vendredi 30 juin 2017

j'ai prins ch'bus

Est mie diu croéyabe ed vir énne cose paréle . Ecmint qu'o peut s'foaire chambuquer pér un bus , s'érlever pi continuer sin cmin conme si qu' i l'éroait dégaroulé d'sur un tas d'feure* ! Alors' qué ch'bus o peut casi  l'ruer à ch'bouache !
Minme poin éstourbi* , poin un abatis d'berziller , poin d'affolure*neune pért ; à peinne quiques z'égratignures

  Chés honme du fu is sont qua-minme évnus l'ostchulter din ch'débit , adou qu'i s'avoait lanché a peinne érlever pour s'naller laper inne pinte et s'rapurer un molé !

*Feure = Paille
*Estourbi = comateux
*Affolure = Blessure

http://www.francetvinfo.fr/

jeudi 29 juin 2017

Qué caleur

Amon chés Américains in Arizona , chés présintateux d'météo is n'sait'té pu qué couleur qu'i feut bouter su leu carte pour érprésinter chés forté-caleur !

Qué couleur qu'i feut mette achteure quante o frole lés chinquante dégrés !!?  Tous chés rouges is i sont passéïe dé ch'pu clair a ch'pu foncé !
Is ont décidé d'inséyer ch'VERT !  Peut qu'manqué eq quante o passe lés chinquante dégrés o dvient vert .  Nan !?


mercredi 28 juin 2017

ju du bouchon

Ech ju du bouchon i l'o pointé l'bout d'sin néz dins chés Flandes à ch'bout du XIX siéc .
Amon chos'cité d'Jean Bart n'y o coér quéques estaminets pour s'éjuer .
Ecmint qu'o foait ? Bé vlo est simpe : 

In preume os vous aplachez à 9 métes . Pi in deuze i feut foaire seuter avoéc 2 palets  chés bouchons d'bos ed tout chés couleurs , qu'ont été dréchés  d'sur énne planque ed bos !
Tertous is peut'té juer minme chés nazus !



mardi 27 juin 2017

Inn'o qu'pour mi

Pour seur qu'i sro mie gêné pér lés z'eutes tableaux d'ahoqués su ch'mur pisqu'i sro tout seu !

Ech musé Paul Valéry à Sète i l'o décidé pou l'prémière foés  d'ésposer qu'eune toéle . Mais inne rute toéle casi  quate métes dsur deux ; ch'est l' Gréco  L'immaculée conception de la chapelle Oballe .
Gardé précieusemint edpis 1961 a ch'musé d'Tolède


lundi 26 juin 2017

Soin à chés fantonmes !

Casi 5000 € pér moés pour sogner* deus nazus ed chonq et sept ans din ch'sut' ed l'Ecosse dins énne grande maison (o peut dire un catieu) , coér assez viellotte mais aveuc énne vue manifique . Un molé d'asplique su ch'l ouvrache :  Prépérer chés déjeuners ,inmner chés margats à l'école pi z-zés racacher pour l'érchiner * ; leu bailler un molé d'ayude pour chés dvoèrs , et z-zés mette à chloffe * . Ah j'alloais oblier 28 jours ed congés dins l'énnée .

Os srez ti chu siziéme !! Ben , el 6éme à inséyer d'foaire ech travail lo ; pisqu'i nn'o déjo yeu chonq fenmes qu'is ont passés , et rapassés rondébilis . Margré inne offe racachante* pérsonne i n'veut rester . A intinde dire chés  fenmes , cho'b barraque à sroait hantée .

Dés droles ed bruits , du verre qu'i s'berzille * , chés meupes qu'is bouge'té tout seu ; oz intind dviser alors' qu'i n'y o pérsonne alintour , dés bruits à vous glacher vo sang !!
El puss pire din ch't histoère ch'est qu'chés pérents is n'ont janmoés vu ni intindu énne saquoé dé ch'ju lo
Ma pinse * ! Ecmint foaire ! Pététe éq ch'est un co-glineur no fantonme ? N'ainme poin chés fenmes !! Alors' si t'es un honme et qu'tos mie peur ed chés fantonmes , avainche vir la bos mon chés Ecossais din ch'catieu et m'diros quoé !!


