , os pouvez coér li dire el lindmain qué s'fénme al diminuche  un molé sés wigneries* , o bien qu'i rinforche  sés murs !!

Mais quante chés des pichons , cmint qu'is peut't-é foaire ??
Din ch'golfe ed Californie , ech pichon qu'i s'délonme " l'acoupa" durant cho'p période ed fraye is s'reunich'te tértous a des millions et is foait't un buzin* du diabe ; qu'a r'sanne à chés braillemeints ed gins din un stade éd footéball .
Du coup is berzill't-é chés éréles ed chés dauphins . Maginez don qu'un acoupa i l'est capape ed foaire sitant  d'bruit qu'inne baleine ; pi pourtant i mzure moins d'un méte !!


*Éréles = Oreilles
*Wigneies = Ici dans le sens de gémissements
*Buzin = Bruit

Eune biére poin d'trop tchuite

Poin d'trop tchuit , obien bien tchuit , o dit putôt cha quante os allez mon* ch'boulinger pour queur vo pain ! Mais lo , pourquoé avu cho'b biére ??

ESt simpe conme bonjour , ch'est pachque n'y-o dés brasseurs in Bégike , in Ingleterre , pi tou in France qu'is ont décidé ed récouer chés invindus d'pains in Boulingerie pour l'ércycler in biére .
Pi cha marche ; amon chés Inglais pus d'neuf tonnes ed pains ont té trainsformés pour bailler* pus d'troés chint mille biéres pour un prix d'eine boéne biére artisanale !
Mi j'dis qu'ch'est bien pour éviter d'brader


*Mon = Chez
*Tou = (é)tou = Aussi
*Bailler = Donner

Sans fu ni liu *

Bén li ech'sans fu ni liu la , i n'o mie jué a chu loto d'Noé , mais i l'o guégné 300 000€ ; écmint qu'i l'o foait ?? bén j'm in vo vos l'conter !

Vlo un sans fu ni liu qu'i habite si o peut dire  conme cho din ch'l aréoport ed Roissy . Avoéc des million d'gins qu'is pass'te et qu'is rapass'te n'y o toudis eine saquoé à récouer*!

Conme tous lés jours i l'est adité* d'raveuder din chés poubelles , pi lo probabe qu'i vnoait ed démucher eine bricoleet  in voulant l'raviser d'pus prés i s'appuie d'sur inne porte ; et d'un coup vlo qu' cho'm meudit porte al s'ouve .  Ech paure lazére* i jette un ziu et i voét deux , troés so* , i z'zés prins , i r'guette quoé qu'i y- o d'din ... Non dés z'os , i saque dés ziux conme dés tchuls d'gatte !!!  Chés so is sont rimplis d'billets d'banque ; i n-n'o pour 300 000€ .
Grace à chés caméras qu'is vos mil'te , chés cadoreux is ont vite comprins ch'qu'i savoait passé , et is s-sont mis à cacher pér après ch't honme din tout ch'l aréoport , vu qu'is étoait't duis* dé l'vir ichi ...Mais rien , passé rien ; intouvabe !!
Nin vlo au moins un qu'i vo pouvoér canger d'vie ! avoéc chés pécaillons qu'i l'o "treuvé" !!
Gageons qu'i seuche bien sé n'in sérvir !

*Un sans fu ni liu = SDF
*Recouer = Recuperer
*Adité = Habitué
*Lazére = Miséreux
*So = Sac(s)
*Duis = Habitués

Nouvieu pacemaker

Deux fenmes qu'is sont su leu pos d'porte is dvist't insanne , is raguist't-é leu langue !

Min voésin qu'al dit eune dés deux fénmes i vient dé s'foaire installer un nouvieu pacemaker .
Mais j'ai idée eq tout ch't acrinquillache lo i n'est poin d'équerre !
- A coeuse eq tu dis cho ??
- Bén , quante i foait l'amour cha ouve ém porte éd garache !!!

Ch'loto d'Noé

Ch'étoait à morir ed rire ! Os éroéte vu ch'tableau hier à ch'débit * su lés coup dés 3h d'érmontée ; mi , éz Zéf in route à foaire min loto d'Noé !

Y-o granmint d'temps qu'j ai mie jué a ch'loto ; el darin coup chés glaines is avoait'te dés dints ! au moins 15 ans ! Édon , ej coche chés liméros , ceux qu'j a quére bié seur conme tartous ! Pi après j'm aboule au zinc* pour poayer , mais dvant cha ch't honme i passe  min ticket din cho'm machine à loto ... Ercominchez qu'cho'm machine al dit ; ch't honme i défroéche* un molé ch'ticket conme o foait dés foés aveuc chés billets d'banque ; pi i l'rintique ed-din .... Ércominchez qu'al érdit ; ch't honme i r'cominche , deux , troés coup ; in m'disant qu'cho arrive coér a mzure  mais poin sitant d'foés !

Ch'cabartier  i r'prind un nouvieu ticket pi i r'copie més liméros ... Et i m'érbéye conme inne glaine qu'al vient d'déteuper un coutieu ; et i m'déclaque : A n'est mie 'tonant qu'cho'm machine al érfuse toute !! Os avez cochez ...6 liméros a plache ed 5 !!

Mais qué niacoés qu'éj su non dé boé !!!  Du coup pour m'armétte ed més émotions j'ai bu un jus d'houblon !!   Mainqueroait pu qué j'guégne*  cha s'roait l'pastorelle !!!!

*ch'débit = Le débitant
*Liméros = Numéros
*Défroéche = Défroisse
*Guégne = Gagne

Min bieu sapin

Maginez des millions d'sapins  d'Noé vindus durant ch'moés d'déchimbe ; pi coér , poin tout ch'moés in intier !
Pi après l'galette ed chés roés ; quazi in minme temps tout l'monne i boute sin sapin a l'ouste* .
Qué gachi !!  Achteure n'y-o du nouvieu . A Marseille n'y o eine société qu'al loue chés sapins .

Os cmindez à l'avinche , os disez chol taille si qu'os voudrez  un grand ou un tchot . Pi à l'date prévue cho'c camion.nette al s'aboule pour vos l'livrer , pi bé seur i vienne't-é l'érqueur* après chés fêtes .

Pou l'momint y-o poin d'trop d'monne qu'is l'foait'te* ; seurmint a coeuse dé ch'prix !
80€ pour un tchot
100€ pou ch'grand
Non dé boé !! Ch'est pététe biétôt Noé ; mais ch'prix ch'est mie un cadeau !!!!!

*A l'ouste = Dehors
*L'érqueur = Le rechercher
*Foait'te = Font

Houps ! amon HOP

Chés passagers is ont té un molé éffoayés* din ch'l aréoplane qu'i dvoait z'zés mnés à Montpellier départ d'Orly ...

Attaqués vo chintures oz décolle !!  ch'l aréo i cminche éd prinde do'v vitéche su ch'tarmac ; quand vlo ti poin qu'un hocleux* i l'ahoupe eine hotéche ed l'air in li dmindant si ch'l avion i l'alloait bien à Bordeaux !
Asseuré* qu'nan qu'al i rinfique ech''l hotéche* ; i vo a Montpellier ...  Conme chés 2 reules is n'avoait't poin quittés ch'tarmac ; ech pilote i l'o foait nmi-tour !!
Manne un peu , su l'coup cho foait rire tartous chés gins ; mais aveuc tous chés vérifications qu'os ons asteure  o s'édminde écmint qu'i l'o réussi à s'incrinquer din ch'l aréoplane


*Éffoyés = Effrayés
*Hocleux = Type louche
*Asseuré = Assurément
*Hotéche = Hôtesse

Quante i nn'o pour un ...

Min copain eq ch'est un rute wépe à tchul gane , i n'mainque poin d'gingin !
Un coup  i m'dit conme cho  ; acoute mé bien z'Zéf  :

Un jour varro* adou qu'j éroais un éfant ; bén ch'jour lo j'acatrai eune poussette d'où  qu'o peut mette deux papars* ed'din . Conme cho quante i sro pus grand j'i dirai qu'sin frére i n'écoutoait poin cho qu'j i disoait !!!

*Varro = Viendra
*Papars = Bébés

Berdler d'ouvrache din l'noèr

Ed z'intretiens d'ouvrache ed vingt minutes cha n'est mie rére qu'os allez m'dire .
Hormis qu'lo ch'patron pi ch'l ovrier is n'sé voét't -é poin ; is ont leu quinquets * d'muchés pér un masque .  Ch'est eune troésiéme parsonne qu'al vient leu bailler un molé d'ayude* pour s'assir , et is cminch't-é leu dviserie raport à ch'l ouvrache .

Pér après dix minutes is déssaqu't -é leu masques et is finit't-é l'intretien lés ziux din lés ziux .
Ch'est ti bien d'foaire conme cho ? Est poin à mi dé l'dire . Tours * est ti qu'édpis* troés ans n'y o soixante dix travailleux afligés* qu'ont té imbauchés .!


*Quinquets = Les yeux
*Ayude = Aide
*Tours = Toujours
* Edpis = Depuis
*Afligés = Infirme

Pére Noé , ouéche eq t'es !

Ch'est in s' n allant à sin boulot quiques pért in Bretagne qu'eune fénme al o vu  in pyjama et in pantouffe , un margat* tout seu qu'i ransoait  din chés rues !

Un molé surprins qua -minme , al s'arréte pou dminder a ch'tchot quoé qu'i brasse tout seu din chés rues ! I li rinfique qu'i l'o quitté s'moaison a l'muche tin pot *  acoeuse qu'in'n avoait marre d'attinde chu pére noé , étoait dévnu  d'trop long pour li , édon i l'o décidé ed cacher* pér après li .

Heureusmint ch'l histoére al fini bien , cho'f fénme al l'o prins din s'n auto pi al o dmindé a ch'margat d'érconnoaite és moaison , i n'o poin térinté* , i l'o seu r'treuver s'baraque !
Chés pérints tranquille conme batisse ; euss is n'savoait't appercheu dé rien !  

