darinne cacouille in 2018

Hier timpe au matin ej su t'aller vir min chéf , raport à ch'que Macaron* i l'a dit l'eute coeup a ch'poste ed télé ! J'm aboule din sin burieu ...

Bonjour chéf ej viens ichi vos vir pour savoér si os allez fouére éne saquoé* pou cho'p prime ed Noé , eq nou présideint i l'o dviséïe al télévision .
Sié , qu'i m'artourne , j'ai quétchose d'éspécial rin qu'pour ti !
Ahh !! Qu'j i rinfique ; et quoé qu'cha n'n est-i ??
- J'va t'don.ner un billet de TAC O TAC !
- ??? A coeuse qu'os allez m'bailler* un billet ed tac o tac ?
- Bén conme cha , cha sra l'premiére foés que j'té voérrais GRATTER !!

*Macaron = Macron
*Saquoé = Quelque chose
*Bailler = Donner

Condamnéïe à r'béyer " bambi"

David ch'est un type qu'i vit din l'Missouri mon chés ricains , li pi ses pareintés is sont atchuséïe ed bracon.nache .
Is sont atchuséïe d'avoér éscofiéï * dés chintaines ed cerfs pi d'chevreuils durant troés ans .

El chéf ed cho'b binde ch'est David , peuq'manquer ch'est li qu'i s'a prind inne peine ed prison ; mais ch'est poin toute durant s'détention i l'est ténu ed raviser inne foés pér moés Bambi , el graind classique ed walt Disney , qu'i pérle d'un faon qu'és mére al a étéï tuée pér un cacheu* !!

Ah chés américain.ye ch'est dés rutes wépes !! 

*Escofier = Tuer
*Cacheu = Chasseur

Mariache à ch'péache

Hier un coupe ed gilet gane i s'a mériéïe à ch'péache ed Séméac din chés heutes pyrénées .

Inne vrai cérémonie républicaine , i s'sont mériéïe la d'où qu'i s'sont rincontréïe . Ch'est eune fénme gilet gane qu'al est dévnue maire dé ch'péache pi qu'a z'z a mériéïe in leu disant ed vive d'amour pi d'ieau fraique , vu l'conjoncture du momint !!

Elvis in vérdé-rouche

A Friedberg in Allemagne quante ech fu d'signalisation pour chés piétons i passe au vert , ch'est " Now or never " qu'i feut trécoeuper* cho'r route .

Ch'est la din cho't tchote ville allemande qu'Elvis i l'a été soldat ; ch'est pour cha qu'la ville al a mis troés fus pour piétons . In verde* ech tchot bonhonme i s'tortigne din tout les sins, avu chés tubes "love me tender , o bien return to sender . Et pi du contraire quante ch'est rouche i l'est atampi* dérriére sin micro .

Cha n'a mie ch'prémier coeup qu'eune ville Allemande al rind hommache à inne gin important d'leu poays . Pér égzémpe à Bonn n'y-a un fu qu' rind hommache à Beethoven ; pi à Tréves ch'est ch'ti d'Karl Marx .

*Verde = Vert
*Trécoeuper = couper , traverser
*Atampi = Dresser , debout

Ed'z hôtels poin ordinaire

A tokyo n'y a un hôtel vu d'dehors qu'i r'sanne à gramint d'eutes ! Mais inne foés qu'os srez d'din os srez acceuillé pér ...deuw dinosaures , képi d'bagagisse incriquéïe su leu cawoéte ; is s'érmut'te* din tout lés sin à l'aproche d'eine pratique* .
Mais n'comptez mie su li pour qu'il inregisse vou nom pi qu'i vou baille vo clés ! Nan , ch'est vous qu'i vous triboulerez * avu ch't écran tactile !! 

Din ch'colidor os croéserez un robot concierche , pi inne foés din vou cambe , n'seuchez mie surprins ed vir un robot qu'i passe el chuche porette* .
Tout l'monne treuve cha rigolo , surtout chés tchots quante is voéy'te eq minme chés pichons rouches ch'est dés robots .
Daucuns diront qua-minme qu'is n'sont poin contint , in cas d'probléme i n'y a pérsonne à qui pérler .

