I suffiro d'un signe

In France os n' éroéme mie l'droét d'utiliser chu "TILDE" ??  Pi d'abord quoé qu'cha nn'est qu'chu tilde ? . Ch'est un signe conme eune tchote vague eq chés Espagnols is bout't au dsus d'chés " N"
Amon chés Bretons n'y-o un coupe* qu'avoait coési Fañch conme tchot nom pour leu fiu . A n'o poin plét* du tout à ch'l administration Française qu'al dit qu'chu fameu tilde i n'est poin r'connue in France .

Ech père un délomé Jean Christophe Bernard  (I sanne à vie eq minme pour li sés pérénts is ont yeu du mau d'coésir sin tchot nom )  bréf ; i l'o démuché inne cirtchulaire * raport à ch'l état civil dé ch'moés d'juhiet 2014 qu'a dit qu'i n'y-o mie d'raison qu'chés gins is n'peuch'té mie appler leu fiu Fañch

Mint ...Mint,  ch'est sin nom d'baptéme a ch'tchot ! I l'o do'ch chance pisqu'oz peut dire eq ch'est eune histoére qu'a s'términe  Fañch mint bien !

*Coupe = Couple
*Plét = Plu
*Cirtchulaire = Circulaire

Allo , ch'est tchuit !

un bieu jour vo téléphone i s'méttro à sonner . Conme dé bien os répondrez , probabe itou qu'i n'y-éro eune tchote voéx qu'a vous diro : A y est ch'est "bleu" .

Portant rien à vir avuc cho'météo , ech bleu i n'sro mie din ch'témps* ; cha mérite un molé d'asplique .
L'eute coeup au soér j'erbéyoais ch'poste ed télé , j'étoais dégrayéïe* conme is dit'te a Boulonne . Vlo un type qu'i prind sin téléphone portabe i saque un fil dé s'poche et l'l intique din sin portabe , pi l'eute bout dé ch'fil qu'i r'sanne a inne sonde i ll'infonche din un morcieu d'vianne , i coési eune tchuisson  qu'a li convient su sin téléphone . Au bout d'un sécant minutes ech téléphone i vos avèrti pour vos dire eq ch'est fin prét . Ej saquoais dés ziux conme dés pronnes .

J'ai cru avoér éne bleue vue* ; bleue conme cho'vianne . I l'avoait réussi sin coup ech sorcier lo !

*Ch'témps = le ciel
*Dégrayeïe= Confus
*Bleue ou bleuse vue = Hallucination

L'intèrremint d'sés gambes

Qué coeup d'malsaveur* j'ai apprins cho's smaine passé qu' min camarate i l'alloait s'foaire coper sés gambes . J étoais au côtè d'li quante oz li o annonché . Diu dé diu,  cha y-o foait un choc , i nn'o yeu sés 2 gambes copés ; ch'est l'cas dé l'dire ...!  feut dire qu'ch'étoait triste , os sroéte é-vnus à ch'l intèrremint os n'éroéte poin ri non pu !

Ah nan;  li i vo fin bien , ch'étoait l'intérremint d'sés gambes . Ben quoé qu'os voulez qu'i foaiche aveuc ?... I l'alloait tout d'minme poin z'zés monter in lampadaire . J'sais mie si os avez djo été à un intérremint d'gambes , mais ch'est saisissant . Pour seur eq quante oz rinte di eune moaison d'értraite ch'est forchémint pour s'in r'déssaquer un jours sés pieds dvant , mais lo ch'étoait vraimint loi dvant .

Pi l'jour qu'oz o dû r'freumer cho'b boéte à domino* pour s'in aller à ch'bruloèr * , oz voéyoait bien
qu'i l'étoait décabaler ch'paure honme , i l'o prins sés gambes à sin co* ; pour un honme dé s'n ache i l'est coér assez soupe* pisqu'i l'o réussi à bécoter sés pieds pou leu dire à l'arvoéyure

Qué conte !! A s'porroait bien qué j'vos euche foait MARCHER !

* Coeup Malsaveur = Mauvais coup
*Boéte a domino = Cercueil
*Bruloér = Crématorium
*Co = Cou
*Soupe = Souple

Skièr din chés vagues

Si os avez invie d'foaire du chèr a voéle os allez su l'côte d'Opale avuc chés grannes plaches n'y o poin miu . Si os avez invie d'glicher su chés vagues os irez putôt à Biarisse avuc chés gros rouleaux . Mais n-y o un type qu'i n'mainque poin d'gingin pi qu'i s'o dit : A coeuse qu'os n'froéme poin du Surf su l'côte d'Opale ?

Fut dit fut foait , i s'o jéjté à l'ieu , et i l'o ouvèrt inne école ed surf a ch'Touquet . Pour sur qu'i n-y o mie chés gros r...ouleaux conme à Hossegor mais pour inroéyer* oz peut déjo bien s'é-juèr !
M'einfin , j'éspère qu'i vo s'arter* lo et qu'i li prindro poin l'lubrie* d'ouvrir inne école ed grimpache su chés remparts ed Montreuil ; o bien skier din chés dunes ed Merlimont ( i nn'o bien qu'is ski'te é-su chés terrils) o bien déchinde avoéc dés cordes ech phare éd Berck ! O peut tout maginer !