*Margat = Enfant
*Al muche tin pot = En cachette
*Cacher ou tracher = Chercher
*Térinté = Hésité

L'avocat coupabe

Coupabe ed quoé ?!  Coupabe ed grafe* affolure* , surtout a chés mains !Ch'l avocat ;  ej pérle dé ch'fruit poin dé ch't honme atifé avoéc inne longue-é robe noérte ...

A coeuse  qu'est daingereux ?  A coeuse dé ch'noéyeu*  Granmint d'gins is s'ertreuve'te à l'hosto chaque énée in copant un avocat . Is oublit'te qu'i n'y o un noéyeu* din ch'miyu ; pi clac,  ech coutieu i gliche et un doégt in moins' ! Maginez qu'a seuche ech pouche* ; bén is pourront pu foaire dé STOP !

Achteure ch'est fini os n'vos coperez pu . Chés Grands Bretons* Marks Spencer is ont invintion.né ch'l avocat sans noéyeu !  Bon;  vlo pour in-nhui "la séance est l'vée "  Adé

*Grafe = Grave
*Affolure = Bléssure
*Noéyeu = Noyau
*Pouche = Pouce
*Grands Bretons = Les Anglais

I o mie l'fu !

Éh bé sié justemint i -o l'fu non dés z'os !
Mon chés ricains la bos du coté d'aliwoude ! Tout est azi , guerzi ; i o l'fu din chés collines qu'i boute él fu a chés baraques ; minme chés baraque ed chés maqués à millions (chés vedettes d'aliwoude )

Pi din tout ch'carpin la , alors' qu'i n'y a dés chint pi dés mille ed gins qu'is décanill'te avu lu voéture pi qu'is s'intass't-é su chés voés rapides . Vlo ti poin qu'un type i fruche * inter chés voétures , biétôt qu'i s'froait écatir és t'halbran la , a coeuse eq chés automobilisses is ni voét't-é goutte* raport a cho'f funqué dé ch'fu .
Edon , ch'type o l'voét s'métte à deux jnoux pi raveuder* du coté d'chol binne d'arrét d'urgeince !
Quoé qu'i foait ? Os l'savez ti vouzote ?
Deux , troés minutes pér après i s'r étampi* , et dvinez quoé qu'i l'avoait din sés mains ; ....un lapin ! Tout chés risque é-lo pour un capuchin ! 
Tours est -i qué ch't honme i l'o détalé conme un iéfe* pachqu'i cminchoait d'avoér el fu a sin tchul !!!

*Frucher = Passer entre quelque chose ou quelqu'un
*Voir goutte = Ne pas voir grand chose
*Raveuder = Chercher
*S'r étampir = Se redresser
*Iéfe = Lièvre

Arragé d'd Johnny

J'm in vo ichi vous bailler deux ou troés infos qu'is traine't-é din un racoin d'chés gazettes raport a Jojo !

In preume : A chavieux chavagneux in Isére (38) ché-té l'seule ville ed France adou qu'i n'y avoait inne rue  Johnny Halliday . J'ai bien dit ch'étoait , a coeuse qu'i n-y o un agripeux* qu'i o dérouflé ch'panneau !  Qué siéc !!!!!

In deuze : A Nimes (30) Chu proviseur d'un collége i y-o prins l-lubrie* ed rimplacher chol sonnerie d'cho'c cloche pér dés canchons d-d Johnny , dusqu'a chés vagances ed Noé !

I sanne à vir eq chés collégiens is guet'te la mort ed Sheila , rien qu'pour intinde cho'm music " Mais oui , mais oui l'école est finie "

*Agripeux = Voleur
*Lubrie = Lubie

Feudroait savoèr

Deux fénmes is raguich't* é-leu langue à ch'coin minteu !

Ch'est à ni rien comprinde . Tous chés honmes qué j'sus sorti avoéc , i n-n o poin un qu'i o volu s'eingager aveuc mi .    Bé , prindons ch'darin* pér égzémpe , eq cha foait DEUX  ans qu'os vivons insanne .  Ej i ai déclaqué  : Ti ; seuche eq tu m'dis écmint qu'ch'est tin tchot nom , obien ch'est fini inter nous deux !!!!


*Raguisser = Aiguiser leur langue ( dans le sens de dire sur l'un et sur l'autre)
*Darin = Dernier

Tout foait panche !

Ch't honme lo ch'est eine réderie à li tout seu ! Ch'est l'histoère d'un type ed 35 ans d'age , qu'i vit in Inde ;  à mitan braque* à coeuse d'inne grave dépréssion .
Vlo ti poin qu'un bieu jour i s'aboule à l'hosto ployé* in deux . J ai du mau à m'panche ; j'ai du mau à m'panche qu'i gueuloait conme un brulé !

Ahite , ahite * ech métçin d'garde i y'intique eine caméra din sin corps et lo ch'toubibe i n'n o résté tout ébeubi ed vir ch'qui voéyoait :  263 piéches ed monnaie ; 100 cleus ; du verre bérzillé , dés dijaines ed lames éd rasoérs ; pi toute inne sécant d'objets rédeux* ; tout chés machins lo is avoait't écminché ed treuer s'n éstomac . Is ont pu l'seuver inéstrémisse !!

*Braque = Fou
*Ployé = Plié
*Ahite = Vite
*Rédeux = Originaux

Pus rin à dire

 Ch'paure honme i l'o yeu à r'foaire , et i l'est à deux doégts ed rinvaler s'n aluéte* . Tout sin monne* i vient li rinde eune darinne visite . És fénme al est lo étou ; al s'approche dé ch'lit d'mort dé s'n honme por li dminder sés darinnes* paroles . Et lo malgré qué ch't honme i l'est à court d'halinne* i li rinfique :

SORTEZ ! Chés darinnes paroles , ch'est pour chés imbéciles qu'is n-n ont poin dit assez !!!


*Rinvaler s'n aluéte = Mourir
*Sin monne = Son monde ( ses proches)
*Darin(ne) Dernière
*A court d'halinne = Essoufflé

Vie d'tchien

Pajots*douilléts, bain avoéc dés bulles , vétérinaire el long du jour et ménme pér nuit étou . Do'b bière sains alcool qu'a vient d'Bélgike .
Os sonme din un quértier ed New Delhi in Inde din un hôtel ed luske* pour tchien .

Attindez , ch'est poin toute ; chu bétail à quate pattes i peut avoér un cafiot* , i peut barboter din eune pichine , s'foaire toélétter , et métte du sin boin* et in ramindo* avoér dés massages ayurvédiques . Sié , ch'est véridique !!!
N'y-o qua-minme un OS , poin pou ch'tchien , nan, pou ch'moaite . I devro raquer* 70$ pér nuit !!

*Pajots = lits
*Luske = Luxe
*Cafiot = Café
*Sin boin = Parfum
*Ramindo = En supplément
*Raquer = Ici utilisé dans le sens de payer

Ti pi mi

M'einfin j'devrais putôt dire " Toét plus mi " Mais cha n'faisoait poin domino pour ech ju d'mot !
Bréf ; arvénons à nou bérbis . Ch'l assurance d'értraite al vo lancher su ch'l arnitoéle* début janvier un site qu'i s'appelero  " Toit plus moi " Quoé qu'cha n'n est ?!

Achteure chés viux is pourront don.ner eune cambe à dés jones étudiants qu'is poayeront jusse l'ieu pi ch'l édéhéfe ! In écange , chés jones is taront* companie et is bailleront* un molé d'ayude à chés viux et surtout do'p présénce . Est toudis miux qu'un robot conme is ont din sartaines moaisons ed pinssion.nés .

*Arnitoéle = La toile = le net
*Taront = Tiendront
*Bailleront = Donneront

Wattieu

Ch'est ch'maristére qu'i l'o yeu ch'l idée ed foaire eine érchiné* , allez savoér a coeuse ? probabe qu'eine gin avoait sés ages !!
Tours est t-i qu'chés galibiers pi ch'clerc* is s'in sont mis  inne boéne panchie! binne* ed galaffe !!

Mais eune coupe d'heure pus térd , sartains tchots is cminchoait't ed rigoler tout seu , o bien d'vir dés bétails passer dvant leu ziux !!  Quoé qu'i s'passe don ?  qu'al dit l'mére d'eune éléve ; és n'honme a cho'f fénme lo i l'est gindarme ; et i l'o vite comprins ch'l infilure* !
N'y avoait un éléve qu'avoait sarvi du wattieu au cannabis !! Cho'f fénme al o porté plainte conte éch l'établissemint !  Drole d'archinache , cha fout lés freus* !!

*Erchiner = Goûter
*Clerc , ou Maristére  = Professeur , instituteur
*Binne = Bande
*Infilure = Ruse
*Freus = Frayeur

Adé Johnny

Qué décarsure m'z amis !!  Os cominchez dé m'connoaite un molé pér après avoér pubié pu d'deux chint billets , édon os savez eq ch'est putôt rére qu'ej pérle ed chés actualités qu'is pass'te din chés grands médias Français . Min papin à mi ch'est putôt chés z'insolites chés tchotes infos du monne qu'o passeroait a côté si qu'ej n'in pérleroais poin !

Marche , mais lo ....J'peut ti foaire autremint ?  Timpe au matin in allumant ch'poste ed télé j'ai apprins qu'Johnny i l'avoait rinvaloait s'n aluéte à 74 ans . I sanne à vir qu'és canchon préféré à Johnny ch'étoait " l'envie"  Mi j'a quére  DIEGO ! 
Ed tout sin , mi ed d'Johnny chés canchons qu'j ainme el miu ch'est chélales ed chés énées 60 - 70

Hiér ch'étoait un grand Monsieur d'chés écrivures qu'i n'o z'o quitté , pi in-nhui ch'est un grand dél canchon . El vlo pérti mon ch'paradis d'chés canteux ; i vo r'treuver tout chés grands la heut ; au moins li ; Johnny , i vo einfin savoér si Elvis i l'est vraimint mort !!! 

