Él chérige su ch'watieu

Chés honmes dé ch' fu* dins ch'sut' ed la France is nn'ont vu des griz' avoéc chés fus d'foérêt . Is étoait't tartous pamés* ; ércrans , is aglavoait't ed faim et d'soé .
Ch'est in r'béyant ech poste ed télé qu'eune tchote guernoule ed 3 ans d'age qu'al reste dins l'Vaucluse (84) , al o yeu l'idée ed foaire eune coupe ed watieus* in chucolat pour chés pompiers .
Su l'compte "twitter" ed sin pére cho't tchote al o dmindé à chés pompiers si is avoait'té mié* tous sés watieus . ... Pour sur qu'os ons tous mingé ; pi probabe eq ch'est grace à ti eq tous chés fus is sont éteint achteure .  Os t'foaisons tartous dés gros bécs et à biétôt , qu'is ont rinfiqué chés honmes dé ch'fu .   Un molé d'doucheur dins ch'monne débistraque* , cha foait du bien pour bien inroéyer* cho's smainne qu'al vient

*Honmes dé ch' fu = Pompiers (homme du feu)
*Pamés = fatigués
*Watieu = Gâteau
*Mié = Mangé
*Débistarque = Fou
*Inroéyer = Commencer

L'encens interdit !

 Soin* ! N' vous berlurez poin aveuc chu code ed la route a d'où qu'o peut treuver un panneau ed sens interdit  ! Nan rien à vir ...
J'm'in  vo vous causer ichi d'eune achuchon* d'gins ( 10 0000 inviron) qu'is défilt'te dins chés rues a Taïwan a coeuse qu'is sont in rogne conte ech gouvérnemint qu'i veut diminuer gramint l'usage ed brûler d'l encens , o bien dél monnaie in papier , ou coér d'alleumer des pétards . Chés manifestants is dit'te qu'is y-sont duis*,  éq cha foait pértie d'leu r'ligion* .

Pi lés z'eutes eux is dit'te eq ch'est pour diminuer cho'p polution sur l'Ile
Manne un peu , pour quéques batons d'encens , cho ti du séns un ju parél !!!!

*Soin = Attention
*Achuchon = Association (ici utilisé pour rassemblement)
*Duis = Habitués
*R'ligion = Religion

Dés tchots bouts d'leune

Pour seur qu'i n'él écangeroait poin pour inne vaque in or és trousse éd toélette .
Aladon qu'a n'est mie conme lés z'eutes és trousse ; ed-dins i n'y-o mie d'pate à dints , ni d'gomina ; o bien sécants démèloèrs .
Nan , o treuve putôt do'p pore* et dés tchots cailleux d'leune eq Neil Amstrong i s'o servi pour aplacher chés premiers morcieux d'leune , pour qu'o peuche*  z-zés r'béyer sous tous chés coutures éne foés r'nue su cho'p planéte bleuse !
O connoait poin ch'ti qu'i l-l'o acaté cho't trousse amon  " Sotheby's" ; mais o sait qu'i l'o dû raquer 1,8 millions $
Vinguette , un prix conme cho ; cha vous foait r'déchinde sur terre bél é rade* !!

*Pore = Poudre , (utilisé ici pour dire poussière tres fine )
*Peuche = Puisse ( vient de pouvoir)
*Bél è rade = Rapidement

Carton rouche

Chés jueus d'footéball un Cote d'Ivoére quante is r'cheuve'te* inne récompeinse , un trophée , cha n'o rien a vir avu ch'qui s'passe in Europe ! Ch'l attaquant Aristide Bancé i s'in raminturo* tout s'vie !

Éli meilleu buteur ed chu championnat Ivoérien 13 buts in 26 matchs , i l'o r'cheu el soulier d'or !
Mais cha n'y-o poin plé * du tout ! dés bibus ; dél gnognoterie , qu'i l'éroait déclaqué a la presse !
A coeuse !?  Is avoait't oblié d'inlver ch'l étiquette avoéc ech prix  : 24 900 Francs CFA  ( 37 € )
Est hontabe !! J'éroais yeu quére putôt d'avoér un bieu discour ! Binde d'imbléyeux !

