mercredi 28 février 2018

Deurmir din un igloo

falloait y pinser !! Tout i l'o cminché à Bordeaux pér un ingénieur ed 26 ans éspécialisé din chés énergies r'nouvlabes !

Geoffroy ch'est sin tchot nom ( pour quiqu'un qu'i foait eune invintion conte ech froéd ...i porte bien sin nom) !!  Adon Geoffroy i l'o invintion.né un tube ed deux métes ed long , un méte vingte ed lérgue *, pi  quatré vingt dix in heuteur .  Pour cho'c coque ch'est du polyéthyléne . In d'dins pou ch'plafond pi à terre ch'est unne feule d'aluminium , qu'al résiste à ch'fu , et qu'al rinvoét choc caleur humaine .  Cha vut dire qu'os guégnez 15° raport a cho't timpérature ed déhors ; (pour unne pérsonne) . N'y-o ménme un tchot cassis* pour vir dehors quoé qu'i s'passe .

Pou l'momint Geoffroy i n-n'o ahansé* eune dijaines qu'is sont téstés pér des sans fu ni liu* à Bordeaux et Péris .  A intinne dire chés paures lazéres* :  Y-o plus ed plache eq dins eune tente , cha s'démonte in moins d'deu.ye . cha garde bien l'caleur , pi t'es poin mouillé conme inne glaine fraique quante i drache !  Ah , pététe ech cassi i poroait éte un molé pus grand pour foaire rintrer un peu plus el jour !!

*Lèrgue = Large
*Ahansé = Construit
*Sans fu ni liu = Sans feu ni lieu = sans abris
*Paures lazères = Pauvres malheureux


mardi 27 février 2018

Un boén fiu !

Un match éd foot au Portugal conme in'n o granmint in Europe el dimiche d'érmontée* avoéc dés nasus ( 8 , 10 ans) .

D'un coeup al 15ém minutes ch'l arbite i foait arter ch'match , a coeuse qu'i-o eine gin din chés gradins un molé épiné* i gueule , i s'délicote * conte chés jueux ed l'équipe adverse ed sin fiu !
El fiu dé ch't honme qu'i s'foait r'mertcher* i s'in vo vir l'arbite ; pi i dminde à l'arbite dé l'cowater* , ch'l arbite un molé étombi , i l'l éprins dins sés bros , et ch'tchot i li dit : M'sieur l'arbite , ej m'éstchuse pou l'mawoés comportemint d'min père !

Tartous chés gins du public is ont appleudis . Ch'père li , i l'o continué d'suire cho'r rinconte ramonchlé dins un racoin d'cho't tribune , tout moneu; tout péteu !!

*D'érmontée = Après midi
*Epiné = Enervé
*R'mértcher = Remarquer
*Cowater = Dorloter (employé ici dans le sens de faire un calin)


lundi 26 février 2018

Chés sogneux d'égvos

Chés  "palefreniers " in Français . Ch'est chétlo* qi'is sont imbeuchés dins dés haras ou d'grannes étchuries pour s'otchuper d'chés bidets !

Amon chés grands Bretons* ch'l industrie dés courses hippiques al s'inquiéte eq chés gins is dvienne'te ed pus in pus cros * .  Sié , ménme chés palefreniers ; pisqu'is sont étou amnés à agvaler* chés bidets , et surtout is n'doét't é-mie foaire pus d'chinquante sept kilos .

Édon si os éte palefreniers pi qu'os poésez* moins d'chinquante sept kilos ; seuchez qu'i n'y-o inter 500 et 1000 postes a pourvoér mon chés Inglés

*Chétlo = Ceux la
*Grands Breton = Anglais
*Cros = Gras
*Agvaler = Monter sur
*Poésez = Pesez

dimanche 25 février 2018

Cha sert ti a quétchose d'avoèr dés montan.nes ?

Cha y est ch'coeup y est foait cho'f flamme al est à peinne soufflée qu'os foaisons chés carculs ed chés médales à chés jux olympiques ed Pyeongchang  . A n'est poin fameux ; pisqu' os finichons al 9ém plache . Chés Norvégiens is términe't é-premier .

Mais qua-minme , n'y o quéqu'cosse qu'i n'torné-poin rond ! Écmint ésplitcher qu'chés Poéyis Bos is finit't é-chonquiéme ? Alorss eq ch'est un poéyis d'où qu'i o granmint  d'ieu.ye , pi qu'chu poin el pus heut i n'est mie pus grand qu'cho'd deune du Pilat !