RIP ....

Eune pérle din s'n écwuéle*

Un coupe ed Breton qu'i réste du coté d'Morlaix is ont décidé d'aller ramasser quéques coquillache . Eune foés rindu in baie d'Morlaix  is  ramach'té dés palourdes ; pér après  n'n avoér récoué* assez pour leu souper , is rint'te a leu baraque pou z'zés prépérer !

Os allons nos pourléquer qu'i dit ch't honme à s'fénme ! Os ons d'l action* , forchémint eune atlée passé à la mer , cha creuse !
A peinne qu'is euch'té mié* eune coupe palourdes , eq cho'f fénme al s'arréte net ed minger ! Ej sins inne saquoé d'dur inter * més dints , vlo ti poin qu'a déssaque dé s'bouque eune tchote pérle ed couleur aubergine ed chonq milimétes ed diaméte .
Un bieu cadeau d'la nature cho'p pérle al finiro in peindintif* qu'a dit cho'f fénme !
Pour sur éq cho'p pérle al est poin grosse ; mais ch'est normale piq'al o treuvé din eune " pas-lourde"

* Ecwuéle = Assiette (vaisselle en générale )
*Récoué = Récupéré
*Avoér ed l'accion = Avoir de l'appétit
*Mié = Mangé
*Inter = Entre
*Peindintif = Pendentif

O peut toudis rêver

 Os savez ti quoé qu'cha veut dire ed rintrer à s'baraque pér nuit , un molé brindzingue , à coté d'eune fénme qu'al vo vous bailler un molé d'amour et d'teindréche ?!!!
Éh bén cha veut dire qu'os vous avez bérluré d'adréche !!!!!!!

I l'o boin dos ch'beudet

Pour mi i dvoait éte mawoés la gale d'avoér ésquinté  s'Ferrari d'sur un dos d'âne ! J ai idée qui dvoait mie rouler à 30 km/h ch'l as du volant !
A peinne rintré à s'baraque i l'o caché* pér après chés normes su chés dos d'âne et i l'o démuché qué chtilo qu'i l'o roulé d'sur i n'avoait poin cho'b boéne heuteur .I l'étoait pus heut d'un chintiméte

Édon ch'pilote i l-l o foait constater pér ch'l huissier . Cho'm mairrie elle , al o dmindé eine contre éspertise . Mais rien à foaire , pour un chintiméte cho'm mairrie al o du raquer* à ch'pilote 2000€ pour chés répérations , pi ch'l huissier . Ch'maire i l'étoait rouche ed colére " Rouche conme cho'l Ferrari "

*Caché , ou traché = Ca dépend les coins = Cherché
*Raquer = Payer

O va mie chinoiser

Réyu , téné* d'arriver à des heures du diabe à s'moaison aprés sin boulot à coeuse ed chés imbouteillaches . Un Chinoés ed 28 ans d'age i l'o décidé d'prinde un tchot pot d'peinture blanque et dé s'métte à croucrou * in plei mitan d'chol  coeuchie* et d'peinturer eine fléque* pour invoéyer chés automobilisses à l'arbout* dé ch'boin séns , pour qu' seuche à s'n avaintage à li !

Coér héreux qu'i n's'o poin foait éberdler*ch'éroait foait eine taque gane à côté d'cho'f fléque !!
Mi j'dis qu'oz est janmoés miu sarvi qu'pér li-minme !!

*Téné = Fatigué
*Croucrou = Accroupi
*Coeuchie = Route
*Fléque = Flèche
*L'arbout = A l'envers , au contraire
*Eberdler = Ecraser

Seu*conme un Polonais

Aveuc cho qu'i s'o passé à Nice el 14 jullet 2016 su la " PROME" , j'ainme autant vos dire éq chés cadoreux is sont bien écanillés* . Et portant n'y-o tours* un agozile* qu'i s'foait r'mérquer .

N'y o un Polonais quérvé* conme treinte six mille honmes , qu'a proufité qu'éch méneu dé ch'tchot train touristique n'étoait poin  à ch'volant ; édon ch'buvatier i n'n o proufité pour s'incrinquer la d-din pi rouler su cho'o " PROME" . Ch'méneu d'train qu'i attindoait sés darins pratiques * , i l'o actionné ch'frein à distance , et i l'o ahoupé ch'polake pér el colbake in l'décanillant dé ch'train .
Eune équipe ed policiers à moto pi in voéture is sont aboulés rondébilis et is ont mnés* ch'gazier lo à ch'poste !!

*Ecaniller = Eveiller
*Agozile = Drôle d'individu
*Quérver = Saoul
*Darins pratiques = Derniers clients
*Mnés = Emmenés

Côte-côte

Qué biéle histoére qué j'm'in vo vous conter lo !
Ch'est l'histoére d'un coupe d"Améritchain Aaron et Jessica pou n'poin z'zés lonmer* qu'is prépar'te leu mériage *; et in cafouillant din chés paprasses pou ch'l état civil is ont démuché* eune cose poin ordinaire !

Figurez vous qu'Aaron et Jessica is sont nées el minme* jour , el minme énée ; al minme heure din l'minme hospital et din l'minme salle d'accouchemint . Édon , probabe qu'el 28 d'avri 1990 is étoait't é-touté-deux din leu berc * côte-côte , éq vingt ans pus térd is s'mérit'te * !! Mi j'dis qu'tout l'monne n'él foait poin !!! 

*Lonmer = Nommer
*Mériage = Mariage
*Démucher = Trouver
*Minme ou ménme = Même
*Berc = Berceau
*Mérit'te = Marient ( vient de marier)

Ch'déroufleux d'chuques

Feut i éte complétemint braque* pour foaire éne cose paréle à chés tchots .
Cmint cho j'ém méts in prousse* ?! Vouzote étou os l'sroéte conme mi si qu'os éroéte li* ch'l artic din cho'g gazette .

20KG ! Vingt tchilos d'chuques qu'o été dérouflé* din un ceinte ed jonnesse din un tchot poéys ed Meurthe et Moselle ; qu'i éroait du éte distribué din un cortége .  Coér heureux qui n'y avoait coér dés péres Noé in chucolat pour chés margats * .  Chés pérents is ont décidés d's achuchon.ner* pour récouer des chuques qui pourront éte déposé in mairrie .
Conme cho chol jonnesse al éro qua-minme sés chucrates . OUF !!!

*Braque = Fou
*In prousse = En colère
*Li = Lu
*Déroufler = Voler
*Margats = Enfants , ados . ( Souvent utilisé dans le Boulonnais )
*S'achuchon.ner = Se rassembler , s'associer

Eq' ch'est bieu Noé !

Sémdi au vrépe o s'fruchoait* pour éte à chés premières plaches ed chu lanchemint d'chés illeuminations d'Noé à Calais  Qu'al est fin rétuse* cho'v ville ed Calais quante al mile* ed sés leumiéres ed fin d'énée

O s'chambuque* ; o s'étchuse , o croése dés camarates , o vient in famille  Si qu'oz o froéd o maque dés marrons coeuds , du pain d'épiche ; pi o boét du vin coeud . Noé ch'est un momint d'où qu'o s'émerveille dés ti-tchotes choses ed la vie ; un momint d'où qu'oz érvient un éfant . I sroait bien qu'a seuche* pu souvint conme cho ; os voéroéme les choses autrémint .
J'ai idée qu'ch'est pour cho qu'chés festivités is cminch't é-d'bonheur ; ch'est pour inlleuminer ch'l ésprit d'chés gins , et qu'is peuch't* é-rêver .  Édon , i feut ainmer Noé !!!

*Frucher = Se faufiler entre ...
*Rétus(e) = Beau , belle
*Mile = Brille
*Chambuquer = Bousculer , se cogner
*Seuche ou Fuche  = Soit
*Peuch't =  Puissent

Cho 'm mouque sé-séc

In-nhui j'm in vo vous causer d'inne mouque qu'al vit mon ch'poays d'l onc é-Sam !
Oh pour sur eq des mouques vouzote tartous os n'in connaichez étou à houle*  . Mais chélale ch'est eine rére* ; al réste prés dé ch'lac Mono in Californie .

Figurez vous qu'chés mouques la bos is plong'té din ch'lac pi is n'in r'sort't é-tout séc . N'y o conme inne bulle d'air qu'a s'intortille alintour ed leu  corps conme ein éscaphandre . ch'est  qua-minme rédeux* qu'chés mouques is ont quére dé s'n aller din l'ieu ; piq'*j ai tojours cru qu'chés pichons is maquoait't chés mouques . Alorss pér qué sin qu'is s'in vont s'lancher din l'gueule ed chés pichons ; non dés z'os !!!!


*A houle = Plein , beaucoup (Se dit dans le sud de la côte d'Opale )
*Rére = Rare
*Rédeux = Drôle , bizarre
*Piq' = Puisque

Ch'est mie inne éstchuse

Un honme i s'o foait arter *pér chés cadoreux alorss qu'i rouloait à 112 km/h à plache ed 50 din cho'b banlieue d'Toulouse . I l'o baillé* à chés gindarmes eine drole d'éstchuse .

I l'o dit qu'i falloait qu'i rinte rondébilis  à s'baraque pach'qui l'avoait dzoin d'aller... au watére !
A n'est mie 'tonant* , ch'gazier lo i l'avoait qua-minme lapé eune coupe ed pintes . Si taux d'alcool din l'sang i l'affichoait 0.62g .
Est ch'est poin fini ; sin contrôle téchnique i l'avoait dépassé chol date , et i rouloait sans assurance
coér ...lo ch'est l'pastorelle* !!!


