Rintez vo co , j'sors més glaines

Pér après avoér yeu dés serpeints , dés cawiks, éd'z iguanes pi tout ch'diabe sans train , vlo qu'asteure chés gins is ratrine't-é chés glaines din leu appatemeint .

Du coup por se fouére chés Américains qu'is ont toudis inne idéeïe qu'a pousse l'eute , is ont invintion.néïe dés couches por glaines . Un site baptiséïe " Pampered your poultry" qu'a veut dire cowater vo glaines .
On voéra d'toute ; pi ch'co li quoé qu'i dit
KOKIDICHKOOOOOO

Voloér és détruire

Érquemindations ed nou poéyis

Ichi i n'y-a :
-Dés cloches qu'is sonne'te é-chés heures , chés messes, chés défunctés.
-Dés cos qu'is cant'te à l'pointelette " kokidichcooooo"
-Dés vakes avoéc dés cloches .
-Dés bidets din chés patures .
-Dés tchutéreux incrinqués d'sus leu tracteur pou s'n aller din chés camps.
- Dés toudeusses qu'is vionne'te à ch'boin temps .
- A l'aprézeut , chés feules is quait'te ed chés abes , pi chés rues is n'n in sont houléïes.
- Pi surtout y a chés margats qu'is s'amuse't-é din chés rues , pi din chés gardins .

Os voéyez din nou campagne , os ons dés bruits bien à nouzotes ; pi os y sonmes adités . Os avons mie dzoin d'cangemint !
Adon ; gins d'chés grannes villes : Si qu'y-a inne saquoé din m'liste qu'i vous cause ed l'imbaras , restez la d'où qu'os étes . Est miux por tartous !!

Courtes é-tchulottes

Y-a dés méneux d'taxis à Milan , qu'is ont prins dés prones ed 110€ , à coeuse qu'is savoait't mis in bérmuda por conduire .

Magré cho'c caleur du diape , n'y o un réglemint régional édpis 2016 qu'i interdit à chés taxis ed porter dés courtes é-tchulottes , dés claquettes , pi dés survetemints dé sport .
Pour n'in définir ; chés méneux d'taxis is peut't-é tailler des shorts à chés gins , mais eux is n'peut't-é poin n'in métte !

Raport à chés maqueries

Ouvrache : I feut qu'chatchun i méche ed l'ieu.ye din sin vin
Est vraï qu' chés patrons d'restaurants is doév't-é poayer leu équipe minme si n'y-a poin d'pratikes (clients) din cho'b boutike .

Du contraire , quante chés serveurs is n'peut-é mie rintrer à leu moaison à coeuse qu'i-a troés ou quate clients qu'is trainn'te à tabe dusqu'a dés heures du diape , du coup chés garchons d'salle is n'sont mie poayeïe in raport ! Ch'est rindi -rindo

In deuze , j'va vos pérler d'érchette : L'érchette ed purée d' rattes du touquet à l'mote ed Joël Robuchon (eq ch'étoait un fin boin tchuisinier) Mais pér qué sins qu'i s'a atchéni à vouloér écatir cho'r ratte du touquet eq ch'est eune pétote à chair ferme .
Mi ej z'zés tchuit à l'vapeur avoék inne pinchie d'sé , et inne nojette éd beurre . Pi ch'est toute .
Pour n'in définir : Inne purée d'rattes écraseïe , ch'est inne purée rataye !!

Al gagne chu s'mi marathon in poussette

" Ej n'étoais poin seur ed povoér el fouére " Qu'al a déclaréïe à chés jornalisses à l'arrivéïe ed chu s'mi marathon du Missoula in Amerique .

Ej comprins qu'al diche cha ; pasque Cinthia al a gagnéïe cho'c course in poussette aveuc ses troés papars ed'din .
Pi ch'est poin toute in ramindo* al a battu ch'record du monne ed vingt minutes : 21km in 1h29.08.
Malheureusemint i feudra qu'al attinche coér un molé pou qu'ech live des r'cord "Guiness" i valide sin ésploit . I feut qu'is r'guet'te bin cho'l course pour vir si qu'al éroait poin trichéïe . ( on sait jamais ; maginez qu'la mére al éroait foait un treu pou qu'chés tchots is pass't-é les gambes pi qu'is coeur'te aveuc leu mére pour l'aider din chés côtes )

Dés pichons din ch'l hôpital

Conme chaque énnée in Inde , y-a dés milliers d'immeubes qu'is sont in-nyeuéïe * à coeuse ed chol mousson
Mais ch'coup chi l'ieu.ye al s'a intiquéïe din ein hôpital din l'état du Bihar (bihar ! , os pinsez qu'chés gins is ont lés boules) ?!