*IS r'cheuve'te = Ils reçoivent
*S'in raminturo = S'en souviendra
*Plé = Plu

TF1 i l'o prind m'n ouvrache

Quante j'ai ahansé* " CH'TI JORNAL IN PICARD"  J'avaois dins l'idée éd berdler un molé d'chés informations bizares , droles , daucuns diront "insolites" ! Adon ch'est cho qué j'foais edpis éne énnée ou deux !
Mais vlo ti poin qu'i n'y-o un hocleux* qu'i vient maquer dins m'n euge !  Chtilo qué j'pérle ch'est TF1 !  L'eute coeup j'étoais bien aplonqué dins min cadot quante j'intins ch'présintateu qu'i déclaque qu'a compter d'in-nhui , eune foés pér ésmainne i fro vir à chés gins chés informations dins l'monne intier qu'is n'passe'té poin dins chés gros tites ed chés jornal télévisé !
Bé n'in vlo d'un eute , et mi alors' quoé qué j'vais dévnir ?  D'égzémpe : J avoais décidé d'pérler dé ch'cade ouéche* qu'oz aplache cho'f foto dé ch'présideint dins chés mairries ! Ben ; i nn'ont dvisé a 20h , j'm in vo tout d'minme poin vous in pérler éne deuxiéme foés , non dés boés !!!! 
Qué binde ed niaquoés !! 

*Ahansé= Crée
*Hocleux = Abruti
*Ouéche = Ou est ce

El mort d'un tchien ch'est l'vie d'un leu

Ch'est tours* quante o cache pér après inne saquoé qu'o n'l értreuve mie !!  ej dit cho raport a ch'léspréssion d'éch tite ed min billet , si j'mé raminteuve bien cha vut dire "le malheur des uns fait le bonheur des autres " ! A coeuse qu'ej dit  cho !?
Maginez 25000 € d'maquerie* qu'étoait prévu pour pu chint choéchante dix pérsonnes qu'o boutroait à l'ouste* ; cha n'est mie possibe , n-y o forchémint miu à foaire !
El jour ed sin mariache ,  alorss qu'al éroait du li dire "yes" (vu qu'ch'est eune Americaine ) ...a s'n amoureux  ; ej sais ti pér qué saint a n'so poin foait , allez savoèr a coeuse !!
Quoé qu'is alloait't don foaire ed tout cho'n nourriture ?  Chél jone fenme al o décidé ed bailler toute a un foyer ed sans fu ni liu *  ! Qué boin répilet qu'is ont foait ch'jour lo  , non d'eune pipe !!!

*Tours = Toujours
*Maquerie = Nourriture
*Bouter à l'ouste = Mettre dehors
*Sans fu ni liu = Sans feu ni lieu = Sans abris

Eune photo qu'al coute quér !

D'z éscultures ésposés dins inne galerie d'art à l os -en -gelé * et i n'in falloait poin d'plus pour qu'eune jone fenme al rinte pour ziuter un molé  Tout cho est fin bien ; mais pour craner dvant sés copines al décide dé s'prinde in photo tout seu un "selfie" i sanne à vir qu'cha s'appelle conme cho 
A s'rafule* un molé et al s'aplache bien conme i feut  . Mais vlo ti poin qu'a s'inchépe et qu'al dégaroule dins chés éscultures , cho'p premiere al quait et conme pér un effet d-domino lés z'eutes is quait't étou !
Un rute massac éstimé à 200 000 $ . Os m'avourez qu'cha quér pour un "selfie"