*Sogner = Soigner ( employé ici dans le sens de s'occuper )
*Racacher pour l'érchiner = rechercher pour le goûter
*Chloffe = Coucher
*Racachante = Séduisante
Berzille = Se brise
*Ma pinse = Je me demande


dimanche 25 juin 2017

ch'grand voéyache

Au diablé-vert cho'p pleufe , ech vint ; i n'in feut gramint plus pou z-zés découragés 
Coeuchures ed montaingnes a leu piés , a mzure un baton pou leu z'aidier din chés grimpettes !

Hier timpe au matin pu d'chon chint moutons Boulonnais ont foait leu premier voéyache pou s'n aller pouécher in heut dé ch'cap Blanc- Nez .Granmint d'gins is étoait't lo pour suire chu ho d'moutons dusqua ch'mont Hubert !



samedi 24 juin 2017

Un génie qu'i mainque ed gingin

Ch'est un type qu'i est ab brocante , et i voét énne lampe manifique , i lé prind dins sés mains et conme i n'y-o un molé d'pourettes édsur  i lé frotte aveuc és manche ; tout à coeup n'y-o un génie qu'i s'déssaque ed la d-dins et i déclaque à ch't honme :

-OH merci min moaite ed m'avoèr déliberé d'la d-dins ! Conme dé bien j'm in vo t'égzausser un vœu , coési ch'ti qu'i t'fro el plus plaisi !
- Ben , conme ej n'ai poin quére ed prinde ech'l'avion , j'ai toudis la trouille ed m'écrabouiller  . Adon , jou qu'os pouvez m'foaire un pont qu'i pért' d'eum maison dusqua Nouillorke ??
-Euh ... os pouvez n'in coésir un eute ?!!
- Os pouvez ti m'aider à comprinde chés fenmes !
- Sinon tin pont la , ed qué couleur éq tu l'veux !!

vendredi 23 juin 2017

Dés cadoreux fin rétus*

Conme gramint d'jonnes nivléts * qu'is pass'té leu BAC , n'in vlo un qui,  à peinne cominché i s'ertreuve déjo avu quéques points  in moins' . Dés points in moins' , oué mais su sin pérmis d'rouler ! Un molé d'asplique :
Atandis* qu'i s'rindoait à s'n égzamén du BAC 2017 seurmint qu'i n'étoait poin d'l avant , si fait qu'i rouloait à 125 km/h à plache ed 80 Km/h . Poin manqué i s'o foait arter pér chés cadoreux* qu'is y-ont prins sin pérmis . I l'o éspliqué à chés gindarmes qu'si i rouloait à toute bèrzingue ch'étoait pou n'poin louper ch'l épreuve du BAC .

Édon, conme i n'avoait pu d'pérmis chés cadoreux is ll'ont inmné dusqua chu cente d'égzamén !
Au vrépe ech jonne i l'o conté s'n histoére à sés pérents qu'is n'in sont restés tout étombis dvant tant d'geintillesse ed chés militaires . Conme dé bien is leu z'ont invoéyé énne lette d'érmerciemints !

*Rétus = Gentils
*Jonnes nivlets = Blanc-bec
*Atandis = Pendant
*Cadoreux = gendarmes , policiers



jeudi 22 juin 2017

Tchulottes -courtes

Pu d'chinquante degrés drière leu cassis* d'autobus ! Arrien d'caleur ! Caufourés*  qu'is sont chés méneux d'cars o bien d'trams do's société  "SEMITAN" .
Chés darins jours aveuc cho'c canicule , chés chauffeurs is ont dmindé à leu chéf si pouvoait'té mette inne tchulotte-courte a plache ed leu patalon . Is ont té r'foait liméro un ; N'y-o poin d'tchutchute* qu'i leu z'o dit ch'patron ...Amon  SEMITAN chés honmes is ont toudis yeu dés longué-tchulottes  et cha n'cangero mie .

