Qué l'hardipache !

I l'ainme poin qu'o li dise NAN !  Ch'est s'mére à ch'morveu qu'al pérle ! Al est r'monté conme inne pindule avoéc un r'sort in bos !

Al vient d'récupérer sin fiu d'douze ans qu'étoait pérti d'pis quate jours à Bali in Indonsie , tout seu conme un grand . i l'o d'abord barboté* cho'c carte éd crédit d'ses pérints , i l'o prind l'aréoplane* sans t'éte intchiété ; arrivé à Bali i s'a inregistré à l'hotél ; pi loué un scooter , lapé inne biere .

Ch'est in voéyant inne vidéo dé ch'galibier din eune piscine  su chés réseaus socials qu'un ami dés pérints a prévnu la mére .
Chol tchote vérlée* al éro qua-minme coutée chon mille uros a lés pérints !! Qué monste !!

*Barboté = Volé
*Aréoplane = Avion
*Verlée = Virée

boén coeup su ch'boén coin

Doudou31 , ch'est l'surpitchet d'un maire ed villache in Heute Garon.ne qu'i vient d'éte condam.né a do'p prison aveuc sursis ! Au cminchemint cha pértoait dé ch'boin séns ; vinde su ch'boin coin  éd z'agobilles ed la commune pour rinflouer chés tchaisses .

Hormis qu'la , ch'est chés tchaisse à li qu'i rinflouait s'nom dé z'os la ! i n-n'avoait pour pus d'vingt mille uros qua-minme !
Doudou31 , qu'i porte bin sin nom ; t'es doudou qu'is dit't-é a mzure chés tchots ! bén doudou 31 i l'est pus la d'éte éli .

El queue d'nou cat al est bien vnue

Ch'est vrai tout i fini pér arriver un jour ! béyez cho'f fénme  , Guadaloupe inne mexicaine ed 96 ans d'age .
Al o passé s'n infance à aider sés gins , a plache d'aller à l'école al tchultivoait d'z haricouts , pi ch'maïs . Quante al o té pus granne al o vindu dés glaines su ch'marché , et pi à forche éd vinde dés glaines al o cinsémint treuvée un co ; pi a s'a mériée ( deux foés) ; et yeu six bieu z'éfants .

Edpis ch'momint lo , probabe qu'a dvoait awoér eine trintaine d'énnées , al o toudis foait l'ménme rêve . Os avez chon minutes ?

Ech déclic i s'a produit à 92 ans quante al o décidé d'apprinne à lire , edpis ch'témps la pu moéyin d'l arter . Arnétchée conme chés étudiants d'l école ; cotrons noérs , caracos blancs , et  s'tiote touche a elle ch'est d'métte un gillet  rose éc dés tchotes pérles acreuchées d'sus.

A y est,  elle est fin prête pou sin premier cour ed chimie , pi d'carcul , al o ménme apprins l'danse ed sin poéys s'nom dé z'os la !!  Al o coésie ch'programme "accéléré"  Accéléré ?? A coeuse qu'al est présséïe  ?  Quoé qu'o peut bien awoér d'eute à brasser à 96 ans ?

Ben , os advinerez janmoés més gins pour sés chint ans al vourroait t'éte institutrice ed crèche ! Bé la ch'est toute ... Dautchuns diront eq quanq'o vient viu o r'vient un éfant , inne histoére ed "couches" pététe !!  N'ém foaisez poin dire la ch'qué j'n ai poin dit .

Quoé qu'i vo coér m'arriver

Agé d"vingt ans chu jonne améritchain lo,  i l'o quére ed fouaire do'p planque à glincher su chés vagues .

Mais l'eute jour à Hawaï i l'o bin falli pérde és gambe ; piq'i s'o foait attaquer pér un r'quin tigue d'inviron deux métes . I l'o réussi à nager in r'guégnant la côte ; au final sept points d'sutures qua-minme !

Ch't améritchain la , ch'est un aveinturier , in'n o yeu des ruses , in quatre ans béyez ch'qu i y est arrivé : L'o té mordu pér un serpeint , un matin i s'a ecanillé avu s'téte din l'djeule d'un ors , pi lo i l'o falli perde és gambe !
Mi j'sroais d'li ej cangeroais d'ouvrage , népoint !!?