Ed tout sén , si s'sont chonquième ch'est qu'is l-lé mérite !  Bravo chés z'Hollaindais !

samedi 24 février 2018

Cacouille

Ch'est un type qu'i va mon ch'docteur pisqu'i n'arrive pu bien à s'déhaler !

Ech métçin : Alors' quoé qu'ch'est qui vos améne ?

- Bén , hier au bal in dansant in rock j'ém sus tordu m'cheville*  ; pi asteure pus moéyin d'arquer !

- Ah ! Est pourquoé qu'os avez poin dmindé à ch'disque é-jockey qu'i vous passe la Bande a Basile !?

- Pourquoé la Bande a Basile ???

- Pachque ch'est LA CHEVILLE  qui redémarre ...


*Égville in picard

vendredi 23 février 2018

Calais seuve chés Inglés

Pér après avoèr sogné pu d'eune chintaine ed gins (éd'z inglés)  chés grands Bretons conme j'a quére ed z-zés només à l'hosto d'Calais , a coeuse eq din leu poéys ch'est batché à foait *

vlo qu'asteure qu'chés  grands Bretons is vienn't é-queur no glaines !! Figurez vous qu'cheul chaine ed réstauration rapite  KFC amon chés Inglés is n'treuv't é-pu d'poulets ... pénurie conme is dit't !

A Calais KFC is ont r'cheu unne drole d'édminde ; j'vous conte un molé  : N'y o un Inglés qu'i l'étoait télmint in manque ed sin r'pos* préféré , qu'i l'o dmindé a ch'réstauarnt Calaisien si i pouvoait li invoéyer sin plot* pér drone !!
La i "poussin" peu ; conme diroét't chés  tchots d'cho'g glaine  !!!!!

*Batché à foait = Rempli , plein
*R'pos = Repas
*Plot = Plat


jeudi 22 février 2018

I mainque un molé d'gingin

N'in vlo un d'gazier qu'i o oblié qu'chés cadoreux eux étou is avoait't chés réseaux socials ; ch'arnitoéle ; face ed madgette* , snapchat , tanq-é pi coér ....

Du coeup ch'gazier la i s'artreuvé in cabéne* . Chés gindarmes is ont déteupé a s'moaison vingt chonq grammes d'herpes , eune tchote barre ed résine ; pi sécant téléphon.nes !
Ecmint qu'is ont foait pour savoèr adou qu'i réstoait ch't apote la ? Ben ch'est aisé , is ont foait conme chés pratiques* qu'is vnoait't queur leu drogue , pisqu'i l'avoait mis unne tchote vidéo su chés réseaux socials pour és rinde a s'appartémint !
Chés cadoreux is ont déjo vnu a bout d'affoaire pu difficile  !!

*Face ed madgette = Facebook
*Cabéne = Cabane (prison)
*Pratiques = Clients

mercredi 21 février 2018

Ti t'éros l'médale éd la connerie

Chéri i feut appler DARTY , no télé al vo poin tarder ed quaire in raque ; vlo qu'asteure al foait dés neiches !

És n'honme qu'i est pérti queur eune bière din ch'frégidére i li déclaque :
-N'touche à rien s'péce ed badoule , én voés tu poin qu'éj sus t'in route à r'béyer chés jux Olympiques

mardi 20 février 2018

Eune deuxiéme pieu

Après cho'p puche qu'ovos intique din vo pieu ! Arrive su ch"marché un écran LED fin et soupe conme un pansemeint* .

Ch'est un japonais qu'i-o invintioné cha , i dit qu'cha sro granmint utilisé din chu secteur ed la santé . pour bailler chés données médicales a sin docteur qu'i est resté à sin cabinet !  o bien chés nazus is pourront communiquer avu leu grands pérents qu'is sont au diaboli* .

Bréf , ch'est du ménme parél eq chés smartphones , hormis qu'cha s'plie pi qu'cha s'plaque su s'pieu !

*Pansemeint = Pansement
*Diaboli = Loin

lundi 19 février 2018

Sin sac à main

In ch'momint ch'est nouvel an chinoés !  Dins chés rues n'y-o dés bieux spéctaques ! Dés dragons pér chi , dés gins qu'is dans'te , pi probabe étou qu'i n'y o eune ducasse , dés  manéches pour chés tchots . Et pour chés grands n'y-o ti dés manéches ??