Tartou chés gins ramoncheléïe su leu pajot in attindant qu'chés flots is pass'te . Maginez l'tableau chés ieu.ye crapies qu'is déval't-é dusqu'a chés soins intinsifs . I sanne à vir qu'i n'y- éroait minme yeu dés malates qi'is éroait't péqueïe dés pichons qu'is nageoait't-é din chés cambes .
Peut qu'manquer , si chés innondations is ont queutes in veinderdi ...ch'est l'jour dé ch' pichon ! Ti poin vraï !!!!

Chute d'ieu.ye

In chine " la clime" ch'est dépasséïe . Asteure is batich't-é dés immeubes carrémint avoék inne chute d'ieu.ye .
Cho'c cascade al dégringole ed chint huit métes . Chés ieu.yes ed pluie is sont wardéïes din d'grannes cuves aplachéïes bin conme i feut din ch'sous-sol dé ch'batimint .

Adon , chés copropriétaires is dit't eq chol chute du Niagara à leu coute rudemint quére . Al éroait sérvie qu'six coups in deux ans .
Pinsez don , pour fouére monter cho'f flotte dusqu'a ch'couplet * dé ch'batimint , cha leu coute chint euros por inne heure .
M'enfin.ye ; ech syndic i dit qu'on peut poayer ses charges "in liquide " 

Qu'is sont farces chés gins la !!

Attaquée pér dés dingos

Dés dingos ch'est mie dés badeux . Ch'est dés tchiens , dés tchiens leus seuvaches qu'is vive't-é la bos din ch'poéys d'chés kangourous .

Normalemint ch'est dés tchiens qu'is sont poin mécants du tout . Au momint du dîner , inne australiénne qu'al travail din chés mines din l'état d'australie occidentale , al s'a foait attaquer pér troés dingos . Dix minutes pér après avoér crié conme eune bruléïe , un collégue i l'a éffoayéïe chés tchiens in moins d'deu'ye .
Heureusemint ; pasque j'én sais mie cmint qu'cho'f fénme al séroait débarnaquéïe d'un ju parél !! … Pour n'in définir cho'p paure fénme al devro s'fouére raringer s'trogne ; por ravoér "bonne mine " pasqu'al travail éd-din . (din chés mines )

Qué caleur

El moédeu

El moédeu ch'est l'(moisson) .M'enfin ch'est déjo fini , chés moéchonneusses is ont foait leu traval .
Benjamin i l'est tchutéreux din l'Calaisis à St Folquin , li i va inroéyer s'darinne piéche ed bléïe à batte , al foait troés hectares , i met inne heure à l'héctare in cminchant pér chés courts tours .
El moéchonneusse ch't a li , quante i n-n ara vnu à bout d'ses dix hectares , i l'ira amon d'ses voésins . Ch'ténnéïe chés tchutéreux is sont mie a l'presse , ech temps i l'est télmint sé conme braise qu'is ont dix jours d'avanche su l'moéchon .

A ch'momint chi y-a du rinquére din ch'bléïe , l'an passé i l'étoait à 130 ; 140 € l'tonne , et pi la on est à 180€ . On ara poin misére ch'ténnéïe , inne énnéïe conme cho inne énnéïe eutremint cha foait deux ans d'passéïe

Ranser à piés décoeus

Qu'on est fin bénaiche quanq'on mérche à piés décoeus din ch'sape, din chés herpes, o bien su chés galéts , cha blasse* vou caqueuws pi cha décatouille tout chés terminaisons nérveusses .

Pour se fouére un Vosgien i l'o yeu l'idée d'agincer un parc ed huit hectares à la chapelle au bois , adou qu'os pourez vous proumener à piés décoeus . Allez vous in vir qué branque qu'i -y a passéï din s'téte pour busier à cho ! Mais ch'est inne boéne idéïe ! Ch'est l'pié nan !!?