*L'os-en-gelé = Los angeles (humour picard)
*S'rafule = Se recoiffe

Oz est janmoés miu sérvi qu'pér li-ménme

Pour sur eq ch'est tenant d'intinde brouire* chés voétures qu'is pass'te à toute bérzingue au rase ed vo cassi* el long du jour pi pér nuit étou .
Edon , cmint foaire pou z-zés foaire freiner un molé chés cocos la ?!
Dins les Cevennes un honme d'eune choéssantaine d'énnées i l'o peinturé sin "monospace" du ménme parél eq chés cadoreux* ; attindez ch'est poin toute , conme i n'minque poin d'gingin i l'o prind éne sorte ed troés piés avuc un apparél foto incrinqué à ch'couplet* pour imiter ch'radar . Tout ch'trimac lo cha n'o poin plé* du tout à chés gindarmes . In preume is ont berzillé ch'radar , et ch't honme i devro r'peinturé s'n auto d'éne eute couleur

*Brouire = Bruire , bourdonner
*Cassi = Fenêtre
*Cadoreux= Gendarmes
*Couplet = Sommet
*Plé = Plu (vient de plaire )

Cha s'dit coér

I N'VEUT POIN TRIPETTE
Il ne vaut pas grand chose
*******************...
I FOAIT QUEUETTE

Il fait l'école buissonnière
**********************
RAMASSE TIN CO I-EST MORT
Ramasse ton coq il est mort. Rappelle les combats de coqs. Dans ce cas le perdant ramasse son coq tué dans le combat .Au figuré : Perdant à qui l'on adresse cette expression

Oh l'infilure !

Ecmint foaire pour avoér dés boénes notes in classe ! feut éte sérieux , apprinde sés lçons . A moins' qu'a seuche al naissance , i n-n'o daucun qu'is nait'te avoéc granmint d' gingin din leu boéyeu d'chervelle , is lit'té un tesque éne foés et is peut'té r'freumer ch'live ch'est gravé din leu cawoéte !

O bien n' yo inne troésiéme solution , conme un jone nivlet i l'o foait a ch'collége ed Cognac (17) . Ech gazier la i l'o attindu qu'chu maristére i foaiche sin mot d'passe su sin manicraque , pour gogner pér dsus s' népeule . Eune foés rintré a s'moaison i n'avoait pu qu'a rintré din ch'logiciel pi canger chés notes à li pi sés tchots copains ! Mais quéques temps après i s'o foait teuper ! Ch'est mie à des viu sinches qu'oz apprind a foaire des grignés !

Beignets pour chés bégneux

Amon chés Português ,achteure si os allez foaire bizir*vo caqueux à la plage et qu'os avez ne tchote faim ; os n'erez mie dzoin ed miler si chu vindeu d'beignets i l'est alintour ! 
Grace a inne " application" os pourez vous foaire livrer asteure sans vous mouvoér ed vou paillasse et tout cho rondébilis in 10 minutes os srez livré !

*Bizir = Bronzer
*S'mouvoér = Se bouger

quanq oz ainme o n'compte poin

In Indonésie si os voulez vous mérier ch'est 19 ans pour chés marles et 16 ans pour chés fumélles . Hormis si vous m'nachez d'vous détruire*os pourrez pététe el foair un molé dvnat .

Ch'est cho qu'est arrivé à un jone ed 15 ans qu'i s'o amouraché d'éne fénme ed 73 ans qu'a vnoait a s'moaison pour el sogner d'la malaria ; i n-n'o queu amoureux i n'in dérageoait poin . Finalemint touté-deux is ont pu s'achuchonner !  Un molé conme no pérsidént à nouzote chés Français , ej dirais qu'i l'o treuvé " sa Brigitte " !

*Détruire = Se suicider

boére et conduire

Asteure si un gindarme i vous arrête pi vous dminde si os avez " consommé " , os pourrez li réponne  : Sié , j'ai consommé ...5 L ed whisky .
Ej su seur sartain qu'i vous fro dés ziux conme dés tchus d'gatte ; et là os li déclaquerez  : 5L ed whisky pour chint kilométes  ! Clac ; béc cleuïe ; ripe tés galoches !!