*Arter = Arrêter
*Baillé = Donné
*'Tonant = Etonnant
*Pastorelle = Le bouquet

Ed l'heule din chol chinmetiére

Os vous ramintuvez seurmint d'avoèr vu chés fimes Améritchain ouéche* qu'o voét chol chinmetiére* avoéc ed grannes* étindues d'herpes et pi d'z abes tout pértout . Pour nouzote chés Français cha r'sanneroait putôt a ein gardin public .

Bé; figurez vous qu'in Australie ch'est  du minme tonnieu , chés chinmetiére o diroait dés parcs , hormis qu'i-o dés croéx* blanques ed-din . Mais ch'est poin toute , n'y-o étou d'z  oliviers  qu'is pouss'te au miyu d'chés tombes . Pi quante chol saison al est vnue is récolt't é-chés olives pour n'in foaire ed l'heule . Os pinsez bien qu'tout chés boutéles is vind't é-conme dés tchots pains .
Is n' foait't mie d'viux z' os ... si j'peux dire ainsin !!!!

*Ouéche = Ou est ce
*Chinmetiére = Cimetière ( en picard cimetière est au féminin : eine chinmetière )
*Grannes = Grandes
*Croéx = Croix

" DRONE" d'histoére

Un honme qu'i hansoait * conme un viux bidet poussiu s'aboule mon chés policiers du centre Randolph in Caroline du Nord (USA)  . I l'est un molé tourminté à coeuse qué s'fénme al s'a seuvé dé s'moaison ; et impossipe ed l'értreuver . .
És fénme al est pon bien din s'tiéte ; al conme qu'i diroait dés crises ed démeinces . Chés policiers is ont bien inséyés d'cacher après elle ; mais elle s'a lanché * din un camp d' maïs qu'i foait dés kilométes ed long , tout est grand din ch'poays lo !

Édon chés cadoreux qu'is n'mainqu'té poin d'gingin* is ont prins leu drone , pi in moins d-deuye is ont démuchés gra-mère , avoéc du maïs plein sés fouilles !  Bah ! conme cho al pouro foaire dés pop corn !!!!!

*Hanser = Haleter
*Lanché = Se fourrer , s'introduire
*Gingin = Imagination

Macron din chés neiches

Nou présideint i l'o lés boules d'éte din cho'b boule ! Maginez qu'os vous promenéche* din chés rue du Touquet pi qu'os voéyéche vou trogne* din eune boule à neiche ! Un rute cadeau à quiques jours ed Noé os m'avourez !
Et portant a s'arrache conme dés tits pains au chucolat ; tout chés Parigots qu'is viénn'te a Ch'touquet l'week end is n-n acat'te dés chint pi dés mile ! Vlo cmint qu'a s'présinte :
Ch'est eune boule ed 8chintimétes ed diaméte , 9 chintimétes dé heut* ; avu dés titchots flocons d'neiches ed-din . I vous n'in coutera eune dijaines d'Euros ! Os pouvez minme avoér Macron mon l'Elysée !
O peut trouver étou chés boules D. Strauskann ; mais ch'est poin lés minmes;  din chélale y-o poin d'neiche , cha sroait hontabe ed vous z-zés foaire vir ichi !!  

*Promenéche = Promeniez
*Trogne = Visage
*Heut = Haut

Du cangemint din cho'p priére

I feut qu'os l'seuchéche* , qu'a compter du 2 déchimbe l'église al vo rimplacher  "Soumettre " pér " Entrer"  . Din quoé qu'os allez m'dire ! Bén din cho'p priére  : Notre père qui ...
Os n'pourrons pus dire  " Et ne nous soumets pas à la tentation"  . A pértir du 2 déchimbe i feuro dire " Et ne nous laisse pas ENTRER en tentation "

Pi in deuze i feut atuire * ech pére . O dit "Notre pére qui EST aux cieux " et non poin  " Notre pére qui ETES aux cieux "
Que ton nom soit sanctifié , et non poin : Que votre nom soit sanctifié .
Aléa Jacta Est !!!!

Os étoéte bien su Radio Notre Dame radio d'chés paures lazéres !!!

*Seuchéche = Sachiez
*Atuire = Tutoyer

Déméfiez vous d'chés cats

Os connaichez ti bien vou cat ? I sroait ti capabe d'escofier* quéqu'un ?

Ch'est cho qu'cho'p police Japon.naise a s'édminde . Tours est-i qu'is ont ouvert inne inqête pour eune tintatif' ed meurte d'sur eune viéle fénme .
Ch'est cho'f fille qu'al o découvert és mère avu s'trogne* in sang et inne quiriéles d'égratinures !

Paure* fénme à 82 ans , al o du mau d'berdler conme i feut a coeuse d'eune maladie probabe ... Al o du s'n aller à l'hosto pou s'foaire sogner . A intinde dire és fille ,; i sanne à vir qu'édpis* eine coupe ed moés , n'y éroait dés cats qu'is rodayeroait'te alintour dé s'moaison . Chés policiers is pins'te qu'is éroait't pu l'dégriter * . Is sont in route d'anlyser chés traches ed sang su chés greus* d'chés cats .

Os sérez pététe ech bout qu'i vo dvant* din un prochain liméro ...

*Escofier = Tuer
*Trogne = Visage
*Paure = Pauvre
*Qu'édpis = Que depuis
*Dégriter = Griffer
*Greus = Griffes
*Ch'bout qu'i vo dvant = Le bout qui va devant = la suite

Os cantoéte , bén raquez* asteure

Ch'est intindu , oz o mie l'droét d'téléphoner in conduisant , ni ménme ed minger un sanwich* pér égzempe , pi étoiu d'funquer* , cha pouroait déturber* la conduite ...
Est vrai qui veut miu avoér sés deux mains d'poin d'trop otchupées sous peinne ed vous prinde eune contravintion !

Mais la ; canter ! Quoé qu'a put bien déturber ? Bén nan, un Canadien i s'o prins eune prone ed 149$ a coeuse qu'i cantoait din s'n auto . Chés cadoreux is ont dit qu'i gueuloait d'trop fort din s'n auto !
Nan mais o voéro d'toute . Un bieu jour i feudro poin réspirer d'trop fort . O sait janmoés hein !!!

*Raquez = Payez
*Sanwich = Sandwich
*Funquer = Fumer
*Déturber = Perturber

Mais d'ou qu'is sont chés Italiens

Qué décarsure , eune coupe du monne sans chés Itaïens , l'Italie a n'sro mie à cho'c coupe du monne mon chés Russe l'an prochain . El darin* coeup ch'étoait din z'z énnés 50 i m'sanne !
Bréf , ch'est rére eq chés ritals is n'i jut't é-poin !!  Quoé qu'i s'a passé ?

Seuche eq chés Suédois is ont té vraimint boins . O bien chés attaquants Itaïens z'ont été boins à rien !
J'ai idée qu'ch'est chol deuziéme réponse ; pisque quante os avez un attaquant Itaïen qu'i s'appelle ... IMMOBILE ...feut mie s'attinde à ch'qu'i seuche granmint arvleux* ; ti poin vrai !!!!!  PDMM*

*Darin = Dernier
*Arvleux = Fougueux , Nerveux
*PDMM = Piche Din Mes Maronnes  ( C'est le LOL ed chés Picards )

Ch'pape i l'est in rogne

Sié ; ech'pape i est r'monté conme eune pindule avoéc un r'sort in bos !  I n'n a pér après chés fidèles pi minme dés prêtes .
Durant cho'm mésse plache St Pierre edvant des milliers d'gins ; au momint d'où qu'éch Pape i dit : " Elevons notre cœur " A plache ed vir chés fidèles prier , quoé qu'ch'est qu'i voét ...Dés chint et des mille ed téléphone portabe qu'i l'prind'te in photo .

Elevons notre cœur !! Ej n'ai poin dit  " Elvons nou téléphon.ne " crénon dé boé !!!!!
Tout cho est moche qu'i l'o déclaqué ch'pontife ! .............ALÉA JACTA EST

Attaque d'aliens din un ranch

In 1995 un coupe d'Améritchain ed l'Arizona sont dévnus proprio d'un ranch aveuc din l'idée d'foaire un r'fuge pour chés bidets . Mais a n's'a  poin passé conme prévu .

Edpis eune vingtaine d'énées is combat'te chés éstraterrestes . Is dit't éq chés tchots bonhonmes évnus d'la heut is veut'te éz-z inlver .  Réyus *, ténés d'inne affoaire paréle is ont mis leu ranch à vinde . Achteure i s'appelle l'alien ranch ... . Pi avoéc tout cho'p publicité qu'al o té  foaite su chés éstratérrestes , chu ranch i l'o rinquérit * , i l'est à vinde chonq millions d-dollars .
Alors' si os avez mie lés freus* d'chés bonhonmes verts ; acaté l-lé !!!!


*Réyus , ténés = Fatigués
*Rinquérit = Pris de la valeur
*Lés freus = frayeur

Chonq fruits et lédjeumes

Un jour din eune achuchon d'chés alcooliques anonymes , eune quéstion al est posée à chés gins pour savoér quoé qu'is n'in pinse'te qu'i feuche mier chonq fruits et lédjeumes pér jour !
Mi qu'i dit ch't honme au fond d'cho's salle ej n'in minge tout lés jours des fruits et lédjeumes , ej mets :

Du rojin du min vin
Dés peumes din l'Calvados
Dés prones din l'ieu d'vie
Dés chriges din ch'quirsh
Et dés peumes é-terre din la vodka

Chés tchuls nus mon ch'réstaurant

Bé lo ch'est toute ! Vlo qu'achteure os pouvez aller mier à chu réstaurant ...nérnus *.
Cha s'passe à Péris din eune boutique avoéc éne devanture qu'a n'foait poin pérler d'elle , dés gros ridieux , pi dél nourriture végan , éq chés tchuls nus is s'in pourléqu'te .