I sanne à lire equ'chés nipons is vont coér én n'ouvrir chonq d'hôtels , mais à plache d'awoér des dinosaures à l'atcheuil , cha sro d'z humanoïdes.
A n'est mie qu'chés japon.nés is veut'té bouter* des robots tout pértout , mais is dit'te qu'is n'treuve'té poin d'pérsonnel hôtelier !

*S'érmut'te = Se remuent
**Pratique = Client
*S'tribouler = Se débrouiller
*Chuche porette = Suce poussiere = Aspirateur
*Bouter = Mettre

Sourd mais poin avule

Chés grands magasins Auchan is rind't-é l'imbauche ed chés sourdious , chés sourd-oréles , pus aisé , surtout pour ceuss qu'is sont imbauchéïe à chés caisses 

Prindez pér égzémpe l'ypermarqué ed Roncq (59) ; deux caisses ont té aménagéïe avuc unne leumiére à plache d'un bip sonore quante is pass't-é chés produits su ch'lazer .
Conme de bien , dés qu'cho'l leumiére al s'alleume cha vut dire que ch'produit i l'o bien étéï inregistréïe .
Ch'est moins tenant* pour chés mal intindant ! 

*Tenant = Fatigant
*Sourdious = Sourd

Ch'ti jornal in picard d'sur facebook

Cha foait inne coupe ed moés déjo eq j ai crée ch'ti jornal in picard d'sur facebook ! !
Oh i n-y a poin d'surprise chés billets is sont lés minme qu'ichi , hormis qu'sur facebook os povez z'zes lire deux , troés jours edvant qu'is s'dessaqu'té su min blog !!

Os dvez seurmint vos dire , siq chés lés minmes billets ; porquoé qué j'vos in pérle !
Est simpe conme bonjour … Si os avez invie d'perler troés quate mots d'picard est vraimint pus aisé dél fouére su facebbok , putôt qu'su ch'blog ! Su ch'blog ch'est tenant (fatigant) si qu'os voudrouéte ém laissier un méssage i feut fouére toute éne manipulation du diabe !
Atandis qu'dsur  facebook ch'est simpe ; i suffit jusse ed buquer su ch'méssache " demander à rejoindre le groupe "  mi , ej vous accepte ….pi ch'est pérti os pouvez vous edviser in picard , patois , ch'ti , cho qu'os voulez !!
Alorss ; os y aller ti non dés z'os !!

Ech'pu tchot aquarium du monne

A Boulonne os ons ch'pu grand aquarium d' Europe (Nausicaa) . Mais à Escalles à quéques lieux* d'calais os avons ch'pu pitit aquarium du monne …

Ch'est dés belges qu'is l'l ont déteupéïe , su ch'sape à quiques métes ed chés falises . Un aquarium rimplit d'ieu.ye avu chinquante pichons rouches éd-din .
Os n'somme portant poin ch'preume d'avri !!

*Lieu = Mesure itinéraire valant 4km

Dés rutes wépes chés inglés

Os savez conme mi qu'édvant d'écmincher un match éd foot , ch'l arbite i saque inne piéche dé s'poke pi i foait pile ou fache pour savoér din qué pértie dé ch'terrain chés étchipes is vont s'éjuer …!

Oués , mais cmint fouére quanq'os ons poin d'piéche ! Ch'est ch'coeup d'malsaveur qu'est arrivéïe à ein arbite in Ingleterre jusse edvant d'inroéyé * i s'a apercheu qu'i n'avoait mie d'piéche ; alorss i n'sa poin démontéïe , i l'a proposéïe à chés jueus ed fouére : cailleus , feule , cisieus ( Pierre , feuille , ciseau) Ch'est gramint din chés poéys zaziatiques * qu'ont foait cha pour tirer au sort .
Ed tout sin cho'f fédération inglése ed foot al n'a poin yeu quére un ju parél , adon al à mit ch'l arbite à joc* troés smainnes .