Mécontints d'cho'd décision , is ont don décidé ed manifester inne jornée in infilant dés jupes conme leu collègues fenmes in ésperant d'éte intindu , surtout durant chés jours ed forté-caleur .

*Cassis = Vitres
*Caufourés = Chaud comme dans un four
*Poin d'tchutchute = Pas de discussion possible


mercredi 21 juin 2017

Ch'l honme guérnoule

Inne Histoére éq ch'est l'vérité vraie ... Vraie conme chés tchiens qu'is pich'te a zz'abes !

Ch'qui dvoait arriver , cha s' passé ! Is s'sont r'treuvés mon ch'tribunal touté-deux . Un coupe* d'éne trintaine d'énnée ,li qu'i li foutoait dés douilles* à y-in décoller s'maquoère , et elle al lé rindouilloait à coeup d'ramon . Bref , du recoeuffé qu'os vous disez seurmint , éd z'histoéres conme cho os nn'ons plein chés gazettes . Ech'juge i leu z'o dit :

- Et maintenant qu'est ce que vous comptez faire Madame ?
- J'ai prins més affoaires et j'ai quitté l'bèrcail pour réster in foïer* !
- Pensez vous revenir vivre aveuc vote mari ??
- Mon diu nan ! MONSIEUR (in pérlant dé s'n honme) i l'o quére ech grand bleu , i passe sés jornées affistolé* in honme guérnoule . Matin , midi , soér et minme pér nuit i n'déssaque janmoés s'combinaison d'plongée
- ( Ech juge à ch't honme) . Monsieur ; pourquoi vouloir vous déguiser en plongeur toute la journée??
- Ben j'sais ti mi , j ai tojours ainmé foaire do'p plongée
 - Certes , mais toute la journée en homme grenouille ça fait un peu  beaucoup pour votre femme ! Nan !?
allez vous faire un effort ?
- Sié pi ; ed tout sin i veut miu TÉTART  que janmoés !!
- Merci Monsieur Grenouille . Madame vous êtes contente ?
- M'oués ! Ej sroais continte eq quante i l'éro treuvé d'l ouvrage ech flayeux lo . ( in r'béyant s'n honme a li déclaque )  Bé , ti qu'i-o quère el plongée , avainche vir à ch'coin dé l'rue n'y-o un réstaurant qu'i cache un PLONGEUR  !!!

*Coupe = Couple
Douilles = Gifles
*Foïer = Foyer
*Affistolé = Accoutré



mardi 20 juin 2017

Seucisson d'bidet

Cha fsoait casi chinquante ans qu'chés pratiques* is avoait't leu 2 rondelles ed seucisson d'bidet offert pér ech patron dins tous sés boutiques de Calais pour l'achat d'un molé d'vianne .
Achteure ch'est fini , vlo cho'r rondelle ed bidet qu'a s'infuit à bride rabattue  !  béyez putôt :

Quante i vind 2000 € d'vianne ; n'y-o 13 seucissons à 8€30qu'is pér'te in rondelle ; édon , inne chintaine d'euros qu'is n'sont poin din ch'tiroér caisse . M'einfin , qué pécavie* qu'i y-o prind à ch'patron ed bailler* cho a tertous !
I pourroait l'foaire seulmint pour chés gamins . Chés grands eux is éront un molé d'déchets pou ch'tchien ; pi vlo tout l'monne i sro contint ! Népoint !

*Pratiques = Clients
*Pécavie = Lubie
*Bailler = Donner



lundi 19 juin 2017

Céline Dion inne darinne foés

Ch'dirécteur i vient vir chés 2 condamnés à mort . Si fait qu'is ont l'droét à inne dérniere volonté , édon ch'dircteur i dminde à ch'preume .

