Watieu fromache

Brexit o bien poin brexit ech patissier Armentiérois i sra à Londes au bout dé ch'moés d'janvier à chu salon d'chés produits français pour présinter sin gatieu-fromache !

Inne rute farce qué ch'patissier i l'a foait la durant ch'marché d'noé . In dégustant chés gins is croéyoait't -é croquer din un camenbert alorss eq ch'étoait un "merveilleux revisitéïe"
Ch'est inne meringue craquante avoéc inne créme au beurre din ch'miyu .
Ech patissier i vouroais qu'sin fromache-gatieu i foaiche el tour du monne ! O voéra bien ! Tours* est-i eq cha à bien foait rire chés grands Bretons *

*Tours = Toujours
*Grands Bretons = Les Anglais

Cacouille

Ch'est l'histoére d'inne fénme putôt fin bélote qu'al sin va vir ech métçin …!

- Docteur , docteur , au lit aveuc ém n'honme cha n'va vraimint pu , j'ainmeroais qu'os li don.nez inne saquoé pou qu'i r'sanne à  un toér (taureau) !
- Bien , déloqutez vous ! On va cmincher pér chés cornes !!!!

Caporal Wojtek

Un ors délonméïe Wojtek . Un fime mitan d'chés inglés pi d'chés polon.nés qu'i s'déssaquera din chés salles in 2020 pour féter chu 75 ém anniversaire d'la fin d'cho'g guerre .

Ch'est l'histoére d'un ors brun d'syrie ;orphelin qu'a été .
élvé pér chés soldats Polon.nés ed l'armée Anders .
Quante ech't ors i l'est dévnue pu grand i l'aidoait chés soldats ed la 22ém compannie durant chol ségonde guerre mondiale . I trainsportoait chés caisses ed munitions qu'is faisoait't un poéd du diabe .

I l'a accompagnéï chés soldats din leu péripe ( l'Irak , la syrie, la palestine , l'Italie , dusqu'in Ecosse .
Ch't ors i l'a minme fini caporal , el caporal Wojtek .

J'é n'su poin présséï ed gouter ch'pain la

Vla un robot qu'i mérche à la "baguette" , ej dirai minme miu à la "french baguette" .
Mon chés Américains à Las végas is ont présintéïe ech robot boulinger .
Pinsez don , un mahousse coér pu gros qu'inne auto , et i s'triboule * tout seu :
I mélinge cho'p pate , et i tchuit cazi 250 miches pér jour , et minme chés french baguette .
Chés boulingers d'quartier is n'ont poin bsoin* dé s'fouére ed bile . Is n'freumeront * poin boutique in-nhui* .
ch'est inne robot qu'i l'ira putôt din chés grands magasins !

*S'tribouler = Se débrouiller
*Bsoin = Besoin
*Freumeront = Fermeront
*In-nhui = Aujourd'hui

1 commentaire

Vu par 3 personnes

3Claudie Charlier, Laurent Zajac et 1 autre personne

J’aimeAfficher plus de réactions

Commenter

Commentaires

Tiot Phane In dvisant d'pain , cha m'foait pinser à m'voéséne 86 ans d'age . Hier à m'dit à mi , j'arviens d'mon ch'boulinger acater min pain "un bucheron" mais cha n'sa poin passéïe conme d'habitude , leu trancheuse al étoait in raque (en panne) . Alorss mi j'i rinfique : La ch'est l'combe , dé dminder un bucheron , et pi dé poin réussir à l'coper !! 😄

I l'l ainme sin blanc bonnet

Johnny , ch'est l'roé d'la galette

Diminche os ons tiréï " les rois" tout pértout in France , sié , minme à Bourg la reine ! ...

A Saint Vincent de Connezac din ch'perigord vert n-y a un boulinger qu'i a muchéïe din ses galettes des roés dés féves à l'effigie ed Johnny . Feut dire qu'ech boulinger i n'n est ravagéïe ed Johnny ch'est un grand "fan" .
N'y a dés féves in forme ed guitare , ed veste in tchuir , unne santiag , un album , sains oblier cho'm moto .
Én cachez poin pér après cho'f féve Laeticia ; à n'y est poin !