Bé , prindez Hawaï , y-o un gars qu'i l'l o foait li du ski din chés vagues (béyez chés photos ) !!
J'n'in proufite étou qu'o z'est din chés Iles adou qu'i n'y-o poin d'coeufoéres* d'ahoqués su chés murs ed chés moaisons , pour foaire dés gros bés à m'sœur , min nveu pi s'n honme (eq ch'est poin li su chés photos ; li i gliche bien mais su chés parquets , ch'est un fin boin danseu et m'sœur étou ) Gros béc !!

*Inroéyer = Commencer
*Arter= Arrêter
*Lubrie = Lubie
*Coeuffoéres = Radiateurs

Maigrichez os gaingnerez plus

Amon chés Chinoés inne fenme ed 27 ans d'age qu'al vit coér moaison d'chés gins , cha foait coér inne coupe ed moés qu'és mère à s'foait du tourmint ed vir és fille qu'a dvient rien* un sac d'oche . Édon al décide ed li causer !

- A vo ti conme tu veux m'fille ? J'té treuve démaquoéré* , sé conme un coucou !
-A n'est mie 'tonant à cho'f fabrique nou chéf i nous baille 200 Yuans ( 26 €) pour tchaque kilo pèrdu.
- I sroait ti dévnu complétmint braque ech patron ?
- Nan , i dit qué dpus quéques énnées chés ouvrièrs is dviénne'té cras conme dés moénes , pi moins adlibe* qu'edvant et qu'i l'étoait temps d'foaire inne saquoé pou l'santé d'sés ouvrièrs !
- Marche ; j'n ai poin invie qu'ém fille al érsanne à un rot d'église . Maque et tais-t'te

*Devenir rien = Maigrir rapidement
*Démaquoèré = Amaigri dont les mâchoires sont saillantes
*Adlibe = Gêné dans les mouvements

N'y-o ti coér dés vindeux ?

Trinte du chint * d'vénte in plus edpus qu'i l'o ahansé * cho'b boéte à voétures . A Singapour eq ch'est un poéys ouéche qu'oz mainque ed plache , édon oz batti in heuteur !

Conme dé bien , si qu'os volez acater inne auto , soin* ...poin n'importe éltchélle dés Ferraris , Maseratis ; Lamborghinis , os m'avourez qu'i feut avoèr lés rognons gras pour acacter sés carettes lo ! Etou os povez nn'acater eune qu'al o djo sérvie .

Mettons qu'os l'l acatéche , os arrivez au piéd d'inne tour ed vérre , ouéche eq chés autos is sont incrinqués sur 15 étaches conme dés canettes o bien dés chucrates ...os n'in coésichez eune . trinte ésgondes pér après , el vlo qu'al est  déjo déchindue dé s'boéte fin prét à rouler . Euh ...après avoér poayé bien seur !

Trinte du chint = 30%
*Ahansé = Fabriqué
*Soin = Attention

Omar !

J'ai troés ans , ej pèse quatore* kilos et j'é-msure un méte vingt' , j'ouve chés portes , tous chés portes dés glichantes dés portes éd douche et itou chélale dé ch'l amère * .

Omar ! os nn'avez ti intindu pèrler ? Omar ech cat el pu grand du monne , né natif ed Melbourne mon chés Austraïens . Os m'direz cha n'est mie 'tonant* qu'i seuche grand , à coeurir après chés kangourous et foaire éd z'ébondis* du diabe , i l'éro yeu sés abatis d'allongés !

Qua-minme un méte... vingt' , ej n'in su resté tout ébeubi , béc et borne * quante ej l'ai vu j'ai failli pèrtir al rimballe * , a nn'éte éstourbi* pi porquoé poin aller à teupe* tant qu'o z-i est !!
La , os éroème pu l'dire : Omar m'a tué !

*Quatore =Quatorze
*Amère= Armoire
*Tonant = Etonnant
*Ebondis = Des bonds
*Béc et borne = Bégue et borgne = Stupéfait
*Al rimballe = Basculer en arrière ou en avant
*Estourbi = Sonné à en perdre connaissance
*Aller à teupe = Mourir

Éz-z hirondelles ed farnétes

Li din chu jornal "la voix du Nord" 'smainne passée , quiques pért alintour ed Montreuil . Mercrédi d'érmontée * ech solé i blaque din ch'temps , o z-intind chés gazouillaches ed chés hirondelles qu'is torne'te autour dé ch'réstaurant , o z'o qu'eune invie ch'est d'siroter un coup in tèrrasse .
Mais cha n'est mie possibe pi qu'cho't tèrrasse al est houlée* d'fiéntes ; o z-o bieu brucher , èrbrucher deux troés foés pèr jour qu'a dit cho'p patronn...e , rien à foaire , chés serveurs is n'peut'té pu sèrvir sains s'foaire éplinguer *.