- Quoé qu'os voulez ti dvant d'mourir ?
- J'ai quére cho'm music . Os pourroéte ti m'passer Celine Dion qué j l intinche inne darinne foés !?
-Céline Dion ! Bon ch'est intindu ...( i s'tourne vers ech 2ém condamné)  Et vous quoé qu'os voulez ti ?
- Sans vous cminder ... laissez mé  mourir in premier !!

dimanche 18 juin 2017

Yoga maguettes

Du nouvieu din ch'yoga . Asteure chés Américains is foait'té du yoga avoéc dés tchotes maguéttes , chés titchots bétails is seut'té su leu dos , su leu panche , is maqu'té leu caveux pi is leu léqu'té leu loupes ! A vous in foaire dévnir "chèvre " .

M'einfin si cha z'z amuse , quoé qu'os voulez !
In Belgique is l'ont foait , mais y-o yeu 10 morts ...Forchémint is faisoait't cho avoéc un éléphant !


samedi 17 juin 2017

Ch'grand écart

Ch'est qu'ch'est casvél* chés roubignoles !!!  M'einfin cha n'est mie inne raison pou s'trondler conme un porchiau , un malaprins su chés fauteuils ed chés bus o bien d'chés métros !
Pér après Madrid et Nouillorke * , i sanne eq Péris i vo s'i atler étou  Os voérez biétôt apparaite ech plaque tout seu* din chés transports ed gins  .
Achteure chés marles* i feuro sarrer vou gambes ; chés fenmes is n'in sont réyuses* d'éte ramonchelées din leu cadot pou n'poin toucher vo z'abatis .
Alorss tiens t-té conme i feut ébreudi ; ouéche eq' tu t'croés ? A t'barraque !

*Casvél = Fragile
*Nouillorke = New York
*Un plaque tout seu =  Un autocollant
*Chés marles = Les hommes
*Réyus(es) = Fatigué(es)


vendredi 16 juin 2017

Un tchot tour intèr chés 2 tours


Ch'étoait jusse pour amuser chés gins qu'al o rinfiqué à chu jornalisse qu'i l'intérogeoait . Sœur Fabienne qu'al bordure lés 80 ans a s'o rindu din sin burieu d'votache diminche passé jouquée d'sur un " hoverboard" eq ch'est inne sorte éd planque à reules , os vous balez in avant pour avaincher pi in arrière pour vous arter* !

probabe qu'a sro chés déambulatoéres dé dmain !

...
*Arter = Arrêter

jeudi 15 juin 2017

Ch'grand blanc

Ichi ch'grand blanc ch'est putôt quétchose qu'oz peut acater din chés grands magasins et l'bouter din vo fornil * ; et non poin ch'grand bétail des mèrs ed pu d'sept métes ed long avoéc dés dints aguisés conme éd'z alleumélles* .

Cha foait 35 ans qu'i surf din un racoin d'cho'b baie d'Rio et i n'avoait coér janmoés queu néz a néz avoéc un ...r'froédichoére * . I l'est putôt adité d'vir dés tortues ,des dauphins , !
mais un frégidére ch'est l'premier coeup qu'i voéyoait cho , pi ch'est qu'cha put-éte daingereux .
Feut-i éte givré pour jéjter un frigo din chés mèrs , diu dé diu !!

*Fornil = Cuisine
*Alleumelles = Lames
*R'froédichoére = Frigo

mercredi 14 juin 2017

Cho'b balle alloait d'un sén , et d'un sén alloait cho'balle ! 2éme et darin lipisode ...