*Inroéyer = Commencer
*Zaziatique = Asiatique
*Joc = Au repos plus ou moins longtemps

Soin , os éte miléïe

Ésmainne passéïe à Arras à chu festival du film . Atandis qu'is passoait't un fime qu'i s'délonme "la favorite " . Din cho's salle y-avoait deux ou troés gins qu'is n'erbéyoait't poin ch'fime , is gognoait't , is miloait't , lés eutes gins , avoéc inne sortes ed leunettes éspécials , des leunettes qu'on peut vir aveuc pér nuit , un molé conme chés cacheux qu'is aplach't-é cha su leu fusils pour cacher quante i foait noér .

A coeuse qu'is foait't cha ? Ben , ch'est pour vir si n'y eroait poin d'z éspéctateux qu'is einregiste chu fime avu leu téléfon.ne portabe o bien inne caméro .
Pachque ch'est producteux is n'in sont réyus* ed treuver leu fime su l'arnitoéle* a peine qu'i seuche déjo sorti din chés salles .

*Réyus : Lassés , fatigués
*L'arnitoéle : La toile , le net

Cha quait a dréme *

*A dréme = ça tombe bien ( utilisé localement)

Oz est janmoés miu sérvi qu'pér li minme

A Marseille i n'n a sartains qu'is n'passe'té poin leu pérmis d'rouler conme ti pi mi .
Mi quante j'a étéïe à ch'l éxamén dé ch'pérmis , j'ém raminteuve d'y-avoér aller in mobylette . O bien os pouvez étou vos fouére conduire , din ch'cas la , os éte assis su s'siége passager , népoint ! . 

Mais li ch'vastépluque ed Marseillais , fier conme un tchot banc , i s'a rindu à ch'l éxamén in conduisant li-minme éss n'auto .
In voéyant cha , chés éxaminateux , is ont appléïe chés cadoreux* , pour péquer ch't hocleux qu'i n'pourra pu passer sin pérmis dvant chinq ans , pi inne belle ameinde ed 15000 € pér dsus l'marché .

Mon Ch'docteur

Os ons l'droét d'reuver

Os ons tartous dés rêves din la vie . Un tchutéreux chinoés , sin truc à li ch'est chés aréoplanes , i l'est ravagéï ed cha , i l'a tours rêveï din piloter un ; mais cmint fouére quante on est un paure cinsier . 

Conme on est jamoés miu sérvi qu'pér li minme , i l'a décidéïe d'in construire in plein miyu d'sin camp ; à l'équelle 1/80e , qua-minme grand assez pour dire qu'i n'in foaiche un réstaurant .
Ed tout sin , pou l'momint i n'pilote poin s' n aréoplane , mais i pourra toudis fouére dés "vols au vent" . 😉😉😉

Marathon , houblon

Conme j'in dvisoais hier din min billet , on peut apprinne à connoaite chés bieres din dés salons , obien dés festivals .
Mais pas que… Os pouvez coeurir pi laper inne sécant d'gobes ed biere ed tout lés sortes .
Autant vos dire eq chés 600 pérsonnes qu'is participoait't à l'course ed la biere in seine et marne is avoait't "la pression" .
Ma pinse ! Déjà i falloait coéjir inter 6, 12, o bien 25 kilométes . (Tanq à fouére inne course ed la biere , mi j'éroais coéji " 16 ou 33 " 😁) .

Au momint dé ch'ravitaillemint éne cachez mie pér après chés boutéles d'ieu.ye o bien d'jus d'fruits ; ch'est do'b biere pour tartous ; mais foque inne litchette , os étes mie la pour éte quérvéïe dés quates pattes . Alors' tout chés pots à gouttes passez vo kmint !

El cassoul'ale

Él cassoul'ale , ch'est conme cha qu'a té présintéïe cho'b biére amon ch'féstival octobiere ed Toulouse .
Un tchot molé d'jus d'vianne ; pi d'z haricotes , el sintimint d'un boin bouquet garni pi du malt qualiteu , et ch'coeup i-est foait .