Ch'est portant l' vérité vraïe ; vraie conme chés tchiens qu'is pich'te a z-z abes ! Ch'est éne société Ecossaise qu'a s'sert d'un "biocarburant " foait' aveuc chés réstes do'p production d' whisky .

ch'bidet rose

Ech fu i l'avainche conme un bidet au grandissime galop . Dins l'ouest canadien eune fenme qu'al voét chés flammes qu'is vont biétôt lequer sés murs dé s'moaison ; al est au chint coup ! Ahite ahite* i feut déguerpir ed lo , al prind sés clic et sés clac , et conme al o quéques bidets a dminde à sin fiu ed pinturer sin liméro d'téléfon.ne su chés bidets ; conme cho si n'y-o quiqu'un qu'i z-zés r'treuve cha sro pu aisié dé z-zés ramener .

Mais ech fiu avoéc tout ch'buzin , pi ch'carpin* qu'a faisoait s'mére , i n'o comprind qu'él mitan dé ch'qua y-o dit . Li , i l'o comprind qu'i falloait peinturer chés bidets pour qu'os z'zes r'treuvionche pu aisémint . Bin atombé qu'és mére à sé nn'o appercheu edvant qu'i peinture chu deuxiéme égvo un rose bonbon ! 
Heureusemint ch'est do'p peinture qu'a n'est poin mawoése pour chés honmes et chés bétails

*Ahite = Vite
*Carpin = Remue ménage

Et ch'BAC i ll'o ti yeu ?

Raminteuvez vous , cha r'monte a n-y o eune coupe d'émainnes , j'vous dvisez d'un jone qu'i s'avoait foait arter pér chés cadoreux a coeuse qu'i rouloait d'trop rade ! du coeup chés gindarmes is y-avoait't recoué sin pérmis d'rouler !
I leu z'o rinfiqué qu'si i rouloait vite ch'est qu'i l alloait t'éte in r'térd à ch'l épreufe dé ch' BAC  ! Chés cadoreux  i l'l ont mené a ch"l égzamén din leu auto  Si fait qu'i n'o poin été a l'atarge et i l'o pu passer sin BAC! 
Et alors' qu'os vous disez seurmint , i ll'o ti yeu o bien poin ??
 SIÉ ? I qu'i l'o té r'chu !  Bravo fiu , mais asteure i vo falloér passer l'oral !!  Ben pour récouer tés points ed tin pérmis d'rouler ; boudia !!!!!! 

Un goal qu'i foait peur

Amon chés grands Bretons* n'y-o énne équipe ed foot qu'a décidé d'foaire porter un maillot éspecial à sin gardien d'but . un maillot acoufté ed tchots déssins pour qu'éch goal i foaiche* pu grand , pu imposant .
Un maillot ganne fluo avoéc énne cibe *  in plein mitan dé s'poétréne pour déturber* chés attaquants ed l'eute équipe au momint d'tirer .
Manne un peu ! O voéro d'toute !

*Grands Bretons = Les Anglais
*Foaiche = Fasse
*Cibe = Cible
*Déturber= Perturber

Buke !

BUKE : Coup , bûche , escarbille , poussière dans l'œil , petit morceau
- ch'est pon eune buke : Ce n'est pas une poussière , c'est un grand gaillard
- Eune buke din l'eulle : Une poussière dans l'œil
...