Pér après s'avoèr rondi leu panche , poin quéstion d'foaire praingère* . Après-none ech'temps i est waye* pu si bieu qu'au matin n'y-o dés gros tahus noérs qu'is dmind'té qu'a querver , oz voéro bien ...
...
Asteure ch'est chés honmes qu'is sé-jut'te tout éne atlée* durant . Ohh is peut'té juer quate o bien chonq heures d'affile , qué courage ! Cha foait asteure deux heures qu'ech match i l'o débuté et i n'y-o inne saquoé qu'a déturbe* Zidore; sin voésin i torne é-poin s'tiéte din ch'boin sén ; atandis qu'li pi s'fenme pi tertous ch'public is r'béy'te à gueuche , li i r'béye à droéte pi vissa-verssé * !

Is n'avoait'té coèr janmoés vu inne cose paréle . Is éroait'te pu n'in réster lo après tout atchun foait à s'mote ; mais Mélie tchurieuse conme inne canule* i l'o fallu qu'a li dminde...
-Disez un molé min boin chèr honme : A coeuse qu'oz r'béyez ch'match à l'arbout * d'nouzote ?
Un molé épiné ch't honme i li déclaque
- Ch'est pachque j'su t'arrivé in r'tard pi ch'est tout' !!


*Praingère = Sieste
*Waye (local opale sud ) = Drôle , bizarre
*Atlée = Demi-journée
*Déturbe = Perturbe
*Vissa-verssé = Vis et versa
Canule = Canulant (qui n'arrête pas de poser des questions )
*L'arbout = A l'envers

mardi 13 juin 2017

Cho'b balle alloait d'un sén , et d'un sén alloait cho'balle !


Premier lipisode ...

Zidore sin truc à li ch'est ch'tennis i nn'est aragé , conme de bien in ch'momint ch'est tournoé " d'roule en carrosse* " édon i décide d'aller passer inne jornée porte d'Auteuil pour érbeyer sécants matchs avoéc sin blanc bonnet* . ...
Bin atombé qu'ech solé i blaque din ch'temps* , cha dvroait éte éne boéne jornée . Ch'premier match d'érvant none* i cminche , bien aplonqués* din leu cadots ...is r'béyt'te . A peinne débuté qu'Zidore i cminche d'éte agacé , mais is r'béyt'te is sont vnus lo pour cho poin pour sé-juer à mabes !


Zidore i s'malotte i n'est poin din s'n assiétte , ch'est qu'ch'est un match éd fenmes et tous chés wigneries* cha cminche ed l'épiner* i n-y est poin adité à tous chés brailleries lo et pi cha li rappelle ( és voéséne du 5ém el sémedi soér ) ...i l'o s'tiéte conme inne étabe à vaques .

M'einfin , i l'est midi passé ! Mélie el fenme à Zidore à li déclaque : Bon ch'est poin tout cho , j'n ai poin foait sécants kilométes pour érbeyer chés balles pi chés pouillettes à court é-cotrons ! ( Os érez tertous comprins eq Mélie elle, chés jus d'raquettes cho n'est mie sin papin*) ...J ai min vinte qu'i groule i feut qu'oz mionche rondébilis * sin cha j'va quaire faibe !

Fin dé ch'premier sét ; os érez ch'réstant dmain ! (Si diu i l'veut )

*Roule en carrosse = Roland Garros (Pasque ça m'fait rire)
*Blanc bonnet = Sa femme
*Ch'temps = Le ciel
*D'érvant-none = Du matin
*Aplonqués= Bien installés
*Wigneries = Employé ici dans le sens de gémissements
*Épiner = Enerver , agacer
*Papin = Sa tasse de thé
*Qu'oz mionche rondébilis = Qu'on mange rapidement

lundi 12 juin 2017

A Péris du nouvieu su chés routes

Mais qué buzin* , et i foait coeud avoéc cho ! Est vrai qu'a rester bloqué  su chés routes ed chés grandes villes durant chés bieus jours oz est coér vite  incaleureïe , raport à ch'goudron oz pouroait coér s'értreuver din l'coltar bél é-rade* !