In tout cas eune chinoise al o treuvé l'siénne ed manéche ! Cha s'passe à Dongguan din eune éstation* . Alorss qu'a dvoait quitter sin sac à main pour qu'i passe din chu scanner à bagaches ; cho'f fénme lo n'a janmoés prétindu laissier pértir sin sac tout seu , a coeuse qu'al avoait peur éq din ch'tube* n'y-o quiqu'un qu'i li dérouffle* sés doubes !!

Du coup a n's'a mie démonté ; al s'a mis à un genoux su ch'tapis roulant pour s'in r'déssaquer pér l'eute bout aveuc sin sac tojours bien accreuché à s'main !!
Os pérlez d'un tour ed manéche ; mi j'dis qu'ch'est l'ponpon !!!

*Estation = Gare
*Tube = Employé ici pour scanner
*Dérouffler = Voler

dimanche 18 février 2018

Troés chint billets

Vlo biétôt 1 an qu'j écris chaque jour un tchot billet un Picard , in-nhui ch'est l'troéchintiéme , j éspere qu'os n'n éte poin d'trop téné ! Ej pinse pô vu qu'os éte ed pus in pus nombreux à lire chés artics , inter 30 et 50 pérsonnes pér jour . Ah bin seur ch'est pas autant qu'min camarate ED éq cha doét foaire biétôt 4 ans qu'i l'écrit in Picard . Os pouvez r'béyez sin blog humeur et plaisi ( y-o un tchot lien din cho'c colonne ed droéte) .

Tous chés artics qué j'vous passe is sont sartifiés véritabes conme chés tchiens qu'is pich'te az'z abes ! Cha n'est poin dés mintiries . Édon , aujord'hui pour l'troéchintiéme ej va vous balez unne tchote cacouille , eq j'ai intindu a ch'poste éd radio (raconter pér J-M Bigard)


Ch'est un type qu'i taquine un molé s'fénme pour foaire un tchot calin .
És fénme al i dit : Acoute chéri , ch'est vraimint poin l'momint édpis 2 jours j'ai dés pertes blanques !
És n'honme i li r'tourne : Bén ch'est mie grafe ; mi j'ai du diabéte os frons dés meringues !!!

samedi 17 février 2018

Eune rute omelette !

Sié , eune omelette norvegienne  Asseuré qu'chés tchuisiniers d'la délégation Norvégienne à chés J-O d'Pyeongchang is n'éront mie cho' médale d'or ed chés préparateux !

A coeuse qué j'vous dit cha ? Ben chés tchuisiniers norvégiens is ont touillé toute , inne bérlure grosse conme inne vaque !! Normalmint is éroait't du cminder 1500 oeus !  Maginez l'tête ed chu chéf tchuisinier quante i l'o vu s'abouler ch'camion quérqué a ras la gueule ed 15000 oeus !
Pour seur qu'is n"minqueront poin d'proteines .

Un tchot carcul : 121 parsonnes din cho'd délégation , cha foait 124 oeus pér éstomac durant chés J-O !!!


vendredi 16 février 2018

El croésière s'amuse pus !

Nan mais o voéro d'toute . Ch'batieu d'croésière i l'o du foaire édmi -tour pour débarquere chés troés , quate houstabas* qu'is s'avoait't capignés* in foaisant la tchaine* pou s'n aller à chés watéres . Probabe qu'is avoait't é-leu prone* .

Tours est i qu'eune fénme ed 37 ans d'age al prins inne boutéle ed vin vuide * et al l'o bérzillé su l'cabus d'un honme ed 21 ans . Tout cho'c clique a s'a foait imberquer pér chés cadoreux à Sydney vu qu'a s'passe in Australie . Et dire qu'ech batieu i s'appelle el pacific explorer . Hummm ; poin granmint pacifique un ju paréle !!

*houstabas = Individus peu fréquentable
*Capigner = Se battre
*La tchaine = La chaine ( la queue)
*Prone = Cuite
*Vuide = Vide

jeudi 15 février 2018

Quo qu'tu baves

Ha ch'progrés , ch'est bieu ch'progrés ... Déns eune dijaines d'énées os srons intourés d'robots !
Pi si'qu'os suivez un molé chés J-O in Corée du sud , os érez pus vir qu'i y-o yeu eune déchinte à skis foaite pér dés robots !

du coup à voloèr métte dés robots tout partout quiques foés cha dérape ! Chest cho qu'i s'a passé   a Ankara ! Alors qu'un minisse étoait in route à foaire sés dviseries* su chés nouvelles technologies ; vlo ti poin qu'un  robot i y-o coupé l'sifflet in li disant " De quoi parles tu ? " obien coér " Parle lentement je ne comprends pas ce que tu dis !"