Chés pratiques * is doét't é-laissier leu z'habits à ch'véstiaire , is resteront nérnus dusqu'a la fin d'chu r'pas , mais aveuc dés pantouffes din lei piés !   O n'peut mie z'z impécher , cho'l loé a dit 2 choses :
I feut qu'chés gins is seuch't é-mucher du déhors . Et qu'chu pérsonnel ed tchuisine i seuche atiffé* . Din ch'réstau qué j'vous pérle chu pérsonnel ed salle i sro habillé étou * . Sin cha j'vous laiche adviner ouéche* qu'is éroait't mis cho'c carte , si qu'is éroait't leu mains d'otchupés !!!

*Nérnus = Nus
*Pratique = Client
*Atiffé = Habillé , accoutré
*Etou = Aussi
*Ouéche = Ou est ce

Un molé d'trop arousé

Bén li au moins sin départ i est réussi , tout du contraire ed chés trains ... Un peu d'asplique ! Un ageint d'la SNCB ( chés écmins d'fer Belge) i l'o poayé un coeup à boére pour sin départ in r'traite , conme chés gins is sont adités* dé l'foaire din n'importe é-quelle fabrique .

Hormis qu'la chés buvatries i leu z'ont éternisé , cha n'in finchoait pu , a tél poin qui n'y-o yeu 1 train d'annulé , pi un  eute a l'atarge* .
Chol SNCB al o ouvert inne inquéte . Asseuré qu'os ons l'droét d'fêter un départ in r'traite ; mais feut qua-minme quiqu'un pour prinde sin quart * !

*Adités = Habitués
*A l'atarge = En retard
*Quart = Periode de travail de 4h (souvent chez les marins pêcheurs )

Intérré avu s'moto

Qué décarsure ! Occir* conme cho à 46 ans d'un accideint d'moto su chés routes . Ch'est ch'maire qu'i o dû l'annoncher à cho'f fénme qué s'n honme i l'avoait défuncté .
Mais ch'maire i l'o réspécté chol darinne volonté d'chu défunt ; qu'étoait dé s'foaire intérer avu s'moto .

Eune premiére in France . Toute i l'o té foait din chés régues ; cho'b bécane al o té dépolluée et mis din eune boéte étanche aveuc tout chés agobilles* ed motard .
Daucuns diront : Écmint qu'i fro pour s'incrinquer d'su ?! Mi j'dis qu'i vo s'tribouler* tout seu ; bé o n'o mie dzoin d'parsonne in Harley Davidson !!!!!  Ed tout sin , ch'est eine Yamaha !

*Occir = Mourir
*Agobilles = Objets divers
*S'tribouler = Se débrouiller

Cangemint d'heure

J'ém raminteu quanq'os étoéme in 1999 pu précisémint el 31 décémbe , est vrai qu'cha r'monte à y-o granmint d'temps tout cho ! Mais tartous os avoéme yeu peur dé ch'qu'oz apploait a l'époque euch "beugue ed l'an 2000" .
Finalmint a s'o passé conme inne létte à la poste . Pi lo non dés z'os quoé qu'j apprins din chu jornal qu'i n'y-o yeu eine gronnée* d'automobisses bloqués à cho'b bérriére ed péache ed Tain l'Hermitage , Valence nord et sud ; et Montélimar nord , pi sud étou su l'A7 pér nuit d'"Sémdi à diminche , a coeuse ed chu cangemint d'heure . Ben lo ch'est l'passe-route* ! oz cange ed siéc i s'passe " que dal " Oz cange d'inne heure , ch'est l'bren min cousin !!!

*Gronnée = Beaucoup
*Passe-route = Le bouquet

Whisky à 8500€ ch'verre (suite)...

Asseuré qu'j én su poin duit* d'vous conter dés carabistouilles . Tout chés infos qu'éj vous donne is sont sartifiés véritabes . Stapindant* i peut y avoér eune bérlure qu'a s'gliche à mzure .
Pi quante cho'g gazette al corrige és n'erreur , cha foait m'balle* .
Édon , os vous ramintuvez ti n'y-o éne coupe d'ésmainne ej vous dvisez qu'un chinoés i l'avoait dégusté un whisky " Macallan millésimé 1878 à 8500 € ch' verre " a St Moritz (Suisse)

I sanne à vir qu'i l'éroait putôt lapé un whisky conçu 1 siéc pus térd intre 1970- 1972 .  Austôt* qu'i l-l'o su ech directeur i l'o prind ch'l aréoplane pou s' naller mon chés Chinoés et rimbourser ch't honme . Pi étou pour foaire vir au monne intier eq chés Suisses is sont honnêtes et qu'is rapine't*-é poin chés gins !!

*Duit = Habitué
*Stapindant = Cependant
*M'balle = Mon affaire
*Austôt = Aussitôt
*Rapiner = Voler

Al mainque poin d'air !

Atandis qu'dés gins is luron.noait'te* el long dé ch'canal du Midi à Toulouse , i leu z'o sanner* vir un corps humain qu'i flottoait !  Ahite* ahite  is appel'té chés pompiers qu'is s'aboul'te rondébilis-* mie loin dé ch'boulevard Riquet pour chétlo qu'is connoait'te .

Is n'ont poin mie longtemps à démucher eune masse rose ; à l'aide d'inne pérque is l'l'ont ratriné* vers ech bord . Pi lo chés pompiers is risot't-é din leu bérbe in voéyant qu'is étoait't in route à seuver inne "poupée gonflable " !! Ouf ; pu d'peur qué d'mau . Achteure chés pompiers is peut't-é souffler . Soin ; poin din cho'p poupée !!!!!

*Luron.ner = Errer sans but précis
*Sanner = Sembler
*Ahite = Vite
*Rondébilis = Rapidement
*Ratriné = Tirer vers soi

Ch'caleindrier d'l avént

Ah pour sur qué ch'l arméno* d l avént i porte é-bien sin nom ; mie possibe qu'i dviénche ech caleindier d'l après !
A peinne Halloween décanillé* eq j'ai déjo eune tiéte conme eine chitrouille d'intinde brouire* tout partout  " Noé pér chi , noé pér lo " . Din chés grands magasins chés gins is foait't édjo leu course grace à chés catalogues qu'is ont r'cheu din leu  boétes à lettes .
Chés rues is sont djo toute inlluminées . Chés guernouilles * is rêv'te éd z'habits d'princéche " Il était une fois " Pi chés pérents " Il étaoit une foi(e) ...gras" .

Ed quoé dévnir complétmint DINDE  . Fuche , du momint qu'is acat'te ch'est boin pou l'économie .
Mais surtout qu'is n'oublich't é-poin chés  tchotes boutiques du centre-ville . Népoint !!

*L'arméno = Agenda , calendrier
*Décanillé = Parti
*Brouire = Bourdonner
*Guernouille = Grenouille ( employé ici pour petite fille )

Un verre cha va , quarainte six ...

Écmint foaire quanq'os éte maite d'hôtel pour drécher eune tabe pour 46  parsonnes ?
I feut i n'in foaire ed 'z allérs  et r'vient* edvant quand seuche fini !!  Din les Vosges , a chu salon du mériache à Art-sur-Meurthe , n'y o un maite d'hôtel qu'i n'foait mie d'imbaros avoéc tout cho .

Li i prind chés 46 verres d'un coup avoéc eune seule main , i l'o battu chu r'cord du monne qu'i l'étoait ed 39 verres .
J'ai idée qué ch't honme lo ; i doét poin user granmint sés keuchures !! Ta miu pour li !

*D'z allers  et r'vient = Allers  retour

Du tchul pi bien s'jouquer

Jou qu'os foaisez pérti d'chés gins qu'is croét't é-qu'd avoér granmint d'érgint cha peut vous rinde pu heureux !! Est pourtant acoutez bien cho qué j va vous dire . Éslon* l'institut d',Oxford Economics in Ingleterre , chés gins lo is dit't qué d'foaire souvint l'amour pi d'avoér un boin sommé* , sroait bien pu racachant* éq d'avoèr granmint d'pécaillons * .

Est mie diu croéyabe , cha veut dire éq chés gins is ont puss quére éne boéne pértie d'gambes in l'air , pi ben deurmir , putôt qué d'vir leu quinzaine rinquérir * ?!
Os voulez qué j'vous dise inne saquoé , j'croés qu'is ont roaison !!! 

Éslon = Selon
*Racachant = Meilleur
*Pecaillons = Argent
*Sommé = Sommeil
*Quinzaine rinquérir = Salaire augmenté

Ste Thérèse connectée

I falloait  treuver éne saquoé* pour sétchuriser chu transport ed chés pécaillons d'cho'b basilique Ste Thérèse ed Lisieux din l'Calvados .

Ch'coeup i est foait , achteure chés fidèles is peut't acater dés cierges d'sur un tchot cassis* connécté . Os coésichez chol taille pi os poayez inter 2 et 10 € avu vo carte é-d'paimint sans contac* qu'os aplachez à ch'boén indroét su ch' l écran . Édon , chés sous is quait't é-diréc su ch'compte bancaire dé ch'sanctuaire .

Aléa Jacta Est !!!!

*Saquoé = Quelque chose
*Cassis = Carreau , désigne ici un écran
*Sans contac = Sans contact

Pardu din chés mérs

I l'est bien temps d'mette és main à sin tchul quante ech pét bréneux i l'est sorti!
Ch'est l'mésavanture ed deux Améritchaines et leu tchien qu'is ont queu*in raque ed moteur ed leu voélier in plein miyu du Pacifique inter Hawaï et Tahiti  deux moés pér après éte pérties  .
Pi ch'est deux hocleuses * lo , is ont cru qu'is pourroait'té finir leu traversée aveuc chés voéles pour érjoinne Tahiti ! 