- T'avainches d'eune buke : Tu avances un peu , et par extension tu avances d'une heure
- O voét eune buque éd'sur un eute , qu'o n'voét pon un fagot su li-ménme : On voit la paille qu'il y a dans l'œil du voisin , mais on ne voit pas la poutre qu'il y a dans le sien
- Ch'est pon eune buke qu'i l'o dins sin lit : Ce n'est pas une poussière qu'il a dans son lit . Se dit d'une personne mariée à une autre personne qui est très forte .
************************
BUKER = Frapper , cogner
- Qui qui buke ? = Qui est ce qui frappe à la porte ?
*****************
BUKÉT = Bûcher . Petite bûche
- Tire-bukét = Petite bûche que l'on tire pour laisser se refermer le piège sur un oiseau !
Recipient dont se servent les verrotiers , c'est à dire les ramasseurs de vers marins . Il y a des trous dans le fond de ce recipinet pour que les vers puissent être égouttés
*********************
BUKOIRE = Raconteuse . Canon anti corbeau
- Eune viéle bukoire : Est une femme qui raconte continuellement des choses méchantes sur les autres .

Gatabisse

Gatabisse , én cachez poin dins vo dico Picard ch'est un mot qu'j ai invintion.né mi minme ! vlo dé ch'qui n-n'est !
A Bordeaux dins eune fabrique n'y-o énne gin qu'i o laissié un gatieu sains rien dire à pérsonne  dins cho's salle ouéche qu'o s'rapure un molé quand qu'oz  est r'cran* !  Fil a msure eq chés ovériers is s'abouloait't dins cho's salle is ont cru avoér énne bleuse vue* ! Un gatieu ?? N'y éroait ti quiqu'un qu'i fêtroait sés ages et qu'os ll'éroéme poin su ??

Daucun is n-n ont prins un morcieu!  Bérdafe !  Un momint pér après i s'sont sintu faibe  prét a quaire dins chés peumes .  cha n'est mie 'tonant* piq'dins ch'gatieu n'y-avoait du cannabis ! ch'étoait un collégue à eux qu'avoait volu leu foaire énne farce ! résultat eune peine d'amende pour ech gazier la ! T'as voulu foaire ech coup , bé t'éros ch'coucou !! 
Achteure os comprindez miu ch'tite ed min billet  ; (gatabisse) qu'est un touillache ed gatieu pi d'cannabis)

*R'cran = Fatigué
*Bleuse vue = Hallucination
*'Tonant = Etonnant

Prangère Suédoise

Edpis eune coupe éd jours chés Chinoés is viv'te inne épisode ed forté-caleur conme nouzote os ons yeu (pi qu'i-o coér dins sartain coin d'France) . Hormis qu'nouzote pour nos rafraichir os acatons dés r'froédichoérs* ; dés aréos* ; obien os freumons chés contré-vint dvant d'fouaire prangère* .

Mais chés Chinoés eux is n'foait'té mie d'imbaras aveuc tout cho . Nan, eux is vont diréc dins chés magasins d'meubes , pu précisémint IKEA  ! Pour eux ikéa i quait bien ...Ma pinse ; n'y-o dés lits , dés canapés pou s'rapurer un molé , dés tabes pour mier et surtout " LA CLIM" !
Ech patron i l'est un molé épiné d'vir tout cho ; mais i s'dit qu'après leu soukét * is poroait't pététe acater un canapé ! Edvant tout cha reste dés clients !

*R'froédichoér = Clim
*Aréo = Ventilateur
*Prangère = Sieste
*Soukét = Sieste ( plutôt utilisé dans le Boulonnais )

Ch'est Inoui

In-nhui  INOUI i l'o d'z ennuis !

Ech nouvieu TGV i sé sroait bien passé d'eune pubicité paréle pour sin premier voéyache  Avoéc cho'n nouviéle line Paris Bordeaux i l'éroait du  arriver à Toulouse in 4 heures , a plache ed cho i l'o mis 9 heures , a coeuse d'un eutre train qu'étoait in raque su chol line ! Manne un peu !!
mi j'dit qu'eune affoaire ainsin ch'est INOUI  ; ti poin vraï !!!

Érvlo chés sans dints

Ch't honme un Calaisien i raconte à Nord littoral (cho'g gazette) ...  J 'étoais in route à fouir min gardin quante  j'ai appercheu dés tchots tubes à terre . Édon j'décide de z-zés raveinne * pour miu vir cho qu'i o d-dins !