Min bieu sapin

Quoé fouére ed chés sapins après chés fêtes !?
Os povez l'métte din un indroét qu'la ville al à décidéïe pou qu'is seuch't-é écatis* pi fouére du composte et du paillache aveuc pi l'bouter* din chés plates-bandes .
O bien alors on l'érplante pour fouére un mur anti-buzin* él long d'chés autoroutes .

Sin cha y-a inne maniére originale d'arcycler chés sapins conme cho'c commune ed oye plage (prononcher oie) à quiques liue* d'calais . Is acouf't-é chés deunes* éd sapins ; poin quéstion ichi de z'zés r'planter , i feut jusse ez zés coutcher pou qu'chés branques is peuch't-é s'intiquer din ch'sape pour rinforcher chés deunes , pi éviter qu'is seuch't-é ronguer* pér cho'm mér .
Ch'est inne fachon d'fouére qu'al éziste déjà din les Landes (40) édpis eune coupe d'énnées .

*Ecatis = Ecrasés (utilisé ici dans le sens de broyé)
*Bouter = Mettre
*Anti buzin = Anti bruit
*Deunes = Dunes
Liue = Un liue est équivalant à 4 KM
*Ronguer = Rogner , ronger

Ech pu bieu.ye dés présents

Dés présents à Noé i n'n a yeu ed distribuéïe ; dés bieu.ye dés moins bieu.ye* , qu'importe cha foait toudis plaiji !

Marche ...in ravisant chu jornal ej croés avoér démuchéïe el pu bieu cadeau qu'un pére i peuche* fouére à s'file ...
Hal Vaughan i l'a inne file qu'al est hotéche ed l'air ; et malchance al travale el 24 et l'25 ed déchimbe .
Du coeup pour passer chés fêtes à ses cotés ech't honme i n'a poin térintéï eune buque* ; i l'a réservéïe 6 vols pour éte tout l'teimps aveuc és file .
Mi j'dis qu'no monne i l'est poin foutu n'y-a coér ed biéles z'histoéres !

*Peuche = Puisse
*Térintéïe eune buque = Hésité un instant
*Bieu.ye = Maniére ed pérler d'min poéys (entre canche et Authie) … Bieu = beau . Conme os disons étou du pan.ye .
Notez que le "ye" ce prononce à peine … Pan.ye = Pan = pain

Din ch'finistére

J'va cmincher l'énnée in vos pérlant d'inne quéfe*.
Os somme la ouéche * eq cho't  terre al finie , din ch'finistère , d'sur un gros rocher d'la pointe du Pern , su l'ile d'ouéssant .

Eune quéfe qu'al a l'habitude ed poaicher * din l'coin , al s'a foait surprinde pér chés heutes z'ieus* , coinchéïe su sin tchot rocher , d'un seul coeup vla ti poin qu'eune vague pu mawoése* eq lés z'eutes l'invoie valdinguer din cho'm mér .

Ahite , ahite* ech propriétaire i téléfon.ne à ch'maire dé'c commune ; qui sans térinter* appel chés sauveteux ed la SNSM , qu'is ont pu ravinne cho'b bête su la terre ferme !

*Quéfe = Chèvre
*Ouéche = Ou est ce
*Poaicher = Paître
*Heutes z'ieus = La montée des eaux
*Mawoése= Mauvaise 

*Ahite = Vite

*Térinter = Hésiter

Boéne énnée 2019

Ej souhaite inne boéne énnée 2019 à tout chés liseux d'min blog .
Eq 2019 i vos ratrinne du bonheur , ed l'amour pi surtout qu'os n'ayéche poin unne santé casvele *

Inne boéne énnée étou à min camarate ED avu sin blog HUMEUR ET PLAISI , qu'i foait un traval formidape pour fouére vive no lanque Picarde !

A tantot pour un nouvieu billet .! Pi n'obliez poin  Un tchien , un cot , inne mouque , met du Picard din t'bouque !

A l'arvoéyure … Éz Zéf

*Casvele = Fragile