Et j'én vos pérle é-poin d'chés croésés* pi d'chés contres-vint* qu'is sroait'te à canger à forche dé s'foaire mitrailler !
Écmint foaire pour vive insanne avoéc chés tchots oésieux fin rétus , a né-dminde poin miu cho'p patronne !

Édon , al o rincontré ch'l achuchon* d'protéction d'chés moénieus pour savoér si qu'al poroais déplacher chés nids ...
Obien bastiquer* dés tchoté-maisons pou z-zés loger ; o bien à msure* qu'oz li baille un molé d'ayude pour néttier dvant sin réstaurant ! Qué malheur d'avoèr inne vaque et poin d'beurre .


*D'érmontée = L'après-midi
*Houlée = Remplie
*Eplinguer = Eclabousser
*Croésés = Petits carreaux
*Contre-vint = Volets
Achuchon = Association
*Bastiquer = Fabriquer à la hâte

Din l'noér

Os avez ti  déjo assisté à un concert din l'noèr ? Nan !  Gilbert Montagné li i ll'o djo foait ... Oué bon , amèrrons* la lés cacouilles !

Cho n'a mie d'sin d'acouter do'm music avoéc chés acrinquillaches ed toute sorte qu'i vous berzille'té vos oréles ; dés lazers pér chi , dés leumières ébleuichantes pér lo ; do'f funquée ;  tanq-é pi coér* ... 
Cha suffit ! Amon chés Américains n'y-o un promoteu qu'i o décidé d'organiser un éspectaque edvant troés chint parsonnes din l'noér complét , chés gins ont minme du rimbaler leu téléfon.ne portabe .
Noér , noér conme el gueule d'un four . Pour érdonner à chés gins du plaisi d'acouter foque* cho'm music !

*Amérrons la = Arrêtons la
*Tanq-é pi coér = Tant et encore
*Foque = Seulement

I veut maquer al gamelle treuée

Cho n'o mie d'sin ed voloèr s'n aller in prison alorss qu'o z-o rien foait d'mau ! A Marseille à chés "beaumettes n'y-o un gars qu'i o escaladé ch'mur ed cho'p prison pou y-intrer .

pér après savoér foait r'pérer pér chés télé-miloèrs* , ch'gazier i l'o détalé conme un iéfe* pour finalmint aller s'lancher din chés fi-d'fer * . I l'o té plaché in surveillainche ; mais os n'savons tojours poin à coeuse qu'i voloait rintrer in prison .
...

*Télé-miloèrs = Télésurveillance
*Iéfe = Liévre
*Fi-d'fér = Fil barbelé

Poin aisié d'viusir !

Léocadie al o 75 ans pi grace à ch'progrés d'la sciénche a vient d'avoér un éfant . Al o invité sés 2 copénes à boére inne tasse ed café pi n'in proufiter pou leu foaire vir éch papar . O z'est déjo in plein miyu d'l après -midi et chés 2 fenmes n'ont tojours poin vu ch'tchot .

- Alors , nous l'fro tu vir un jour non dé d'la !
-Non là ch'est mie possibe , os r'voulez ti du café ? ...
Oué , mais din inne heure oz doét décaniller .

1 heure pér après ...
- alors , os allons dvoér nos in aller , oz peut ti l'vir asteur ? nos foait poin languir conme cho !
- Euh,... cha n'vo poin éte possibe ...
- Bon , suffit ! Pourquoé qu'té n'peux poin nos l'moutrer ?
- Ben , j'attind qu'i braie , j'ém rappelle pu d'où qué j'l ai mis !!

Muche ét' pleine-leune vlo ch'garde

Mi j'l ai poin ravisé ch'l eurovision d'chés canchons , cha fini tours* à dés heures du diape , chés canteux is n'cant'té mie pu din leu langue ; pi ch'l achuchonnache * intre chés poéys pour foaire guégner ch'voésin , cha cminche à m'plaire !!

Édon j'n érbéï pu . Mérchez , o m'a dit qu'in plein mitan dé ch'l émission atandis* qu'inne canteuse a s'égozilloait sur scéne , un badeux est arrivé ed neune-pèrt* déjuant chés serviches ed sétc...hurités pi l'éroait foait vir sin tchu a pu d'deux chint myons d'gins ! Nan mais , oz voéro d'toute hein !

M'infin , éne tchote pénsée pour Alma qu'al érprésintoait la France al o términé 12ém; éq ch'est eune boéne plache ! Al o presque vue ch'bout dé ch'tunel Alma ... Ej dis cho pasqu'i sanne à vir eq din sin poéys tertous chés gins is l'appel'té princhésse !! A moinss qu'a seuche inne cacouille ! Quiéche qu'i sait ?!!!