Ch'minisse un molé surprins , étombi ; i saque dés ziux conme dés prones et i rinfique : ceuss qu'is n'n ont l'résponsabilité dé ch'robot , is doét't é-l foaire taire rondébilis* !!
Ét dire eq cho'r réunion ch'étoait raport à " Un internet plus sûr" !!!    PDDM  (piche déns mes maronnes ) !!

*Dviseries = Utilisé ici dans le sens de discours
*Rondébilis = Rapidement

mercredi 14 février 2018

Feut miler chés horzins *

Sié , feut bien guetter chés visiteus qu'is viench't é-visiter chés catieus *  !
N'y-o poin d'fiate* à y avoér à chés gins . Quittez-l'lés chonq minutes dés ziux , et is foait't el carpin !

Un fu d'écminée i s'a déclarée au début dé ch'moés d'fevrier , a ch'catieu d'Chambord !
dehors i foait un froéd d'leu , pour récoeuffer un molé chés visiteus , ch'dirécteur dé ch'catieu i l'o décidé d'alleumer eune écminée , unne boéne blaquée al sro l'bien v'nue !

Mais allez savoér quoé qu'ch'est qu'i s'passe déns l'caboche ed chés gins ! Deux , troés gaziers is ont garotté quéques bûches (pi poin dés tchotes ... dés fameuses , pus d'deux métes éd long ) déns ch'foyer !  Coér bien qu'chés pompiers is s-sont rabzinés in moin d'deuye !!


*Horzins = Etrangers
*Catieus = Châteaux
*Fiate = confiance


mardi 13 février 2018

cirtchulez y-o rin à vir

Cha tombe un jour os voérez pététe déns ch'boin coin un morcieu d'route à vinde !
Nan, j'én déviens mie badeux ! Ch'est cho qu'i s'a passé in Chine déns un tchot villache .

Un honme i l'o loué inne pélteusse pi i l'o décoeupé huit chint métes éd route pavée d'béton edvant dé z'zés quérquer * déns un camion pou s'n aller z'zés r'vinde a unne fabrique ed matériaux ed constructions .
Edvant dé s'foaire péquer i n'n avoait  vindu 500 T pour 5000 yuans ( 640 €)
O va pas chinoiser tout d'ménme !!!!!!!

*Querquer = Charger

lundi 12 février 2018

Seurtez acoufté déns ch'villache Olympique

Pu d'treinte sépt ... Os vos dmindez seurmint ed quoé qué j"vux bien pérler ? Hein !
37 ch'est pététe el nombe ed médales eq chés Français is ramaront * d'chés J-O ! O peut toudis rêver .

Nan 37 ch'est l'nombe ed préservatifs qu'is sront baillés* à chaque ésportif . Ch'est unne méyenne bié-seur pisqu'is ont éstimés à pus d'chint dix mille capotes distribuées durant chés Jux Olympique .
J ai idée qu'déns inne coupe d'énnée y-éro la r'mise ed cho'c capote d'Or , d'argént et d'bronze !!
Déjo in 2010 à Vancouver ; i n'n avoait yeu pus d'chint mille ed distibuées ! Mais lo ch'est normal qu'os m'direz , pisqu'o dit toudis  "sortez van-couvert " !!  (Pas térribe el ju'd'mot, mais  ch'est lundi o foait d'sin miux ) !!

*Ramaront = Ramèneront
*Bailler = Donner


samedi 10 février 2018

El monopoly d'chés tricheux

Du nouvieu déns ch'ju d'Monopoly ! Edpis 1935 ch'est tour * parél i feut acater dés grannes baraques , éd'z hôtels pour qu'os seucheche * matché à millons el pus rade* possibe !!

Mais lo , vlo ti poin qu'is ont rajouté eune quinzaine ed carte déns ch'ju pour carotter* chés gins . Asteure os pourrez : seuter unne case , canger un hôtel ed plache , o bien barboter quéques billets .
Austôt qué ch'tour i est fini , pi qu'chol duperie à n'o mie été démucher ,  éch tricheux i guégne un hôtel , o bien dés pécaillons .
Mais si i s'o foait péquer * i vi diréc au violon avoéc dés ménottes in plastoc qu'is sont attaquées à ch'platieu* !!
Nan mais os voérons d'toute ....

*Tour = Toujours
*Seucheche = Soyez
*Rade = Vite
*Carotter = Tromper
*Péquer = Ici utilisé dans le sens de prendre
*Platieu = Plateau

vendredi 9 février 2018

Troésiéme mi-témps

Pour sur eq cho't troésiéme mi-temps d'chés jueux d'footé-ball dé ch'l étchipe ed Berlin , al est moins arrousée eq chélale ed chés hueux d'rugby !