Barbékue mortel !

Qué décarsure* mes gins ! Jou qu'o peut mouérir in foaisant in barbékue in France !

Sié , malheurésmint . Ch'malheur i s'a passé au " Boule ou" ch'est vrai quante oz i pinse minme din ch'nom dé ch'villache i'y avoait djo un mystére ! In vérité ch'est l' Boulou , mie loin d'Perpignan

Ch'paure honme i l'étoait in route à griller  sés morcieus d'viannes ; quante tout d'un coeup n'y o yeu inne ésplosion ! Ch'est inne boule ed pétanque qu'a l'avoait té obliée din ch'barbekue , pi in étant coeuffée à blanc al o ésplosée .
Soin* , chés bieus jours is s'aboul'te ; ravisez bin vo barbékue edvant d'i bouter l'fu !

*Décarsure = Malheur
*Soin : Attention

Chés mouques incaleuréïes

Ti pi mi quanq'oz o coeud os trainspirons , chés tchiens is hans'te* , chés cats is léqu't-é leu poilles . Adon chés mouques eux , écmint qu'is foait't ?

El chrysomya megacephala al mainque poin d'gingin . Al déssaque dé s'bouque quiques gouttes ed baves , qu'al rintique din sin gavio austot* sortie , ch'est cho qu'i li baille un molé d'fraicheur .
Ch'est bieu la nature , in attindant miu . Quante chés mouques is éront un molé puss d'acatoéres is porront s'acater ein érfroédichoèr *

*Hanser=Haleter
*Austot = Aussitôt
*Erfroédichoèr = Souvent utilisé pour parler du frigo ; ici employé pour désigner une climatisation

Canger d'nom

Poin d'sin nom d'famille ; nan ! Ch'est l'roé Maswati du Swaziland , i y-o prind l'lubrie* ed canger l'nom d'sin poéys .

Swaziland a s'treuve inter l'Afrique du sud pi ch'Mozambique  I l'o décidé asteure qu'a s'appelero  eSwatini  , éq cha vut dire el poéys des swazis din l'patois local !
Tertous chés gins i leus ons posé l'tchéstion , porquoé qu'os canger ti d'nom ?

I l'o rinfitché qu'étoait à coeuse ed chés poéys horzins* ; drés qu'i s' n allait à l'étringer chés gins is s'berluroait'te aveuc el nom d'sin poéys Swaziland aveuc chti d'chés  Suisses " Switzerland"
Mi cha m'froait putôt pinser à un pérc d'attractions !

*Lubrie = Envie
*Horzins = Etrangers

Gréve à chés écmints d'fer

Eune rute dringuéle

Dringuéle ch'est un pourboére ! A s'dit surtout din chés mines o bien vers Lille . Nouzote su la cote os disons putôt , un prét , ou s'n infie !

Adon ; mon chés ritchains din éne réstaurant d'chicago n'y a inne pratique* qu'al o tchitté * 2000 $ ed pourboére ! Ch'est rére autant d'pécaillons , heureusmint pou chés serveurs piq'is sont gramint poayés aveuc chés pourboéres !

Pi ch'est poin toute ; edvant d'pértir ech't honme i l'o dmindé d'aller din chés tchuisines , et pi pér après awoér jablaté aveuc chu chéf ; i s'o aboulé vers chés tchuisiniers pi i leu z'o baillé à chatchun 100$ ( is étoait't é-qua minme 17 tchuisiniers ) ...Ch'est bieu tout l'monne n'él foait poin !!

*Pratique = Client
*Tchitté = Donné

Cafougnette

Ch'est l'maitresse d'école qu'al appelle maison cafougnette pour pérler à sés pérints , mais ch'est cafougnette qu'i décreuche .

Cho'm maristresse al dit : Peux tu m'passer t'mère cafougnette sans t'écmminder .
- Nan pachqu'al prind s'douche
- Ben ch'est mie grave , passe me tin pére !
- A n'est mie possibe , i prind s'douche étou avoéc ém mère .
- Ah ! Pi croés tu qu'cha coèr  vo durer longtemps ?
- Oué , coér assez ...
- Pourquoé qu'tu m'dit cho ?
- Ben is m'ont dmindé ch'tube ed vaseline , et pi j'leu z'ai don.né ch'tube ed colle !!!