*Tours = Toujours
*Achuchonnache = S'associer
*Atandis = pendant
*Neune-pèrt = Nulle part

Do'g glaine tchuite pér ech solé

Pér après vos  avoér foait blasser* pér éne pouillette fin rétuse , os srez fin prèt pour visiter chés tchuriositèes Thaïlandaisse . Édon , én seuchez poin étombi si à un  tchuin* d'inne rue os voéyez un type aveuc un masque ed soudure i n'est poin in route à rindimincher* sin réstaurant , ch'est ch'chéf ed tchuisine qu'i foait tchuire sès poulets .

I l'o ahansé *un grill solaire avoéc dés miyers d'miloérs* . Edvant qu'chés preumiers pratiques* is arriv'te,  ech't honme i l'installe chés pouléts din un grill pour qu'chés miloérs is peuch'té l'tchuire conme i feut .  A intinne* dire ech chéf i feudroait qu'inne dijaines ed minutes pour rotir deux biélles tchuisses .
Non dés z'os ; si ch't affoaire lo al arrive in France , nouzote din chés heuts d'France , aveuc tout ch'solé qu'os avons , i nous feudroait cminder no poulet du mercrédi pour l'avoér à mier du diminche ; népoint* !

*Blasser = frotter , masser
*Tchuin = coin
*Rindimincher = Embellir
*Miloérs = Miroirs
*Pratiques = Clients
*Intinne = Entendre
*Népoint = N'est ce pas

Dés rutes wépes !

Quiéche qu'i n s'o poin amusé à foaire inne niche* à sés amis in réstant droét conme un potieu sans bouger éne patte din un musé d'cire ?!

O z-in voét d'drole din chés musés os savez .  Amon chés grands Breton* n'y-o 2 galibiers qu'is ont prins un ananas qu'is ont bouté d'sur un verrier qu'étoait vuide*. Pi tertous chés gins qu'is passoait'te edvant ch'fruit is l'prindoait'te in photo croéyant à inne œuvré-d'art . Qu'is sont farces chés deux lo !
Feut dire étou qué ch'tite ed l'ésposition timporaire ch'étoait  " Look again" ( R'béye miu)

*Inne niche = Une farce
*Grands Breton = Les Anglais
*Vuide = Vide

Chés 6 jours d'appértemint

Ma pinse un peu*... Ej connoés chés 4 jours ed dunkéke , bé , pô miu dire ch't énnée chi is pass'te à Calais .Mais os connoaichez t-i chés 6 jours d'appértemint ?? Én raveudez* poin a vo poste ed télé pour inséyer dé l'vir , os n'él voérez poin . Ch'est un type qu'i est à s'moaison ,,,probabe ! Et qu'i pédale d'sur un vélo qu'i n'bouge poin .                                                                                                Qu' a doét éte dur ed saquer d'din din chés conditions lo . Pi , pourquoé foaire un ju parél ? I froait t-i sin courrant li-minme ? Nan , os n'y-éte poin ,,ch'est pour batte un r'cord , pi bin atombé qu'ch'est l'sién' dé r'cord qu'i doét batte . I nn'o défini dé ch't affoaire lo in 144 heures , cha foait qua minme 3 157 km , ch'est conme si l'éroait pédalé ed Péris à Moch'cou !                                                  Incouragé tout d'minme pér sin pérrain Michel Drucker qu'i dvoait chértainemint l'erbeyer suer dés gouttes conme dés pronnes bien affalé din sin canapé rouche                                                                                                                                                                   *Ma pinse un peu ... = Je me demande                                                                                                                                                          *   Raveuder = Employé ici dans le sens de trifouiller 

                          

Chés dorlots

 Su l'côte d'Opale in ch'momint chés dorlots is ont la cote ! Conme dé just* , i-o un dorlotier* Calaisien qu'i-o décidé d'erlancher* la bague Calaisienne «  el courguinoise » . Da l'temps ch'étaoit inne bague qu'ech galant i l'offroait à s'boéne amie surtout din ch'quartier du Courgain maritime ( d'ou sin nom) dusqu'a l' fin d'cho'g guerre . Mi j'dis qu'ch'est inne fin boéne idée , surtout qu'in début d'énnée oz nos o présinté ch'coutieu in dintelle ed Calais . Alors' un tchot présint a vou blanc bonnet* ? Ch'coutieu o bien cho'b bague ? Feut trancher.                                                                                                                                                 *Conme dé juste =  Pour se faire                                                                                                                                                            *Dorlotier = Bijoutier                                                                                                                                                         *Erlancher = Relancer                                                                                                                                                         *Blanc bonnet = Femme , épouse                                                                                                                                                             

                                                                                                                                          