Figurez vous qu'chés jueux d'l étchipe Berlinoése , timpe au matin al déjouque , is doét't é-réponne a un tchot quéstion.naire su leu téléphon.ne portabe . Rien d'trop ténant* pour euss . Vlo pér égzémpe deux , troés questions qu'is doét't é-réponne !

 Jou qu'os vous sintez ércran* al déjouque ?
Os avez ti bien dormi ?
Os avez ti du mau quiqu'pért ... A vo z'abatis* , a vou muskes ?
Al déjouque os avez ti vo chérvelle trutée* ? Os vous sintez ti épiné* ?

*Ténant = Fatiguant
*Ercan = Fatigué
*Abatis = Membres
*Trutée = Décomposé , altéré ( utilisé ici pour "stressé)
*Epiné = Enervé

jeudi 8 février 2018

Pérti à ch'camp d'soéle

Éh oué més gins , i n'fro pus eine réserve ed sé* !

Ed tchiéche qué j'vux pérler ??  Bén dé ch't honme qu'a défuncté à 113 ans d'age , din ch'sud- woé d' l Espagne . Né in 1904 ch'étoait l'honme el pus viux du monne .

Din chés gazettes ; is dit't qu'i mérchoait coér déns chés rues tout seu dusqu'a sés 107 ans . Et qu'i prindoait tout lés jours a sén déjeuner unne madeleine aveuc un verre éd lait .
stapindant* , cha n'a mie été aisié ed prouver s'n age ; a coeuse qu'i n-y o gramint d'archives public qu'is ont  cramés durant cho'g guerre civile ( 1936 - 1939)

*Sé = Sel
*Stapindant = Cependant

mercredi 7 février 2018

Seuce à l'oseille

Asteure quante os irez mier à ch'réstaurant os n'erguetrez pus cheul seuce à l'oseille conme edvant !

Dans l'Indre n'y-o eune coupe ed pratiques* qu'is ont du s'n aller à l'hosto à chés urgeinces quazi tartous au ménme momint !
Is ont passé inne sécant* d'égzaméns ; pi pour n'in définir ed s'apérchuvoér qu'is avoait't ingéré du canabis !
Ech réstaurateur i n'in réstoait  tout ébeubi , étombi , et i s'édminde écmint qu'chu canabis i l'o pu arriver din chés assiéttes . Bén ch't honme i l'o treuvé ch'bout qu'i va dvant , ch'canabis i l'étoait din un pot d'chés condimeints désséquis* qu'is serv'te à foaire el seuce à l'oseille !

Achteure n'y-o inne inquéte qu'al est  mnée pour sawoér quiéche qu'i s'faisoait du blé avu l'oseille !!

*Pratiques = Clients
*sécants = Gramint
*Condimeints désséquis = Condiments déshydratés

mardi 6 février 2018

Fidel Castro

Fidéle i est in train d's é-juer avoéc Dédé el fiu d'chés cinsiers qu'is rest'te à ch'coin dé l'rue . Un rute wépe ech Fidéle , un wépe à tchul gane .
D'un coup s'mère al l'é-crie : Fidéééééle (chés carrieux is nin tranne'te) n'oblie poin d'aller maison Maria queur chés eus , dépéque te pi arréte ed foaire el jacques , i vo biétôt foaire brun soér , habile tés gambes . Pi surtout prins soin dé n'poin n'in casser un in route .

Feut dire éq Fidéle i m'marche poin , i foait d'z ébondis du diabe , i est monté su dés r'sorts , alorss i n'est mie rare qu'i n'in berzille  un o bien deux . Ech vrépe i quait , nou Galibier i rinte à s'baraque ...