Dragon

In ch'momint dés dragons o povez n'in vir a houle* din chu ciél ed Berck ! mais tout chés dragons n'sont mie des cerfs volant !

A quéménès eq ch'est eune tchote ile du finistére in bretagne .deux ingénieurs ed formation , is ont démuchés quétchose qu'a r'sanne à unne bainoère ; mais quoé qu'cha n'n est au jusse ?
Coér bien qu'i avoait eune plaque édsur avoéc mértché SPACE X  . Ch'est unne sociéte qu'al invoé des fusées pou cho's station spaciale internation.nale!

Qué rapport avuc dragon os allez m'dire ?  ESt simpe ; ech nez d'cho'c capsule i s'délonme DRAGON ch'est un vaisseau cargo qu'i s'otchupe dé ch'ravitaillemint d'l ISS !!

*A houle = Plein

Du sin-boin din ch'métro

Est vrai qu'a n'est poin aisié pou chés avugues* dé s"diriger din ch'métro .

Din qué sins qu'is voaich'te* , ch'est ti a main droéte o bien gueuche ! Suffiroait poin qué j'm értreuve a l'arbout dé ch'boin sins !!
Din chu métro d'Rennes is ont yeu l'idée ( pou l'premiére foés in France) ed bouter* du parfum su chés quais , pi dusqu'in heut dé ch'l éstation , piq 'i feut qu'chés gins is l'nifft'te drés qu'is arrive'te .

Un sintimint iodée pou s'n aller din sins , et pi un sintimint poévrée pou s'n aller à l'arbout
i n'n o qu'is n'mainqu't-é poin d'gingin !

*Avugues = Aveugles
*Qu'is voaich'te = Qu'ils aillent
*Bouter = Mettre

Mérche arriére toute

In Inde is ont inne drolé éd ménière d'avincher !  I dvoait y'avoér à peu prés mille gins din ch'train qu'is leus in alloai't tartous din l'ménme sins , forchémint !!

Wate ! Quoé qu'i s'passe , tout d'un coeup ch'train à plache d'avincher , i pérte à l'értchule !  Chés vingt deux wagons is vienne'te dé s'détacher d'la motrice , ch'train i r'tchule .  Daucuns diront ménme qu'is ont rapassé dvant leu moaison qu'is avoait't quitté y-o peu d'temps ! Ch'est retour vers le futur un jus parél ! Point ?
Is ont réussi a arter ch'train 12 kilométes pus loin . Coér qu'i n'y o poin yeu d'morts ni d'affolés .*

*Affolés = Blessés

Chacun sin pain , chacun s'n hérin

El fontainne éd chés ions*

Mi qu' j én sus poin un matché d'footé-ball ; hier au soér , j"ma dit : Bé a coeuse éq t'erbeyeroais mie ch'match ed chés marseillais conte chés allminds !
Qué bieu match , j n'ai poin r"grétté d'l avoér erbéyer ! Falloait mie éte prins du tchoeur !

Mais ch'est mie dé ch'match-é la qué j vux vous causer  . Din min jornal ej voés un honme din unne fontainne , cha arrive qu'os m'direz , quante i foait koeud din chés bieus jours , o l'voét souvint din chés grannes villes !
Hormis qué ch't honme lo i l'o du raquer eine ameinde ed 450€ . Feut dire étou qu'cha n'est poin n'importe qué fontainne , ch'est l'fontainne dés ions à Rome . Pi ch't honme qu'i l'o yeu l'ameinde ch'est l'Boss ed l'étchipe ed la Roma . I sanne à vir qu'i l'éroait té poussé pér chés supporters qu'is étoait't épinés s'soèr la , a coeuse eq  leu étchipe ed la Roma a vnoait d'éliminer chés Barcelonais .