Cho't tortue pi ch'l épervier

Eschyle ch'étoait un dramaturge Gréc , el pére ed cho't tragédie Grecque . Os vos disez seurmint quoé qu'ch'est qué ch't Eschyle i vient s'lancher din chés Picardisants ?! Pourtant cha n'dévroait mie vos sanner drole vu qu'ej pérle ed toute in Picard ! Stapindant* in acoutant ch'poste éd radio  , ej n'in su resté tout étombi ed vir écmint qu'i l'étoait mort ech't honme lo                                                                                                                                                                 In 456 edvant Jésus christ ch'pére alors' qu'i ransoait * din chés contrées chichiliénnes* ;( cha n'devoait poin éte aisé pour li pasqu'i l'avoait du mau à sin talon Eschyle) …. mais i n'étoait poin honme à s'acouter . Conme d'effét inne coupe ed kilométes pu loin el vlo qu'i dégaroule din chés rochers .                                                                                                                                           Ahite , ahite* deux , troés types qu'is l'accompagnoait't is s'aboul'té pour l'aidier a s'rétampir* . Peinne perdu , ech't honme i l'étoait mort . A coeuse?!..Passqu'i l o r'chu inne tortue su s'cawoéte* .Ch'étoait ein épervier qu'i l'l avoait péqué*  pi inne foés in heut* i l'o laché s'proé* qu'al o vnue s'écraser conme inne mouque su l'caboche d'Eschyle .                                                                                          N'rigolez poin cha pourroait vos arriver ! Ch'éroait pu m'arriver à mi ; os avez chonq minutes qu'ej vous conte ; ej vourroais mie abuser !!! ... Un coeup qu'jém promenoait a l'baie d' Authie  j'intind conme un bruit sourd pér driére min dos ; conme dé bien j'm értourne et j'voés inne coquille d'hénon* qu'un grisart* i vnoait d'laissier quair pour qu'a s'berzille et qu'i peuche miu l'maquer ! Casimint qué j'm él prindoais su l'caftiere  . Ed tout saint , ch'grisart … «  Eschyle *«  avoait volu foaire conme ech l'épervier , hein !!

*Ranser = Flâner
*Chichiliénnes = Siciliennes
*Ahite = Vite
*Etampir = se dresser
*Cawoéte = Tête
*Péquer = Pêcher : Ici employé dans le sens d'attraper
*Proé= Proie
*Grisart = Goéland (jeune)
*Hénon = cocq
*Eschyle = ET si il  !!   (Que voulez vous on a les jeux d'mots qu'on mérite )

                                                                           

Sié , os pouvez n'in rire !

Ch'est un type qu'i sort complétmint morzife dé ch'cabaret . Ch'cabartier i li dit:

• Attind coér inne heure qué j'té raméne t'es mie in état d'conduire
• Chaaaaaa va aller n'te foait poin d'bile pour bibi
  Et la l'type i sort  tout caliochant , et i s'mét à toucher ch'toét ed tous chés voétures garés l'long dél coeuchie . Su ch'trottoér d'in face n'y-o un honme qu'i prouméne sin tchien, et i nn'est tout étombi , ébeubi ed vir éne scéne parél ! Alors i dit à ch'buvatier:

• Quoé qu'ch'est qu'os foaisez lo??
• Ej cache aprés m'n auto!
• Pi ch'est in touchant chés toéts qu'os allez l'értreuver?!
• Oué , pasqu'él miéne al o un GIROPHARE BLEU!!!

Ch'pont déliberé !

Ch'est qu'un bieu jour os pouroait'te vos r'treuver din la Seine ! Aveuc ech poéd du diabe qu'is foait'té tous chés cadnos* la .                                                                                                                       Ch'est chés cadoreux* pi chés touristes qu'i zz' acreuch'té su chés ponts d'Péris . A n'étoait pu possipe ; cho'v ville ed Péris al o don déidé ed décreucher toute pi dé z-zés vinde au z'inchéres . N'y-éro étou sécants morcieux d'grilles . J'én voés mie cho qu'chés gins is peut'té bien foaire avoéc un morcieu d'grille ? 

     Marchez , i sanne à vir qu'i y-euche dés noms , dés tchots noms d'mérqués d'sur . Dés souvenirs eq chés horzins* is ont quitté lo . Ed tout saint , cha n'sro poin pérdu pour tout l'monne , tous chés doubes qu'is sront récoués is iront à inne achuchon* caritatif'

*Cadnos = Cadenas
*Cadoreux = Ici employé dans le sens d'amoureux
*Horzins = Etrangers , touristes
*Achuchon = Association

                                                                                                                                                                                          

Y-o tricherie!

     Al est fichelle , mais qu'al est fichelle* . Qué dommache qu'a n'seuche poin do'p Picardie , sin cha os éroéte pu l'dire ch'est inne «fichelle picarde «                                                                                    A s'passe mon chés Grands-Bretons*; n'y-o éne étudiante qu'a s'o foait péquer* in route à tricher . Al n'avoait mie camuché dés «anti-secs»* din s'trousse; nan  , al avoait écrit inne vingtaine ed paches avoéc ed l'énc* invisibe et din s'carnasse y-avoait inne tchot leumiére UV à léd . I li suffisoait a mzure qu'al alleume ech lumion pour ércopier toute . 
 