- Ah qua-ménme , t'as vu l'heure , feut coér qué j'prépare el souper !
- Quoé qu'ch'est qu'tu vos foaire ed boin  m'man   , eune omelette à sin cul ?! Afin j'veux dire  à cinq us* !
-N'té fout poin d'mi ; té l'voés chélale a t'pins au nez conme un sifflet d'deux sous , pi j'éspère éq t'as poin cassé d'eus  sin cha , bé à ti ; al ouve el boéte ...
- Ohh coér un d'cassé , n'in vlo d'assez el prochain coeup j'invoérai t'sœur  au moiss elle a n'casse é-rien .
Deux jours  pus térd ch'est Didine el sœur à Fidéle qu'a s'rind mon Maria .
-Bé, tin galapia d'frére i n'est poin lo in-nhui qu'al déclaque Maria ; i est malate ?
- Nan , eum mère al m'invoét à s'plache pach'qu'a dit toudis  eq  FIDÉLE CASSE TROP


*U(s) = Dans certains coins du domaine linguistique Picard on dit des " us" pour des œufs


lundi 5 février 2018

Néttier au Karcher

Cha m'foait rapinser à éne phrase d'un honme politique !
Hormis qu'la cha n'o rien à vir avu chés grosses légueumes ed politiques !  Ch't histoère lo a s'passe mon* chés Québéquoés , la bos n'y-o un type qu'i ranse* dén chés rues D'Montréal aveuc un Kartcher pour déffacer* tout chés graffitis mawoés* .

Probabe qu'o voéro pététe cho vnir in France pisqu'éch t'honme la i l'ainmeroait qu'a s'foaiche dén tout chés grannes villes du monne , grace à sén mouvemint " Erasing Hate "  qu'a vut dire " Effacer la haine " .
Pour se foaire i va laincher eine "Application" conme o dit asteure , qu'a vo signaler tout chés indroéts adou qu'i n-y o dés Tags . I va itou laincher un appel pour un fininchemint participatif et récouer* quéques pécaillons dén tout l'Europe !

*Mon = Chez
*Ranser = Errer
*Déffacer = Effacer
*Mawoés = Mauvais (ici pour dire haineux)
*Récouer = Récuperer



samedi 3 février 2018

Attintion piéton su l' BAU

BAU ; pour chétlo qu'is né l'sait't-é poin cha vut dire " Bande d'arrêt d'urgence "
Chés cadoreux is ont artés* un Inglés su cho'b BAU qu'i couroait conme un dératé , aveuc un caske à music su sés oréles , qu'éch son i dvoait éte à fond pisqu'i n'intindoait minme poin chés gindarmes qu'is li disoait't dé stoper sin footing

I l'o dit a chés gindarmes qu'i l'avoait djo pércouru pu d'chint trinte kilométes . I li mainquoait pu eq quarante kilométes pour érjoinne ch'l aréoport ed Lyon !
Ah chés Inglés... probabe qu'i l avoait dépinsé tout sés doupes mon ch'cabartier à siroter dés dmis pi qu'i n'avoait pu un radis pour prinne éch taxi !!

vendredi 2 février 2018

candeleur

In-nhui ech 2 d'février ch'est l'candeleur .  Au vrépe cha va sintir boin din chés moaisons .
Os avez dviné d'quoé qu'ch'est qué j'va vous pérler ... ed chés crêpes bé seur !

Écmint qu'o dit din vou coin ?  Nouzote din l'sud ed la côte d'Opale (Berck pi chés alintours ) os disons  dés CRAPETTES .
Daucuns diront dés RATONS ; o bien d'z ANDIMOLES !  Mais ratons ch'est ch'mot qu'est l'pu utilisé !  Noté bien qu'dins sartain coin d'la Somme o dit dés querpettes !!

Asteure cha s'dit moins , mais j'a djo li eq raton,  cha povoait désigner étou ech Watieu battu !

Quéques ratros :

- Té peux t'faire cuire dés crapettes au pétrole dins eune payelle in bos avoéc un manke in fer
  " Tu peux aller te faire cuire un œuf )

-Eun' tête ed crêpe pon cuit'  , et dés ziux d'cat mort !
 " Se dit de celui qui est de mauvaise humeur "

- I est blanc o dirait eune crêpe sans œuf
 " Se dit de quelqu'un qui est pale "

- A Berck  : Foére seuter énne crapette !

jeudi 1 février 2018

Fromache ed quéfe dins Paris

Bén n'in vlo d'un eute ; inne laiterie dins ch'18ém arrondichmint d'paris , pour chétlo qu'is qu'is connoait't ch'est mie loin d'la goutte d'or .

Pierre Coulon qu'i n'freume janmoés s'trape , harnéqué tout in blanc ,  i risote dins sés bérbes et i dit , chés gins is passt'te et is nous r'guétte œuvrer dins cho'b boutique qu'a n'est poin pu granne qu'inne boéte à fromache , aveuc tout sés frigos , salle d'affinache , et cuves ;pi ch'est sieus* qu'is s'intass't-é din un coin !
Allez foaire un tour un d'cés quate , ej vous in BRIE !!

*Sieus = Sceaux