Oué du chuque !! Voéyant qu'is n'aboutoait't neune Pért ; i s-sont einfin décidés après 4 moés din chés mér d'invoéyer des " S.O.S " . Edon i l'éro fallu un moés à cheul US Navy pou z-zés r'treuver .

Soin ; à chés gins qu'is confond'te ch'l océan avuc chu lac Ed Genève !!!

*Queu in raque = Tombé en panne
*Hocleuses = Folles

Ej t'as quére

 Eume fénme à s'plaind toudis qu'j-i dit janmoés je t'ainme !
Ej j'i rinfique : Ej té l'ai dit quanq'os nous sonmes mériés , si j'cange d'avis ej t'él frais savoér !

Daucuns diront qu'ej su t'un monste ; ben quoé cha n'est mie drole d'éte un monste ,  piq'ch'est Halloween in-nhui !!!!

Chu grand sapin bérzillé in deux

Is n'avoait't é-coér jamoés subi péréle décarsure *. Chés ageints cargés* d'apporter chu sapin d'Noé su cho'p plache Kléber dé Strasbourg .

Conme chaque énée ch'l abe d'eune trintaine ed métes i l'o été copé din cho'f foérét Vosgiéne .
Adon , pour chu l'vage *is n'ont mie rincontré d'imbaros , mais ch'est au momint d'l érdrécher  pour el baler din cho'r remorque qu'i s'o bérzillé* in deux . Bin atombé qui n'y avoait un "plan B" . Un deuziéme sapin Vosgien étou , i sro étampi* inter ech 31 octobe pi ch'deux novémbe .
Os m'avourez qu'un sapin qu'i s'berzille , n'y-o d'quoé avoér "les boules " qua-minme , Nan !!!

*Décarsure = Malheur
*Cargés = Chargés
*L'vage = Levage
*Berzillé = Cassé , Brisé
*Étampi = Dresser

Allé , nife Lulu !

Ch'est l'histoère ed Lulu chu labrador qu'i l'étoait né pour nifler chés bombes ; i l'o été intrainé pour cho , pér chu cente canin ed l'ageince ed reinseignemint  Ameritchaine ..

Din cho'm meute ch'étoait li ch'pu boin , ech crake . Mais i sanne à vir qu'pér après avoér passé eune coupe ed moés su ch'terrain ; Lulu n'o jamoés prétindu nifler el moindré-bombe .
J'ai idée qu'i l'étoait foait pour guider chés avules *; pour seur qu'i l'étoait foait pour eine eute vie .

*Avules = Aveugles

Halloween mon chés Grands Bretons

L achuchon Inglish Héritage al o classé chés 10 sites qu'is fout'te el plus les freus* pour prépérer halloween .
Dés spectres qu'is pass'te au travers chés murs ; des brailleries à vous glacher vo sang , dés rires d'éfants vnus d'neune-pért* .  Chu premier prix i l'arrive à chés 1800 ouvriérs dé ch'catieu ed Bolsover bati d'sur eine viu chimtiére dé ch'17ém siéc . Deux ouvriérs ont té éffoayés pérl'aparition une fenme et qu'al o disparu austôt*à travers ech mur .
Coér inne eute à vous foaire froéd din l'dos ; chés ruines dé ch' catieu médiéval ed Kenilworth ou rodaye* el fantôn.me d'un jone garchon courant din chés étchuries , pi d'eune fenme et sin tchot papar din sin bér* qu'i s'balanche tout seu !

*Freus = La frousse
*Neune pért = Nul part
*Effoayés = Effrayés
*Austôt = Aussitôt
*Rodaye = Roder
*Bér = Berceau

J'foais RICARD in deuxiéme langue

Bé , n'in vlo d'un eute ! Chés blouses blanques Britanniques et hollandaises is ont foait un tést d'sur eune chinquantaine ed gins .
I sanne à vir éq chétlo* qu'is avoait't chiqué* un molé d'alcool is s'froait't é-miu comprinde pér leu z'interlocuteurs din eune langue étraingére , raport à chétlo qu'is n'n ont poin bu eine goutte , surtout su cho'p prononciation .
J'sais poin si j'a été bien clair , ou si pour vous ch'est clair conme du ju d'chique !  Adon cho qu'i feut n'in r'ténir ch'est qu'o bérdéle* miu din eune langue horzainne* quante oz est un molé  brindzingue ; eq quante oz o rien lapé .

*Chétlo = Ceux la
*Chiqué = Ici employé pour : Boire
*Berdéle = Parler
*Horzainne = Etrangere

T'as boéne "mine "

Tchiéche ? Mi ,? ...Nan, j'én vo poin ichi vos dviser dé m'bobéne* ; mais putôt d'chés mines ed craihons* . Os vos ramintuvez ti n'y-o eune coupe ed moés j'avoais foait un billet su chés chocolatines , éq din ch'Nord o dit dés pains aux chocolats , voér ménme dés tits pains aux chocolats .

Al pointelette* din cho'g gazette j'ai li qu'is r'lanchoait't el débat , mais ch'coup chi d'sur chés craihons d'bos , conme os ons tojours dit din chés Heuts d'France , et pi chés craihons d'papier conme is dit'té din ch'sut' .
Mi , vlo dé s'qué j'n'in dit ; ch'est qu'chaque région al doét warder sés éspressions  . A ti du sén* d'vouloér s'ersanner tartous !?  Chaque poéys chaque mode ; chaque tchul chaque crotte !! 

*Bobéne = Bobine ( figure)
*Craihons = Crayons
*Poitelette = Pointe du jour
*Sén = Sens ( prononcer : sin )

Leu baraque n'o pu "la frite"

Ch'qui dvoait arriver a s'a passé !
Portant tout i l'avoait bien cminché : Eune baraque à frite à Marck à coté d' Calais , un coupe un honme pi eune fénme fin amiteux n'ergardant poin à l'ouvrage  Os étoéme à ch'l ernouvieu ch'est lo qu'ech coupe is ont yeu l'visite d'eune équipe pour torner un fime*
Os éroéme édzoin* d'vou baraque à frites pou un tournache qu'i déclaque ech producteur . Is s'métt'té d'accord su l'coin d'inne tape avoéc inne boéne bistouille pi  quéques signures * ; et  ch'coeup i est foait , adé os nous r'voérons dix jours edvant ch'tournache à l'après eut .

Durant chés bieux jours in juhiet ch'coupe i décide ed rindimincher* leu baraque à frites (pinsant bien foaire )  . Pour seur qu'al est fin bélotte asteure  , mais a n'érsanne* pu du tout à l'eute . Quante ech l'équipe ed tournache al est r'nue à l'après eut* , pi qu'is ont vu chol nouviéle baraque , is n'in sont réstés conme 2 ronds d'flan . A n'foait poin domino qu'i dit ch'producteur , vo baraque achteure a n'foait pu assez régionale , cha n'vo mie aller , os n'frons poin affaire insanne .

Al fin des fins , tout cho'c clique dé ch'fime , is ont té* queur eune baraque à frites  (bien ch'ti chélale) du coté d'dunkeque . Vlo , o peut r'tirer ch'l équelle !!!
J'ai r'traduit ch't artic in Picard à coeuse éq j'in ai plein l'tchul ed vir eq nou région ( chés heuts d'France) al érsanne ed pus in pu à l'Ile de France
Edon , j'én foais poin pérti ed ceuss qu'is dmind'té l'indepindance ed chés heuts d'France ; mais WARDONS NO IDENTITÉ ... Sans vos cminder !

*Fime = Fim
*Edzoin = Besoin
*Signures = Signatures
*Ridimincher= Embellir
*N'ersanne = Ne ressemble
*L'après-eut = L'automne ( après août)
*Té = Été

Congés pour sogner sin tchien

Probabe qu'a vous euche é-djo arrivé dé dvoér quitter vo ouvrage , o bien carrémint dé n'poin y-aller pour méner au pu rade* inne gin d'vo famille à l'hosto pour inne urgeince ; pi os foaisez passer  cho pour un ou deux jours ed congés .

Mais , mon chés Itaïens is foait'té coér miu ; la bos os pouvez prinde un jour ed congé POAYÉ pour sogner obien foaire sogner vo tchien ou vo cat , qu'importe .  I feut dire éq din cho'b botte*ch'est un poays adou qu'chés bétails ed compannie is sont roés* .
Eune premiére in Italie salué pér cho'l ligue ed protéction d'chés bétails !!

*Rade = Vite
*Cho'b botte = L'Italie
*Roés = Rois

Falloait y pinser

Mon ch'réstaurant cha sroait pététe pu aisié d'abolir cho'c carte é-dés vins , a plache éd nos foaire passer pour des crétins qu'is n"y connaich'té rien .  Tant nos donner ch'menu avoéc un probléme ed TRIGONOMÉTRIE  !!!

Feut mie gadrouiller

Si un jour os vous pointez din un réstaurant pi qu'ech garchon d'salle étampi d'vant vouzote droét conme un potieu et qu'i vous déclaque :  Os avez ti coési , cha sro ti du  S . M . L . XL. !!
Seuchez qu'os n'éte poin obligé d'i rinfiquer*  " voéyelle "  . Nan , cha n'est poin un ju , si ch' serveur i vous dminde cho , ch'est pour qu'os coésichéche * el grandeur ed vo z'écwuéles * , ch'est slon si os avez boén accion* ou poin , ch'est pou n'poin jéjter d'trop à cho'p poubelle .

Et cha marche pisqu'au bout d'él jornée i garotte un so* d'déchets à plache ed troés edvant avu d'z assiéttes normales !
Os coéyez ti qu'avu ch'café is off'té dés " M&M'S ?

*Rinfiquer = Répondre
*Coésichéche = Choisissiez
*Ecwuéles = Vaisselles en général ( ici , assiettes)
*Avoér ed l'accion = Avoir de l'appétit
*So = Sac

Dintifrice bleu , ch'est un fiu !