Os m'avourez qu'a n'minque poin d'gingin . Mais al s'o foait toper , pinsez bien qu'eune leumiére qu'a s'alleume din eune carnassiére cha fini pér sanner* drole . Sans compter su vo camarates qu'is vous dénonch'té pér jalousté . Foait du bien à un beudet i t'rindra un pét !!


*Fichelle = Rusée                                                                                                                         *Grands Bretons = Les Anglais                                                                                                     *Pequer = Ici , dans le sens de se faire prendre                                                                             *Antis-secs = Antis séches                                                                                                              *L'énc = L 'encre                                                                                                                           *Sanner = Sembler

    

Sportifs du diminche !

Hier j'o li din cho'g gazette qu'oz pouvoait t'éte musclé conme un touér* tout in réstant aplonqué* din sin cadot ! Chés blouses blanques* in Californie is ont maginé inne pirule* qu'al varoait décatouiller chés génes qu'is brul'té cho'g graisse , ch'est conme si qu'os éroéte  foait inne séanche dé sport a fond d'train .
 Point pour mi ch't affoaire lo , ej passe min c'min . Pi d'tout saint , ch'est avant tout éne pirule qu'al est réservée pour chés affligés* , chés viux, o bien chés panchus . Et non poin pour chés vertillants qu'is peut'té coér bouger leu tchu pou soulver cho'fonte din un clup' ed mustchulation .

N'seuchez poin surprins dé n'poin avoér soé pér aprés avoér soulver chés poéds ! El mustchulation , cha « dés-alteres »

  *Touér = Taureau                                                                                                                      *Aplonqué = bien installé                                                                                                            *Blouses blanques = Chercheurs                                                                                                    *Pirule = Pilulle                                                                                                                             *Affligé = Handicapé

Feut-i coér oeuvrer?

      Ch'est cho'q quéstion qu'j ém pose , feut-i coér aller à cho'f fabrique pour ramner s'quinzaine ed péqueu?
Maginez qu'os ayéche invie d'un bout d'fricot* , d'inne salate , o bien d'un bout d'Maroille ,ch'est simpe , os vous dirigez vers chés r'froédichoérs* ed chés grands magasins pi os passez al caisse pour poéyer*… Attindez un molé y-o coér émiu* .
  A mon chés Québéquoés is ont invintioné chés r'froédichoéres solidaire a ch'bout d'chés rues. Din différints quartiers is ont aplachés dés r'froédichoérs , os prindez cho qu'os voulez , quanq'os voulez pi os n'saquez poin un pecaillon ; ch'est pour éviter ch'gadrouillache* qu'is dit'te .

Adon os n'éte poin tojours obligé d'prinne , vous étou os pouvez métte inne sécant din ch'frigidére . Marchez , ej connaichoais déjo cho'b baguette solidaire mon ch'boulinger , ech café solidaire mon ch'cabartier , asteure ch'est ch'frigidére ; biétôt chés boétes ed conserfes pi tout ch'réstant … Ben mi j'vo passer à tabe !

*Fricot = Viande
*R'froédichoére = frégidaire
*Poéyer = Payer
*Émiu = Mieux
*Gadrouillache = Vient de gadrouiller : Brader , gâcher

Garotage ed pantouffes

    I f'soait un vint d'voleu , un vint à écorner chés boeus . Daucuns diront qu'os étoéme in alerte orange A né zz-a poin impéché ed s'achuchoner* d'sur un parkinge ed supermarché pour pérticiper à leu premier championnat ed garotage ed pantouffes din l'Herault (34) .
    Conme d'éffet i c'minchoait d'i avoér un rute monne* pourtant ch'vint i vionnoait* ,cha f'soait un boucan du diabe . Malgré tout oz intind chés gins jablater edvant d'inroéyer*
  - Tu' t'os bien intrainé ?
  - Pinse-tu j'n o poin foait miu qu'troés métes !
  - Vinguette , tu t'os poin cassé inne patte
  - Bougre d'âne : tu froais miu ti din un studio ?...

     Adon chu concour i c'minche ; cha valdingue à 10 , 15 métes voér 25 métes . Tertous chés gins din ch'public is donne'té leu conseil «  Bloc ét gambe sin cho t'pantouffe al vo pértir din chés étoéles , qu'i crie l'un … Prins un molé puss d'élan qu'i s'égozille l'eute … Bref qué pértie d'rigolade ; pis os ons coér vite passé inne atlée* . Tout d'un coeup arrife ech'crack * ; l'as , ch'ti qu'parsonne n'arrife à déjouquer* , sin r'cord à li ch'est 30 métes . I prind s'n élan , i roaidi s'gambe et vlo cho'p pantouffe qu'al  pérte conme inne arc-abalette au diablé-vér * , chés juges à crou-crou i mzur'te* ….Silénche din chés gins  ...35 métes é-dés ; cha sro coér li ch'moaite pour inne énnée .

     Info d'darine minute : I sanne à vir eq François Hollande i l'euche déjo foait ch'concours . Sié , ramintuvez vous i s'a déjo invoéyé eune Charentaise ...»Royale»!!