Si foait qu'a Péris in 2018 is s'in vont goudronner troés o quate routes avu du goudron éspécial ; un goudron qu'i r'taro* cho i-ieu . Conme dé bien avoéc dés routes fraiques ,ch'l air a sro rafraichie, édon  un molé pu réspirabe !

J'romionnoais* ...Tout cho est fin bien do i-ieu qu'a vous rafraichie , mais feudroait coér qu'i pleuf' un molé pour warder* chés ieus !!  Et si qu'oz éroait inne sécréche ?!  Is vont tout d'minme poin saquer chés tuyeus pour arrouser chés routes !!

*Buzin = Bruit
*Bél é-rade = Vite fait
*R'taro = Retiendra
*Romionner = Murmurer
*Warder = Garder


samedi 10 juin 2017

Pichons-cats

Pèr qué saint* qu'chés supportérs ed l'équipe d'hockey ed Nashville is garot'té* dés 'poissons-chats " su cho'g glache ?
A dure edpus 1998 ch't affoaire lo ; mais pèrsonne i sait a coeuse qu'is foait'té cho !  I sanne à vir qu'a sroait pour incourager leu équipe .  Os m'avourez qu'ch'est inne drole ed ménière pi fort daingereux avoéc cho ; pour chés jueus , chés arbites ,qu'is pourroait'té s'casser lés loupes o coér un abatis .

Ch'l intraineu i l'o dmindé à chés supporters d'arter* leu garottache pou n'poin pénaliser s'n équipe !
Ma pinse ..A dunkéke is garot'té bien d'z hérins durant ch'carnaval pi chés gins is s'port'té bien

*Pèr qué saint = Pourquoi faire
*Garotter = Jeter , balancer
*Arter = Arrêter


vendredi 9 juin 2017

I l'apprind ch'tennis su l'arnitoéle

Cha s'a passé in Heute Vienne , cha foait à peinne sept ans qu'i jue au tennis et l'vlo déjo casi avu chés grands , a chu championnat départémental dé Heute Vienne , n'y-o un jone ed 27 ans qu'i s'o gliché in 4ém série.
J'én su mie un éspécialisse din chés jux d'raquettes mais cha m'sanne fin bien , surtout qu'li;  i l'o apprind à juer au tennis in r'béyant* tous chés vidéos à Roger Federer su l'arnitoéle*.

I s'o atchénie * à r'produire és téchnique et s'a marché , ta-miu pour li , oz n'voét mie cho tous lés jours . Edvant d'mette sés balles din ch'filet i zz'o mis su "la toile "

*L'arnitoéle = La toile (le net )
*Béyant = Vient de : béyer = Regarder
*Atchénie = Avec ardeur


jeudi 8 juin 2017

Qué valdingue !

Bé lo ch'est toute ! Oz étoait pourtant poin ch'preume d'Avri . N'impéque eq cha n'o poin impéché cho'p paure fenme ed s'értreuver à plat tchu , coér bien qu'al n'o poin yeu sés abatis d'berzillés ou j'sais ti quoé d'eute ! Al o passé pèr eune belle porte si j'peux dire ainsin !


Ben j'vous pérle ed cho'f fenme qu'a foait d'z éssais pour NISSAN , pour seur qu'al éroait yeu plus quére d'éssayer  chés banquettes ed chés autos pour vir si qu'oz est bien aplonqué* d-din !
A plache ed cho , al est lo étampie droét conme un potieu pi al attind qu'cho'voéture al i fonche édsus ;pi qu' à ch'darin momint cho'c carette al doét s'arter tout seu pisqu'al est équipée d'eine acrinquillache* " Anti collision " conme is dit'te . Hormis qu'cho'voéture à n's'o mie arté* pi al o chambuqué* cho'p paure fenme ; qu'a nn'o té quitte pour inne boéne frayeur !
Mais qué niacoés* chés organisateux , a coeuse qu'is n'ont poin putôt prins dés ménnequins ?