Os n'sonmes portant poin ch'preume d'avri !
A coeuse qu'éj vous dit cha ! Maginez qu'amon chés grands Bretons * , dés fenmes utilisroait'te un dintifrice éspecial blanc pour vir siq' is n'n éroait'te poin pour leu 36 mardis* !

Ecmint qu'is foait'te ! Ch'est simpe ; is prind'té un dintifrice blanc éspecial , probabe qu'is vont  l'queur  mon ch'l apothicaire , après is touill'té toute aveuc un molé d'pichate , pi si ch'mérlicoeudache* i cminche à mousser pi torner à cho'c couleur bleuse , ch'est qu'cho'f fénme al est pékéye * !
Is sont complétmint brake chés Inglés . Tous chés blouses blanques * sont in foufelle d'intinde éne saquoé paréle .
Marchez mes gins , aveuc des jus paréle cha n'est mie 'tonant qu'i o gramint d'tchote filles mon chés Inglés qu'is délonme'te ... CARIE !!!!!!!!

*Grands Bretons = Anglais
*En avoir pour ses 36 mardis = Les 9 mois de grossesse
*Mérlicoeudache = Mélange douteux
*Pékéye = Etre enceinte . Surtout utilisé sur la frange littoral  de Boulogne a Berck
*Blouses blanques = Corps médical

Sans fu ni liu*

In -nhui os érez deux histoéres pou l'prix d'eune ; deux histoéres ed sans fu ni liu !

In preume ; chu champion d'tennis N. Djokovic ; os l'savoéte ti vouzote qu'i l'avoait 2 restaurants ?  Un à Monaco pi l'eute in Serbie . Figurez vous qu'i vo n'n ouvert un troésiéme in Serbie étou .
Mais ch'est un résto qui sro foque pou chés sans fu ni liu ; pi tou* pour chés paures lazeres*, is n'saqueront poin un dar ed leu poke .  merci Djoko , ch'est bieu cho qu'tu foais ; tout l'monne n'él foait poin .

********************************************************************

In deuze,  os nous in allons à Rouen . Cho'v ville al o décidé ed bouter* din chés rues dés tchotes é-boétes pou qu'chés sans fu ni liu is peuch'té laissier leu z'habits , leu carnasse , pi tout ch'restant sains avoér lés freus dé s'foaire déroufler* toute piq'chés boétes is  s'freum'te  à doublé-cadenas
Ch'est l'premiére foés qu'o voét cho in France ; n'y avoait djo dés "bagageries" mais ch'étoait dins eune piéche , hormis qu'lo ch'est din chés rues !

Vlo ; ch'est toute pour in-nhui ; deux biéles idées pour chés paures lapides* qu'is vont mie l'avoér belle , a coeuse éq chés courts jours is arriv'te au grandissime galop !

******************************************

*Sans fu ni liu = SDF (Sans feu , ni lieu)
*Tou =  (é) tou  = Aussi
*Lazéres = Malheureux
*Bouter = Mettre
*Déroufler = Voler
*lAPIDES = Misérables

El cricket amon chés six Bourgeois

Dins chés Heuts d'France os cminchons d'vir s'abouler el cricket . Soin *! Poin chu titchot bétail qu'asteure o maque à l'apéro . Nan, ej vous pérle ed chu sport , o n'in voét à Lille , Arras , St Omer , pi vlo qu'a s'améne à Calais .

Ch'l idée al o gérmé dins l'cawoétte ed Caroline Garbe qu'al étoait maristresse dins la "jungle" . Un bieu jour alorss qu'al ransoait* din ch'parc St Pierre à Calais , al o vu eune coupe ed migrants qu'is s'éjuoait't à chu ju* d'cricket , voéyant qu'is y étoait't adités* , Caroline al o yeu l'idée ed créer eune achuchon* d'Cricket mon chés Calaisiens pi dé dminder à cho'm maire MM Bouchart si qu'is pourroait't juer su chu stade du souvenir a côté d'cho's citadelle .
A m'a l air d'éte un bieu sport , mais j'n érbéye mie chés matchs piq 'j én comprins poin toute ! Est poin aisié .

*soin = Attention
*Ranser = Se promener
*Ju = Jeu
*Adités = Habitués
*Achuchon = Association

Cha déboque in prison

I n'n o qui n'mainque poin d'gingin !  Cha s'passe amon chés Brésilliens .
Maginez eune baraque avoéc à coté un treu gros conme inne vaque , pi au loin , mettons à six chint métes cho'b banque ed Sao Paulo . Chés cadoreux is ont évité ch'casse du siéque .

Seize rastacoérs* avoait't mis chatchun 200 000 € pour n'in récouer * 270 millons d'Euros , si ch'plan i s'éroait déroulé conme i feut . Adon chés gindarmes is ont vite comprins qué ch'treu i déboquoait din cho's salle du coffre é-fort .
Chés cadoreux is n'in sont réstés béc é borne ed vir un tube* ed 600 métes  acouftés d'planques ed bos à ch'plafond ; et pi un ageincemint d'éclairache éléctric pou s'déhaler sains s'inchper din ch'fourbi . Pour n'in définir , tout cho'c clique al s'o r'treuvé in gayole * .

*Rastacoérs = Individus peu recommandables
*Recouer = Recuperer
*Tube = Employé ici pour dire tunnel
*Gayole = Cage , ou bien prison

Chés pu boénes érchettes ed chés quartiers

Écmint foaire pour foaire mier d'z alimints BIO o bien du poéys * sains dépeinser s'quinzaine à dés gins qu'i reste alintour ed chés grannes villes ...chés banlieues conme o dit asteure .
Cl achuchon* VRAC al o yeu l'idée ed déssaquer * un live écrit pér éch guégnant du Goncourt 2011; un live avoéc 15 plots * tchuisinés pér 15 fénmes ed chés quértiers populaires ; d'égzempe :

Chés feules ed vigne pi chés lédjeumes farcis . Chés cornes éd gazelle . Ch'watieu ed foé d'glaine . Dés paupiettes sérvies aveuc chu dome ed Djerba . Et un riz D'feules à popéye* .
Non d'eune pipe , qu'a doét éte boin tout cho !!!

*Poéys = Utilisé ici dans le sens de cultivé localement
*Achuchon = Association
*Déssaquer = Sortir
*Des feules à popéye = Des épinards ( Hummm , oué bon c'est lundi ) !!!!

Chés Awards pou ch'cat

N'y-o gramint d'Français qu'is ont un cat à leu moaison . Pour se foaire chu chérque* félins du Languedoc i l'o ahansé* un salon Européen pour chés cats su ch'théme dé ch'noér et blanc
I n'y éro étou inne sécant* d'animations : Présintation d'chés races , un molé d'ayude su l'toélette ed chés cats ; un stand su chés maqueries , pi tous chés agobilles* pour chés matous .

Al fin dés fins , i-y éro cho's cérémonie dés Awards pour récompeinser ch'pu bieu cat d'Europe .
Pu d'chinq chon * cats d'Europe pi d'chés states is sront ziutés pér des juges internationals

*Chérque = Cercle
*Ahansé =  Employé ici dans le sens d'organiser
*Sécant = Beaucoup
*Agobilles = Objets
*Chinq chon = Cinq cent

L'Albi n'foait poin l'moéne

Cha foait djo inne coupe d' énnée eq troés jones gins d' Albi dins l'sud ouest qu'is organis'te chu salon du "vintage 81 " avoéc dés cabénes* adou qu'o peut démucher d'z écwéles * , dés loques , dés diskes ed chés énnées 1950 à 1980 .

Mais ch'ténnée n'y-o du nouvieu ; vlo ti poin qu'is veut'té foaire ech premier champion.nat du monne dé ch'pull el pu affreux , n'y éro un concour pour chés tchots , et pi eine eute pour chés grands mais n'y éro qu'un guégnant .
Alorss ; allez jéjter un ziu din vo z'amères* ; probabe qu'os avez un viux pull qu'i traine qu'y-o té*  tricoté pér vo mémére , népoint* !!!

*Cabénes = Cabanes ; ici des stands
*Ecwéles = Vaisselles
*Amères = Armoires
*Té = Eté
*Népoint = N'est ce pas

Poéyer chés raques

Din l'temps , quant oz étoait déclaré jone honme et pi qu'oz alloait vir la fille d'un village horzin pour el premier coeup , chés jones honmes i voz aclipotoait't in vos disant :  Os tu poéyer chés raques ?

Oz savoait ch'qu'a voloait dire . Ch'étoait inne tornée générale à ch'bistrot , et pi l'meilleur moéyin d'éviter chés histoéres pour povoér y r'torner sans innuis , si o nn'avoait coér l'intention . Etoait un molé vrai étou , point ? O leu prindroait un molé leu pain ! Ch'étoait inne régle .

Chés raques is étoait't grattées pér ech cantonnieu , et pi vindues un ou deux coups din l'énnée pér la commune . Etoait boin pour chés gardins .A rimplachoait du fien , pi ménme qué d-dins chés cotes i l'étoait vindues pu tchéres pasqu'il étoait't pu boénes , pour el raison qu'y avoait d'plus éd crottins n'din : Ch'étoait tojours in montant qu'chés bidets i débouroait't !

Conme din ch'temps lo o voéyageoait aveuc des coeuchures à cleus , oz étoait sinsès  d'ratrineu dés raques à sés solés . Ch'est d'lo qu'a vnoait ch'l aminde : Poéyer chés raques .


L. Devismes

Numéro d'cirque

Un honme s'aboule dins un grand cirque fiér conme un tchot banc . I dminde à chés saltimbanques si i peut s'édviser avu chu directeur ; oz li indique chu cmin , in heut au fond dé ch'colidor 2ém porte à main droéte .  Cha quai a dréme* chu directeur i l'est otchupé à rien .
Ej vous acoute qu'i dit ch'patron ...