*S'achuchoner = S'associer
*Monne = Monde
*Vionner = Bruit que fait le vent en soufflant
*Inroyer= Débuter
*Inne atlée = Une demie journée
*Crack = Le meilleur
*Déjouquer = ici utilisé dans le sens d'arriver à battre
* Diablé-ver = Très loin
*Is m'zurt'te = viens de : mesurer

"Good luck ! "

In-nhui j'vos o r'copié un tchot billet ed Georges Gry . Aveuc sin pérlache du vermindoé ( 02 )

Ch'étot l'ducasse tout partout in France ! chés Américains i vno't d'no délivrer . Ch'étot coume si l'bon diu l'étot déquindu à nouvieu su l'terre . In s'imbrachot , in lés imbrachot , in dinsot meume su l'plache télmint qu'in étot bénaise ...
...

Infin au bout d'quite temps , chés boches qu'i vnint d'erchuvoér une douille coume in-a longtimps qu'i nn'avo't pos r'chu l'ont dmindé à signer l'paix . Et tout partout in a voulu avoér quites Américains à s'mason pour bien foére vir qu'in lés avot quérs...
Déricq pi s'féme iz avint foait d'leu mieux pour donner à maingi à deux souldats et à la fin d'el maquerie , Déricq in passant il ahuque és féme par sin corchu eti ll'intraine din l'cour d'où qu'i li dit : " tchote n-a coér din l'cave une viéle boutéle d'djieu d'vie d'prooes . Tu fros bien dé ll'aller quér . No lieu in donnerons un vérre pou finir el fête !
- Bé , qu'al répond s'féme, tu n'os pos pu d'tête eq no quien . Tu sais bien qu'ech bouchon i fuyot , et qu'in a été obligés d'métte une loque à ch'goulot pou n'pos tout pérde . seurmint qu'i l'sintiront ?
- Non qu'i l'érprind Déricq . I n'sont mie si nactieux qu'cha . I n'él sintiront pos !
Cha ch'est don passé pou l'mieux . Moais ou moumint d's éraller , chés deux souldats in lieu donnant une poignée d'main , iz ont dit à Déricq pi à s'féme " Good luck ! " Et no deux viux l'in sont réstés béc - et -borne .
Quate il ont té partis ; Tasie al dit à Déricq : tu voés j'té ll'avos bien dit qu'i sintiront l' GOUT D'LOQUE " ...

G . Gry ( Saint Quintin 1952)

ch'coin minteu

Agence régionale de la langue picarde . Mr Baillet de berck .  Remise du prix de la littérature en Picard !  " Ch'coin minteu"

L'l urne, ch'est-i pour chés morts ?

Qué décarsure , més paures amis ; vlo ch'tour qu'est arrivé a inne fénme qu'a reste din l'Herault( 34) Alors' qu'a s'déssaquoait dé ch'l isoloér pi qu'a s'apprétoait a glicher sin bultin din cho't tirlire*, vlo ti pon qu'al apprind qu'a n'pouro mie voter a coeuse qu'al est défunctée!

Ecmint* cho qu'al dit a ch't honme qu'i s'occupe ed chu r'giste* avuc tous chés noms ; os voéyez bien qu'ej su lo ! Ch'honme un molé géné i cache* pour savoér ech bout qu'i vo dvant , quoé qu'i y-o bien pu s'passé . Dix minutes pér aprés , i sanne à vir eq din ch'villache voésin n'y o quéque témps inne fénme al o rinvalé s'n alouéte* pi qu'al portoait l'minme nom qu'cho'f fénme qu'est lo in-nhui pour voter .
 Maginez l' tiéte ed cho'p paure fenme qu'a poin pu voter pi qu'in ramindo qu'a doéche érfoaire tout sés paprasses dé ch'l état civil pour preuver qu'a n'est poin morte (Adéle)  … A voté!! ….Ah oué?? et quiéche qu'i est din ch'l urne alorss ?
*Tirelire =   L'urne                                                
*Ecmint = Comment
*R'giste = Registre *Cache = Cherche 
 *Rinvaler s'n alouéte = Aluéte : decédée

                                                                                                                         

Bache el son

O pouroait n'in foaire un conte , cha sroait inne histoére fin rétuse* pour indordler chés tchots !

Chés blouses blanques* is ont étudié chés bébés baleine; oué lés tchots d'cho'b baleine a boche*. Et chés chian-tifics* is n'in sont réstés béc et borne quante is ont vu qu'chés tchots pour «berdler» avuc leu mére is chuchotoait'te; dés tchots sons putôt qu'dés grands pour berlurer ch'l énemi … chés orques qu'is s'radine'te au moindré-son pour défier chés baleineaux .

Chés chercheurs is n'avoait't coér janmoés vu un tour* parél!