Vla inne biere au gout d'un boin plot saleï ...el biere cassoulet .
Ed tout lés manieres , avoéc un breuvache à 4° , os pouvez n'in chiquer dés pintes edvant d'éte un "cas soûlé "🍺

Teupé pér sin blanc bonnet

Hier j'vos dvisoais d'chés péruviens , ben aujord'hui j'va coér vous n'in causer d'chés jueux d'flutes ed pan !
ch'honme i veut quitter s'fénme à coeuse ed google maps !
Alors' qu'i préparoait su l'arnitoéle* , sin voéyache pour pértir avoéc és fénme . In ravisant google maps , ech t'honme i l'a r'connue sin blanc bonnet in route à caresser lés caveux d'un honme allongeïe su ses jnoux .

Magré qu'chés trognes is seuch't-é brouilléïe su google maps , i l'a bien r'connue s'fénme à ses habits .
Bén voila , is sont tout r'vénus ; is iront à l'hôtel du tchul tournéïe .

Maire à lurlure

A tibillo amon chés Péruviens ( rien qué ch'nom on s'croérait al ducasse edvant chés tirlibibis) . Hormis qu'la cha n'est mie ein ors in pluche qu'os pourroéte gagner , mais inne plache ed maire .

Au momint dé ch'dépouillache , chés 2 candidats is avoait't el ménme nombe ed voés . Adon , cho'c commission éléctorale al a décidéïe dé z-zés départager à..."pile ou face"

Os avez dmindé chés gindarmes , tchittez poin

Chés gindarmes is n'n intind't-é dés verdes pi des poin meures din ch'téléphon.ne ! Qu'a seuche dés cadoreux français o bien d'eutes poéys ch'est du ménme parél .
Bé , l'eute coeup ch'étoait mon chés ricains din l'détroit d'Puget mie loin d'washigton .

N'y a inne fénme qu'al appélle chés gindarmes , pi vla ch'qu'a leu dminde
A l'ayude *, a l'ayude ; os sonmes su chés mers din ch'détroit d'Puget et pi os avons troés , quates baleines grises qu'a tournicot't alintour ed nou batieu.ye . os avons lés freus qu'ch'est bétails is r'tourn't-é nou batieu.ye conme inne crapette . 

La , ch'est l'passe route !! Feut-i rappler à tout chés gins , eq pour chés baleines cho'm mér ch'est sin miyeu naturel .
Pi n'déturbez poin chés gindarmes aveuc tout vo nunutrie téléphon.nique ; probabe qu'is ont d'eutes cats à fouéter !!

El pizza ch'ti

Ch'est -i inne boéne idéïe , os l'sairons din chés jours qu'is vienne'te . Din chés grands magasins ( qu'is cminch't-é pér LI pi qu'is finit't-é pér DL pou n'poin z'zés nomer) amon chés z'Hollandais is vont vinde dés pizzas à l'fricadelles aveuc un molé(ou gramint) d'mayonnaisse , pi do's seuce cury .

 Mande un peuw ...
Chol chaine dé hard discount , quéstion tchuisine al n'a mie froéd à ses ziux , a va proposer à chés z'Hollandais dés croquettes ed choucroute .!
Mi j'ai l' frousse ed vir à quoé qu'i va r'sanner ch'prochain couscous !!😋

Ein acupuncteur éspécial

Chés moénieuw brindzingues

forche ed maquer dés baies fermeinteïé , chés oésieus du Minnesota in Amerique , is sont seu* , cuit ( cui-cui) si j'peux dire ainsin …

Chés gindarmes is sont su l'affaire , probabe qu'i z-z ont foait "siffler " din ch'ballon ! Est daingereux qu'is dit't chés conducteurs ed voétures , ch'est qu'chés volatiles is s'buqut'-é din no carrieus pi os poroéme chambuquer ch'ti d'in face .
Pour seur , qu'ein moénieuw qu'i n-n a un coup din l'aile , cha n'est poin ordinaire !!

*Seu = Soûl

Coin coin pérle dé ch'l essence

Conme diroait ch'commandant din coin coin lés z'inhumains : Ch'est quoi ch'bordel la , HEIN !!