*Aplonquer = Bien installer
*Acrinquillache = Matériel
*Arter = Arrêter
*Chambuquer = Cogner
*Niacoés = Idiots

mercredi 7 juin 2017

I li o copé l'hèrbe dsous l'piéd

O dit toudis ch'progrés , ch'progrés mais pour un coeup qu'i vo d'in ch'boin sin os allons mie nous plainde .

Grace a ch'progrés un honme i l'o pu récouer* s'tondeusse qu'oz li avoait déroufflé * un eingin qu'i passe lés chonq mille euros ! Édon, ch'voleu i l'étoait su chés routes i rintroait fin bénaise à s'moaison , quante tout à coeup i l'o vu s'radiner ch'propriétaire  ed cho't tondeusse pér dvant li !
Tout meneu , tout péteu ch't agozil i s'édminde coér cmint qu'chu propriétaire i l'o foait pour l'értreuver .  Est simpe conme bonjour  , ch'qu'i n'savoait mie ch't albran* la ch'est qu'cho't tondeusse al est équipée d'un " GPS" qu'i baille ech l'alèrte dés qu'ech robot i sort' dé s'piéche ed terre* ! 
Lo , ch'progrés i l'o du boin , népoint !!

*Récouer =  Récupérer
*Dérouffler = Voler
*Albran = Moins que rien
*Piéche ed terre = Champ


mardi 6 juin 2017

Un sérpeint peut n'in cacher in eute

J'ém raminteuve n'y-o quéques moés d'vos avoér dvisé d'un sérpeint qu'avoait inne panche conme un tonnieu d'bière à coeuse qu'i l'avaoait avalé inne gin .  Bé vlo coér inne histoère ed bétail vrimeux* .

A s'passe au Texas mon chés Ricains , alorss qu'i luronnoait * du coté d'Newton un honme s'o r'treuvé nez-a nez avoéc un sérpeint coér conséquent , mais i n's'ermuvoait* poin . Quante tout a coup in heut d'sin corps prés dé s'gueule , cha s'o mis à r'muer un molé , pi vlo ti poin qu'un eute sérpeint i s'o détiqué dé s'gueule et i l'o foayé* conme inne arc a balette .

I sanne à lire qu'éch prédateu* i l'éroait déssaqué chu sérpeint pour miu s'inseuver pasqu'i séroait sintu m'naché !

*Vrimeux = Venimeux
*Luronner = Errer
*S'ermuvoèr = Bouger
*Foayer = Partir rapidement
*Prédateu = Prédateur

lundi 5 juin 2017

J'ai foait un rêve !

Quoé qu't'os Ernest  tu m'o l air drole oz diroait qu't'os pèrdu t'quinzaine ?

- Bé , j'ai foait un rêve pi j'ai coèr du mau à m'in r'mette ! J'ai rêvé qu'min fiu qu'os vnons d'avoèr n'y-o eune quizaine , j'ai rêvé qu'i l'étoait djo grand pi qu'i r'chuvoait ch' Prix Nobel !

- Et alorss à coeuse eq tu t'plains ch'est ti poin un bieu rêve ?

- Tais-tte , el nuit passée j'n ai r'foait un eute ed rêve et min grand i disoait  : CHÉS FRITES OS LÉS VOULEZ TI SUR PLACHE O BIEN IMPORTER ?

dimanche 4 juin 2017

El pieu qu'al cante

N'in vlo d'un eute , vlo qu'asteure nou pieu al peut canter . Vlo dé ch'qu'i nn'est , si cha vos intéréche .
Os vous rindez mon ch'déssineu d'pieu* ; édsus vo couéne* i déssine inne coupe ed lines qu'is mont't pi qu'is r'déchind'te , un molé conme quand qu'os voéyez chés batemints d'vo cœur din un tchot cassi* d'chés z'hopitals . Et quante i l'o fini d'pinturer vo pieu , ed foaire sés "ondes" conme i dit ; i l'ahanse* din sin téléphone inne application qu'a pourro z-zés lire .