*Rétuse = Mignonnne

*Blouses blanques et *Chian-tifics = Scientifiques

*Boche = Bosse

*Radiner , rabziner= S'amener

*Tour = Ruse ; ici employé dans le sens de technique de survie

Chips obien HARAKIRI

Bée , n'in vlo d'én eute ! I m'o sanné lire eq chés JAP-AU-NEZ * is minqueroait'te ed chips , à coeuse éq l'an passé i n'o yeu deux o troés méchants typhons qu'is ont ruinés cho'r récolte ed peume é-terre . Aladon qu'is ont du arter* chés véntes ed « patato chips» et chés nippons is n'in sont maqués* d'chés maqueries* lo .

Messache à tertous chés Picards (Pi z'z eutes) . Si os avez d'trop d'chips din vo z'armoéres; garotez z-in sécants paquets amon chés Japonais; pi d'sus os mérquerez au crai-hon* rouche:

Soin; lés chips ch'est «NIPPON» ni mauvais pour la santé . Ed tout saint , is s'foait'té janmoés d'SUSHIS chés gins lo !

*Jap-au-nez = Japonais ( Humour Picard )

*Ater= Arrêter

*Maqués= Friands

*Maquerie= Nourriture

*Crai-hon = Crayon

Chés tchulottes intérligentes

Eune tchulotte* cha sert à proteger vou gambes si qu'os vos casserez vo loupes à bicyclette pér égzémpe; a moins qu'os éyeche inne tchulotte courte , lo os srez boin pour dés rutes égratignures o bien d'dranclures* .

N'impéque conme diroait nou Présidént d'la République , cho ch'est inne tchulotte «normale»

J'va vos dviser d'un « DJINE» ech'patalon hein , poin Birkin!! Un Djine qu'os pouréche biétôt acater; baqué à foait* ed toute chés nouvieles téchnologie . Avuc chu Jean lo os n'srez pus janmoés pérdu , i r'treuvro chu c'min pour vous . Pi au vrépe si chés témperatures is bach'te* i vos invoéro un molé d'caleur; et tout ch'progrés lo cha n'est mie réservé qu'a chés «jeans»

Bée, prindez chés paltots* is éront dés bandes solaires aveuc un cabe din vo poche pour équerquer vo téléfonne

Ch't aladon qu'avoéc dés patalons ainsin os n'passerons pus chés portics ed chés grands magasins sans déclencher chés alarmes .

*Tchulotte; Maronne = Pantalon

*Dranclure= Blessure infectée

*Baqué a foait = Remplie de …

*Bach'te = Viens de baisser

*Paltot = Veste

Malapprins

Si din sartains poéys d'Afrique chés fenmes is n'mouff'té poin raport à chés honmes; cha n'est mie du tout paréle in Tanzanie . Du contraire; la bos chés fenmes is foait'té regner l'orde à coeup d'cachoére* . Vlo dé s'qu'i nn'est:

Atandis qu'un jone-honme ed 26 ans i n'décéssoait poin d'éte malhonnéte avoéc és mére , ed l'atuire el long du jour; dés fenmes dé ch'villache is s'sont achuchonés pour infliger sécants chatimints* a ch'gazier lo et pi poin dés nunutries , attindez vir un molé:

I l'o r'cheut quinze coeups d'cachoéres , i dvoait étou ranser casi nérnu* din chés rues d'sin villache . Pi ch'est poin toute ,ej vos o wardé* ch'pus boin pour la fin . Oz-i o loyé* sés abatis et plongé din eune fosse rimplit d'bousot d'vaques , qu'i l'o minme été obligé dé nn'avaler un molé .

Pinsez bien eq quante ej voés dés nazus qu'is ont l'diabe din l'panche pi qu'is foait'té tout vir a leu pérint , qu'is z'zés prive'té d's éjuer à la «NITENDO» durant 2 jours; ej vourroais bien qu'chés nazus lo is lit'té min billet et qu'is s'dit'té qu'is ont do'ch chance d'habiter in france, népoint!

*Cachoére = Fouet

*Chatimints = Châtiments

*Nérnu = Nu

*Loyé = Lié

*Warder = garder

Cho'm mousse tache

Quanq'ej vos disez qu'i nn'avoait dés rédeux* d'concours . L'darin coeup is bécotoait'te inne auto pour pouvoér l'aveinne* à leu barraque . Ch'coeup chi ch'est pour guégner inne biére éspéciale de Chicago din Lillinois et sin verre .

Acoutez bien , est court mais cha veut dix : Ch'est participants is doét'té s'prinne in photo in train d'raser leu guernon* .  I sanne à lire d'après chés organisateus qu'a sroait pou n'poin brader cho'b biere ; pou n'poin qu'cho'm mousse pi cho'b biere al résse péqué din chés poélles* ed guernon .
Nan mais oz voéro d'toute , ed tout saint* chétlo qu'i n'ont mie d'poélles pi chés fenmes qu'is ont quére ech l houblon , is peut'té participer itou .


*Redeux = Original
*Aveinne = Tirer vers soi , ramener
*Guernon = Moustache
*Ed tout  Saint = De toute façon