Dés dints !! dés dints m''z amis ! Pu d-deux chint dints dés grannes , des tchotes ed tous chés couleurs dins chés tchots tubes qu'o prins pour controler chés pichates ed chés gins ! Manne un peu ...
J'n ai yeu l'pieu d'glaine* , mes poilles i s'sont mis au garde à vous . Dés dints d'gins pi poin d'trop ésquintés coére .Chés gindarmes is m'ont dit d'ruer cho à l'ouste qu'is n'éront mie l'temps dé s'déplacher pour un ju parél ! Marche , j'ai obéi sans trop insister , j'voyoés bien qu'j écminchoais à z-zés dintier *
Pér après z'zavoér analysés i sanne à vir eq chés tubes is varroait't dé ch'l hôpital dHazebrouck
Qué l'affoaire porvu qu'inn'o un qu'i n'euche poin ein dint contré-mi !!

*Raveinne = Tirer vers soi
*El pieu d'glaine = La chair de poule
*Dintier = Agacer

Un sérpeint sans sonnette

Os ons ti idée ed débagager* pi d'laissier dins s'n appartemint un pithon royal ed pu d'un méte ed long sans rin dire à personne ?!

Nan mais o voéro d'toute  ! ch'est ch'nouvieu locataire qu'i sé n-n a appercheu  un bieu jour qu'i l'étoait su ch'trone i l'o vu ch'bétail vrimeux déssaquer s'tiéte dé l'cloison  . Pour se foaire ech proprio i l'o du appler un ageint national ed chés cache ; qu'i l'o maginé un piége pour ratriner chu sérpeint dins un tuyeu avoéc inne soéris coér fin vertillante* , pi un filet à l'eute bout dé ch'tuyeu pour el péquer  !

*Débagager = Employé ici dans le sens de déménager
*Vertillant = Remuant

L'Authieman*

Chon chint * pus d'chon chint sportfs qu'is sront in baie d'Authie el 9 ed juhiet  pour coeurir et nager. N'y-éro bien seur dés Français , édz'Inglais , dz'Américains , dés chiyéns* (sans leu traineaux  ...LOL) D'z Allemands pi chés Suédois .
Ch't aladon qu'ch'est pér eux chés Suédois eq toute i l'o cminché ; ch'est énne affoaire qu'a r'monte à pu d-dix ans asteure . Eune binde ed copains qu'is savoait'té mis dins leu caboche d'relier dés Iles in nageant ; pi dés z-zés traversés à pied  .
Ch't énnée chi ch'est in bais d'Authie qu'cha s'passero avoéc du nouvieu . Chés ésportifs is nageront in mer , rivière , lac
Vlo chu programme :
- Ch'l éstran : Ech pu aisé : 12 km à coeurir , pi 5 km à nager

- La madelon : 21 km , pi 3,5 km

- Pi ch'tilo pour chés crakes , l'Authieman :  28km à coeurir , pi 5,5 à nager

Alors' cha vous dit-i inne tchote vérlée in baie d'Authie el 9 ed juhiet au miyu d'chés deunes pi d'chés huttes ?!!

*l'Authieman = C'est l'Ironman de la baie d'Authie
*Chon chint = Cinq cent
* Chiyéns = Chiliens

Eune ville foérèt !

Os avez toudis rêvé ed vive dins eune cabéne . Fuche ! ...Asteure ch'est possibe ; mais feuro qu'os alliéche in Chine dins cho'v ville foérèt .  Dés batimints d'sur troés chint métes ed long , pu d'un million d'plantes et quate mille abes pour absorber chés gaz mawoés* et vous bailler un molé plus d'ocigéne* .
ch'est bieu mais feut ainmer chés bibaches* !

*Gaz mawoés = Pollution
*Ocigène = Oxygène
*Bibaches = Moustiques