Épeutnards nipons

Din un tchot poéyis à 500 Km ed tokyo à Nagaro o peut vir un peu tout pértout din ch'villache dés mannequins grands conme dés gins .
Ch'est MR Ayano qu'i l'a yeu l'idée pour érdonner d'la vie à sin poéyis qu'i cminchoait dé s'dépeupler .
Mr Ayano i raconte :
…

Un bieu jour ém fénme al avoait mis ein épeutnard din ch'courti pour épaveuder chés oésieux , al l'avoait arnéquéïe avu d'z effets* à mi . Du coup quante més voésins is passoait't , is m'saluoait't aveuc leu main in pinsant qu'ch'étoait mi . Pi vlo comint qu'din ch'villache asteure os n'sommes pu 27 mais cazi 300 !!


*Effets = Habits

Afficher la suite

5

Fouére el "PLEIN" d'santé

A Naftalan unne tchote ville à troés chint kilométes ed cho'c capaitale ed l'Azerbaïdjan , n'y avoait un chameau éstourbi cazimint mort , tout du moins ch'est cha qu'chés habitants is pinsoait't . Mais fil à msure dés jours ech bétail à 2 boches i guérichoait , i s'értapoait tout seu ; dusqu'a s'rétampir* su ses pattes .

Tout ébeubis , étombis chés habitants is ont caché à savoér ech bout qu'i va dvant , et à forche ed cacher is ont treuvéïe .
Ech chameau i l'étoait allongéïe à côté d'inne flaque ed pétrole ; un pétrole un molé différeint dés z'eutes , pu épais , pi imprope à chés usaches commercials traditionnels ed chés hydrocarbures .

Chés blouses blanques is l'l ont étudiéïe pi is leu z'ont apperchu qu'ech pétrole i bailloait * d'l ayude * pour sogner chés maladies d'pieu , ed chés z'oches , et d'chés musques , pi coér inne sécant d'eutes coses .

Bréf à cha ! Un pétrole miraculeux . Unne affoaire poin ORDINAIRE , ch'est SUPER nan ? !! Bon j'arréte la pachque ch'plein i est foait !!!!

*S'rétampir = Se redresser
*Bailler = Donner
*D'l ayude = De l'aide

Chés fénmes et l'mécanique

Unne fénme rinte à s'maison pi al dit à s'n honme :

- Chéri , y-a inne saquoé qu'i n'va poin aveuc cho'v voéture . Al va pu , pus moéyén d'démarrer .
- Bén n'in vla d'un eute , quoé qu'i a bien pu s'passer , al rouloait fin bien hier tout l'jornée ?!
- J'ai idée qu'i a doï ieu din ch'carburateur .
- Vla qu'asteure tu ti connos in mécanique ti !! Et porquoé qu'i éroait doï ieu din ch'carburateur ? Pi d'abord ouéche qu'al est cho'c carette ??
- Din l'piscine ...

Ed l ouvrache ed princesse

Cha pouroait fouére rêver .

45000 € . Cha n'est mie ch'que j'ai guégnéïe à l'tirlotrie , o bien à chés grattaches . Nan; 45000 € ch'est l'salaire pour unne énnée qu'un coupe d'Inglés is veut't-é don.ner à leu nounou . Pour seur qu'ch'est bien payéïe ; mais feut don.ner d'li-minme* . Béyez un molé :

In preume ch'est pour sogner des jumelles . déjo aveuc des "jumelles" is dvroait't vos vir arriver d'loin aveuc vo grands sabots .😊 .
I feut avoér un molé d'éspériénche ( 2 ans) . Aller racacher chés filles aprés l'école quate jours pér ésmangne* . Ahanser* dés jux ; avoér inne formation d'éscouriste . Préparer ch'diner , pi l'souper . Et surtout és deguiser in PRINCESSE DISNEY 😲 , s'ingager din ch'personnache pour amuser chés gins d'cho'm maison . Pi un ramindo* , i n'feut poin t'éte érgardant su chés heures . ch'est-i inne vie d'princesse cha ? !!!

*Li minme = Soi même
*-Ésmangne = Semaine
*Ahanser = Construire , organiser
*In ramindo = En plus , en supplément

5