A pértir dé ch'douze d'octobe , quante os érez dzoin d'fouére el plein d'vo carette , si ch'pompiste i vous déclaque : E5 o bien B7 ? Surtout n'i disez poin "touché , coulé " .
Y'est jusse in train d'vos dminder si qu'os volez du sans plomb 98 o bien du diesel . Déjà por vos r'pérer i feura qu'os faiséche un molé d'djométrie : Ch'l éssence al est r'préseintéïe pér un rond ; ch'diesel li ch'est un carré , pi por chés gazeux ch'est un losanche .

Foait conme dés rots

Chés boétes avoéc du produit vrimeux* d'din por péquer chés rots ; ch'est bien , mais pou qu'chés bétails is s'intiqu't-é pus aisémint din chés boétes , y-a un parisien qu'i l'o yeu l'idéïe ed baler quiques gouttes ed pastis édvant ch'piége .
I sanne à vir eq chés rots is ont quére l'anis .

🐀

*Vrimeux = Vénéneux

Pichons volants

Chés péqueux d'l Utah mon chés américains is sont fin bénaise ( héreux conme ein pichon din l'ieu.ye) . 

M'enfin.ye , la cha sroait putôt dés pichons volants . Pour érpeupler chés lacs ed l'Utah , l'état i l'a prind inne méthode poin ordinaire , chés pichons is sont larguéïe pér aréoplane .
Bié-seur poin à dés heuteurs du diape , sin cha , chés pichons is crévroait't-é tartous écatis .

Pi ch'mic-mac la i n'est possibe qu'aveuc dés tchots pichons ; inter troés pi huit chintimétes .

Os avez ti inne " é-NVIE" ?

Din chés grannes villes on voét d'pus in pus chés piétons rouscailler raport à chés vélos qu'is fruch't-é leu gambes , dés coups à leu fouére casser leu loupes !

Ch'est ténant , mais l'puss pire réste à vnir ; vlo qu'asteure on voét s'abouler à fond d'train ches " NVIE " Soin , chés poin un mot picard qué j'viens d'invintionner , NVIE , cha veut dire : Nouvieux véhitchules individuels électriques ; conme chés planques à reules , chés segways , pi trottinettes .
Chés piétons is ont qu'unne " én-NVIE" si j'peux dire ainsin , ch'est qu'tertous chés gins la , is euch'te unne assurance ed résponsabilité civile .

Rinconte al muche tin pot

Feut fouére el chaine

Chés restaurateurs is n'in sont réyus ed chés pratiques* qu'is n'vienne't-é poin minger , alors' qu'is ont réservéïe inne tabe 

Pi os croéyez ti qu'is appelleroait't por dire qu'is n'varont poin mier !! Du chuque oué !
Du coeup , fini chés réservations , asteure i feut fouére la chaine* déhors , temps non temps , qu'importe ; au moins ch'restaurant i l'est plein à craquaye !
On dit à mesure ch'est aladon qu'cha finira conme in Amerique (conme souvint ) ; la bos on n'reserve mie pus , i feut acater sin billet d'maquerie , sié , os poayez d'avinche un peuw conme si qu'os acatroéte inne plache ed ciléma , obien d'concert ; et pi si qu'os vnez poin os povez dire adé à vo doubes !

*Pratiques = Clients
*La chaine = La queue

D'ou qu'i est ch'pus boin

Pi por vouzote ch'est qué bout ch'pus boin ?! 

Ch'est -i ch'bout avu cho'g glache , o bien ch'bout avu ch'cornet pî ch'chucolat ?
Eun' raveudez poin toute din chés rayons , os n'él trouvarez poin in France ( pou l'momint) . Oué , a coeuse eq tout s'qu'i s'déssaque ed chés américain.ye cha fini tours pér arriver amon nouzote !!
Quoé qu'ch'est qu'is ont coér brasséïe à ch'poéys d'l onc é-sam !! i sanne à vir eq pou chés américain.ye ( inne partie) ; ech pus boin din unne glache , cha sroait ch'bout chucolaté .
Du coeup pour se fouére n'y o inne gin qu'i a invintionnéïe dés tchots cornets qu'os povez congeler !! On voéra d'toute