Ech't honme i n'o poin térinté* . I l'o satché chés 450€ . Pi in ramindo* i l'o baiyé à l'mairrie d'rome un chéque ed 230000€ pour rindimincher cho'f fontainne du panthéon !
Capieu bas ,M Pallotta

*Ions = Lions
*Térinté = Hésité

Boutique ed cowatage

Tout l'monne i s'raminteuve qu'i o inviron inne tchote dijaine d'énnés eq ch'étoait la mode dé s'prinne din lés bros avuc un horzin *din chés rues pi dé s'cowater* durant inne sécants d'ésgondes is apploait'tcho chés "free hugs" .

Mon chés ritchains n'-y o eune fénme qu'al overt unne boutique poin ordinaire à Portland . Os rintrez , cho'f fénme(la patron.ne) al s'assie , o bien al s'allonge . Pi vous , chés pratiques* qu'os soéyéche un hon.me o bien unne fénme , os vous asseyez au coté d'elle , vo téte su s'n épeule  , o bien os vous allongez su chés grons , et cho'f fénme al vous cowate , al vous afflate , al vous dit inne coupe éd mots qu'os avez quére d'intinne !

Soin ! i n'y-o rin d'séssuél la d'din ch'est écrit d'sur inne plancarte* in grand ! (m'afin y'o qua-minme granmint d'marle )  Ch'est pour chés gins qu'is sont "stréssés , tout seu , abaindon.nés ; o bien tout simplémint einvie d'jablater . A n'est mie donné qua-minme ; 1€ l'minute !!!!!

*Horzin = Etranger
*Cowater = Choyer , dorloter
*Pratiques = Clients
*Plancarte = Pancarte

Un batieu écrabouille inne villa

Ecmint qu'cha s'peut qu'os vos disez seurmint ?
Cha s'passe à Istanbul su ch'Bosphore  (ch'est un coin d'où qu'i n'y o poin d'chomache ; pisque chés gins la bos ...I BOSS FORT )  Oué , bon j'arprins l'pose !

I sanne à vir qu'un cargo ed deux chint vingt chin métes  éd long  i l'euche yeu un probléme téchnique conme o dit ; et i l'o pértchuté inne villa ahansé* pér chés dinitaires ottomans a ch'dix neuviéme siéc su chés bords du Bosphore .
Mon chés Turcs is appél't-é cho dés " Yalis" .
Ch'l édifice i est in bo * , su troés étages , pinturés in rouche . I s'a cazimint éffondrés ! Qué décarsure* més gins !!

*Ahansé = Bâtie
*Bo = Bois
*Décarsure = Malheur

Line dariel & Simons

Ch'est rére qué j'vos bale eine tchote vidéo d'patois ! Portant , mi j'dis  qu'pour bin s'imprégnier d'eune langue , i feut l'l intinde 

Chu gvo qu'i chuchotoait a l'oréle ed chés gins

Péyo ch'est un gvo . Soin ! poin un gvo d'chu grand prix d'amerique o bien d'l arc éd triomphe .
Nan , li i l'attind poin qu'cho'p porte al s'ouve conme edvant l'départ d'unne course . Péyon chés portes  li,  i z'zés pousse sans rin dminder à pérson.ne , ch'est slon s'qui sint , ch'qu'i r'sint .

Péyo i ranse din tout chés z'hopitals ed France . Quante i s'arréte edvant inne porte ed cambe;  éch'bidet i sait ; i sait qu'in-n'din , n'y-o quéqu'un  qu'i l' o bsoin d'ayude . Chés cérusiens is sont tnus pér chu scrét médical  . Mais à intinne dire din chés colidors ed l'hosto qu'i n'y-o dés malades qu'is n'pérloait't pus d'pis dés moés , ch't aladon qu'is leus ons mis à pérler drés qu'péyon i l'o rintré din cho'c cambe . Manne un peu ...
Pi ch'est poin toute . D'z eutes gins is s'sont mis à mércher , alors' éq cha fsoait dés moés qu'is n'pouvoait't pus arquer .