- Ej viens ichi vous proposer un numéro qu'os avez janmoés vu !
- Ah , os m'in direz tant ; ed quoé qu'i l'in r'torne ?!
- Vlo . Ej foais eune dijaines ed voltiges su min trapéze pi j'ém laiche quair su m'cawoéte ed 20 métes dé heut et j'me rétampi sains eune affolure et j'salue chu public .
- Humm ; ej vouroais bien vir un ju parél , prindez chu trapéze dins ch'racoin la bos ; pi inroéyez*
Ch't honme i s'éliéfe* d'eune vingtaine ed métes , i cminche à tornicoter d'un séns et d'l eute ; pi au bout d'eune vingtaine dé sgondes i r'déchind et tout moneu , tout péteu i déclaque :
- Finalmint j'a réfléchi ...cha m'fro d'trop d'mau !!!!!!!

*Cha quai à dréme = Ca tombe bien  (loc)
*Inroéyez = Commencez
*S 'éliéfe = S'éléve

Courses ed bérbis

Quante os comptez chés moutons dins vo pajot* pour vous indordler * . Jou qu'chés berbis is march'te o bien is coéur'te*??. Oué , os vous in foutez , cho qu'i compte ch'est qu'os vous indordléche , ej vous comprins .

Ej dit cho a coeuse qu"amon chés grands Bretons* , n'y o eune fenme qu'al o réussi à foaire annuler dés courses ed bérbis . Al dit qu'chés bétails lo is n'sont mie foait pour coeurir , chés dés bêtes timites et trainquilles .
Du contraire , n'y o un honme qu'i éléve dés maguettes et li i rinfique eq chés moutons is ont quére ed coeurir ,i dit étou qu'chés tchots d'"bérbis is pass'té leu temps à s'poursuire* l'un l'eute et qu'leu pérents is coeur'te   dé ch' l érnouvieu  dusqu'a ch'début d'chés bieus jours !
Vraimint , ed quoé qu'j 'ém mêle !
- Mêêêêê
-Y-o poin d'mais .....

*Pajot = Lit
*Indordler = Endormir
*Coeur'te = Courent
*Grands Bretons = Les Anglais
*S'poursuire = Se poursuivre

busiez la d'sus

Un ageint doube i n'doét jamoés avoér reindez-vous avuc sin doublé-pérsonnache au ménme indroét . Sin cha , i risqué bien d's'értreuver tout seu aveuc li ménme dins un liu différeint !!!

Boin diminche à tartous !

Poin d'barbus din la vélocypéde

Chés coureus d'eune équipe Bélge is pourront pu porter cho' barbe !  A coeuse eq chu directeur sportif i dit qu'cha n'foait poin sogné , poin bieu du tout " Eune mésure pour l'élégance du cyclisme " qu'i l'éroait déclaqué !!

Os n'sonmes mie dés jueux d'rugby , o bien dés pilotes ed moto cross ; aveuc dol nase* pi des maqueries* péqués din cho'b barbe , cha foait crapi !!!!  

Stapindant* chu directeur sportif i n'est poin conte eune barbe ed troés jours !! 
Dautchuns* diront qu'i nous " barbe " chu directeur !! Népoint !

*Nase = Morve
*Maqueries = Nourritures
*Stapindant = Cependant
*Dautchuns = Certains

Lanché d'tchugnies*

Soin dé n'poin vos foaire scalper si os passez dins ch'quartier d'la goutte d'or à Péris  . N'y-o un type qu'i vient d'ouvrir eune salle ouéche*qu'o peut lancher dés tchugnies .
Ecmint qu'o foait ? Est simpe os prindez inne tchugnie ed 700g , os vous plachez à boéne distance , pi os dvez planter dins un cerque traché au pochoér ed 10 à zéro .

Pi après os juez conme à chu ju d'fléchettes . Ch't honme qu'i l'o ouvert cho i l'est né natif du Haut Doubs , cha n'est mie tonant qu'i l'o yeu ch'l idée piqu'ch'est* ch'poéys d'chés bocagniers !*

*Tcugnies = Haches
*Ouéche = Ou est ce
*Piq'ch'est = Puisque c'est
*Bocagniers = Bûcherons

Ch'déroufleu

Ch'est deux camarates qu'is dvis'te insanne , ch'premier i dit à l'eute :

- Bé , i mé n'n o arrivé eune boéne cet été in vagances , Figure té qu'os ons pardu no carte-dé crédit
- J 'éspere qu't os été porter plainte qua-ménme !!?
- T'es badeux o bien quoé ! Porter plainte , seurmint poin ; ej su seur et sartain qué ch'tilo qu'i nos l'l o volé , i n'pourro janmoés dépeinser plus qué m'fénme !!!

Marles et fumélles

J'va coér vous pérler d'chés Hollandais . Décidémint is n'foait'té rien conme éz-z eutes !
Ch'coup chi ch'est dins chés z'habillures qu'is foait'té pérler d'eux
Chu magasin HEMA i l'o décidé qu'chés étiquettes su chés z'habits d'chés tchots , adou qu'ch'est mérqué pour " filles" et pour "fiu" is sroait'té bouté à l'ouste* .  Achteure i n'y éro foque* qu'eune granne piéche  réservée a chés "éfants" .

Si eune guernoule al veut s'atifer * avoéc un molé plus ed caractére , al pourro  . Atchun i fro à s'mote ! Soin* , tout cho est fin bien à condition qu'chés pérints is laich'té coésir leu margats ! Ti poin vrai !!

*Boutées à l'ouste = Jetées dehors
*Foque = Seulement
*S'atifer = S habiller
*Soin = Attention

Ché métçins n'sont poin dés coulons

Chés métçins is ont djo d'l ouvrache ati-amasse* , alorss is n'in sont réyus , ténés, ed vir s'abouler dins leu cabinet dés gins avoéc un tchot rhume
Austôt* qu'is ont la niflette et qu'i s-sint'té patrake is leu feut absolumint leu boétes ed drogues* . Tout chés médicamints lo cha n'est mie nécéssaire qu'is rinfiqu'té chés docteurs n n'y-o qu'deux coses à foaire :

Eune boutéle d'ieu d'mer in vaporisateur pour nettier vo niflettes* , pi d'l hinalation ; un troése veintuélmint inne boéchon coeude , pi ch'est toute !
Ed tout sin , ej connoés un proverbe qu'i dit : Pour sogner un rhume ch'est huit jours avu dés médicamints o bien eune ésmainne , SANS !!!   J vous quitte busier la d'sus !!

*Ati amasse = Beaucoup
*Réyus = Fatigués
*Austôt = Aussitôt
*Drogues = Médicaments
*Niflettes = Narines . Mais avoir aussi le nez qui coule

Poayer sin pérmis in nature

Ah ch'est dés rutes wépes chés Hollandais , dés wépes à tchuls ganes !! Is n'ont poin fini d'nous surprinde , j'n in su coér tout ébeubi dé cho qu'j ai li din chu jornal .
Figurez vous qu'in n'Hollande os pouvez poayer vo permis d'rouler in nature , sié , os avez bien comprins . Dés l'çons d'conduite in écange d'érlations séssuélles ; i feut dire eq cho'p prostitution al est légale dins chés poéys bas . 

Biétôt dins chés tchotes annonches ed chés autos écoles os pourrons lire plaqué su chés carrieux : Moniteur avoéc " gros crick" donne élçons !!  O bien coér quante chu candidat i sro dins cho'c carette ech moniteur i li diro : Os pouvez ti m'dire quoé qui n'y o dins cho'b boéte à "glands"

Nan mais, cho ti du sén tout cho . Stapindant i feut qu'a seuche chu moniteur qu'i l-lé propose et non poin chu candidat . Et qu'is euch'té touté-deux plus d'dix huit ans . Os m'avourez qu'o n'in voét d-drole dins s'monde !!!

Mier chés capucins

Un lapin cha n'est mie un bétail ed companie . Ch'est deux kilos énmi ed vianne avoéc granmint ed protéines , pi sans cholestérol .
Ech " plan lapin" ch'est conme cho qu'chés grosses légueumes* Vénézuéïens is ont délonmé leu plan d'sauvetage pour indiguer cho'c crise économique dé ch'poéys . Pér après avoér canger l'heure pour miu s'achuchonner* avu ch'solé ; achteure ech gouvérnemint i dminde à chés gins ed mier chu bétail à grannes-oréles .
J'éspere éq chés gins is n'front poin tout conme chés lapins , sains cho ch'est la patronne * qu'a n'sro poin continte du tout ! J'vous quitte busier la dsus !!!!!! 

*Grosses légueumes = Politiciens
*S'achuchopnner = S'accommoder
*La patronne = La femme du foyer
*Busier = Penser

Bien savoér éch qué perler veut dire

Au cminchemint d'nio sièque , dins min poéys

Étoait tojours peinibe à Pére Robart un vrai " Pot à goutte" ed sortir sés neuès dins un coin d'sin grand mouchoér à carrieux , au momint d'poéyer s'consonmation . I vnoait rédjuliérmint , mon més pérints qu'is tnoait't el "café du progrès" boére és bistouille aveuc, à coté dé s'tasse , sin piot carafon d'goutte .

Mais ch'coup leu , au momint d'régler sin compte , a n'va poin tout seu . I s'met à tracher . I tate pi i tire dé s'poche un mouchoér qu'i n'a pu d'nœud . I dit à m'brave mére :
Éch n'est poin min mouchoér d'habitude , j'ai cangé d'habit .
- A n'est mie grave Pére Robart . O srons d'érvue diminche tchi vient ...
- Oui , philoméne , si diminche tchi vient j'én sus poin parti à teupes .
- Bé, d'tout sin ; qu'a li répond sans hésiteu eune ésgonde ém mére , a supposeu qu'o fucheuche mort édvant , ch'én sroait mie eune granne pérte !

E. Chivot     (éstrait d'sin bieu live : rinchette )