Soin , cha n'dure qu'inne coupe d'ésgondes ; né dmindez poin à ch't honme ed vos pinturer "Hôtel California " qu'a dure sécants* minutes .  Vlo ch'coeup i-est foait os passez vo portabe su ch'déssin pi os acoutez cho'm musiquette qu'i s'n'in déssaque !
Après oz peut tout maginer ; os pouvez foaire déssiner chés ondes ed vo fenme , vo papar , vo tchien , vou canarien pi tout l'diabe sans train ...à vous d'vir !!

*Déssineu d'pieu = Tatoueur
*Couéne = Peau
*Cassi = Petit carreau
*Ahanser = Confectionner
*Sécants = Quelques



samedi 3 juin 2017

Amon chés viu ch'est miu !

J'ai quére d'acouter o bien d'lire chés études qu'is sont foait't su l'un su l'eute , oz nn'apprins dés rutes ; pi cha m'foait tojours drole ed pinser qu'i n'y-o dés gins qu'is sont poayés pour cho !

Bé , prindez cho'd darinne étude eq j'ai li ; raport à chés blouses blanques , chés chiantifiques quoé  . Ben i sanne à vir eq chétlo* qu'is éroait't eune trogne fin rétuse* , racachante* à r'béyer , is sroait't granmint plus suivie din leu travail pér chés gins .

Du contraire , chés blouses blanques qu'is sroait'té  laids conme dés poux craqués eux , is n'ratrive'té* poin ch'monde .  Mais  chés gins s'intind'té tertous pour dire eq leu z'invintions sont bien plus importantes pi r'connut' pér la suite din ch'monde intier .


*Chétlo = Ceux la
*Rétus(e) = Mignon
*Racachant(e) = Séduisant
*Ratriver = Séduire



vendredi 2 juin 2017

geintil n'a qu'un eul

Pér bonheur n'y-o coèr dés brafes , dés boénes gins  In tout cas n'in vlo un qu'i n'o poin térinté * inne ésgonde à s'éjter à l'ieu din ch'port ed Richmond , un tchot poéys a quiques lieus d'Vancouver mon chés Canadiens .
Pour seuver inne tchote pouillette qu'a s'o foait ahouper pér un ion d'mèr * . D'un coup d'gueule ech bétail i ll'o péquéïe pèr és robe pou l'ratriner din cho'm mèr . A intinde dire un chiantifique * ech ch'ion d'mèr i l'éroait prins ch'robillon* d'cho't tchote pour dél nourriture .
Saisie mais poin affolé cho'p pitite al o pu r'treuver sés gins pou s'foaire cowater un molé

*Térinté = Hesité
*Ion d'mèr = Lion de mer
*chiantifique = Scientifique
*Robillon = Robe
*Affolé = Blessé

jeudi 1 juin 2017

Ch'villache ed l'arc ed St Jean

Un bieu jour al pointelette * chés villageoés d'un titchot poéys ed l'Ile Indonésienne ed Java is ont vu s'abouler inne tralée d'ageint d'l état pour pinturer chés maisons ed tout ch'villache .
Ch'est un viu quértier qu'i avoait dzoin* d'éte rindiminché ; pour seur qu'ech darin* qu'i l'o bâti chés maisons lo i n'o pu d'mau à sés dints .

A coeuse qu'is foait'té cho ?? Pour ratriver* chés tourisses pi r'foaire vive leu poéys . dés maisons pinturés  conme l'arc ed St Jean* oz n'in voét mie  tous les  quate écmins . Népoint !


*Pointelette = La pointe du jour
**Dzoin = Besoin
*Darin = Dernier
*Ratriver = Séduire
*L'arc ed St Jean = L'arc en ciel