Souvint ch'bidet i l'o unne méniére à li ed débéyer chés gins . I sanne comprinne miu qu'pérson.ne cho qu'i s'passe din l'téte ed chés malades . I l'acoute , o diroait ménme qu'a mzure i bale és'téte pour awoèr un bé  !  Chés blouses blanques  is n'in sont tout ébeubis , Oz intind ménme dire din chés couloérs eq péyon i froait un boin cérusien .

moaison bien coeuffée

Os cachez unne granne moaison aveuc un coin d'terrain ; pi granmint d'histoére ! Mie d'probléme j'ai l'l ai din m'carnasse !

Din les Yvelines , su 6000 métes carré d'terrain , à 60 km ed Péris , inne moaison avoéc granmint d'histoère ! Os srez bin coeuffés , ech poéle i  blaque* à mort (si j'pux dire ainsin) ...Piq'ch'est l'baraque qu'al o apparténu à ....Landru ; sié , Henri désiré Landru . onze fénmes quérbonisées din ch'poéle !!
Allez vous in vinde un bien paréle , qu'i déclaque ech l'agint immobïer !! poin aisé !

*Blaque = Flambe

Chu commissariat bin noté

Dés gins qu'is sont in garde à vue eune jornée in'n o a-ti a masse* in France !
Mais ch'est bin l'premier coeup qu'i-o quiqu'un qu'i laisse eune note d'sur Google . Raport a cho'p prison d'Metz.
Ecmint qu'chu pérsonnel i s'a comporté avoéc li ; chés gayoles* is sont ti bien intretenues , cho'p prison étou !

Bréf , eune vraie note qu'a r'sanne un molé a s'y méprinne à chés avis qu'o démuche d'sur TripAdvisor.

A ti a masse = Beaucoup
*Gayoles = Cages (ici pour désigner les prisons)

Driiiiiiing !!!

In Australie dés milliers d'gins el ménme jour is sont tartous arrivés in r'térd à leu travail . Cha n'est mie qu'is euch'té foait la fête , o bien qu'is étoait't morzifes ; nan is n'avoait't  cinsémint rien lapés .

Ch'est jusse eq leu portabe i n'o poin son.né . A coeuse d'un BUG informatic qu'i o déréglé tout chés smarfon.nes . Qué jus !! Chés téléfon.nes is leu z'ont mis à son.ner inne heure après ! Manne un molé

Ah qu'i l'est bieu ch'progrés . Mi j'dis rin d'miux qu'chés viux révéls d'sur pattes aveuc deus oréles pi ch'martieu qu'i buque édsur . Pour seur eq cha foait un buzin* du diabe ; mais au moins os éte réveillé. DRIIIIIIIING ...os l'intindez ti ? !!

*Buzin = Bruit

Eune arme din ch'certcheuil

Ch'est un passant inne darainne foés cho'b boéte à dominos* a chu scanner , qu'ech sevice ed chés pompes funébes ed Nice  is ont démuché un pistolet au coté dé ch'défunt !

D'habitude qu'i dit ch't imploéyer o treuve putôt un pacemakers . Mais un pistolet ch'est rére !
Ch'est s'fénme à ch't honme qu'al l'o aplaché lo ; ch'étoait l'darainne* volonté d'sin méri , pisqu'i l'étoait matché* d'cache !!

*Boéte à dominos = Cercueil
*Darainne = Derniere
*Matché = (Maqué ) = Mordu , passionné

ch'l érnouvieu

Vlo ch'l érnouvieu qu'i pointe el bout d'sin musieu , ej vous bale eune tchote vidéo , adou qu'oz intind Joël Dufresne su France 3 Picardie qu'i nos pérle un molé d'chés fleurs pi d'chés moénieux ! Ch'est fin rétus ; ch'est qua-minme dommache qu'i n'foaiche poin tout s'rubrique in Picard ! M'afin ch'est miux qu'érien ; népoint !! 

M'arvla !

Ej m'éstchuse , j'avoais oblié d'quitter un tchot billet in disant qué j'pértoais 8 jours in vagances din l'midi , pi conme j'én prins poin min manicraque , ch'est pour cho qu'os avez té unne ésmainne sans m'vir ou tout du moins m'lire !!

Edmain os r'mets ch'coïer , i feut bien guégner cho'p pécaille qu'os ons dépinsé !
A dmain pour un nouvieu billet !  Adé éz Zéf !!!!!