Héros !

Ah bien seur ech mot la os allez l'intinne tout l'jornée ! J'ai ménme térintè* un molé dvant vous n'in pérler !

Fuche ! j'ai décidé dé l'foaire a coeuse éq din la vie d'tout lés jours os intindons puss ed mau , qué d'boén ! Ch'est bien connu qu'la tristéche , la mort , intéréche chés gins Tandis qu'chés boénes actions ; o n'in pérle à peinne , i suffit d'acouter chés jornals à ch'poste éd télé !

ch'est pour cha qu'in-nhui j'ai inne pinsé pou ch't honme qu'i o laissé s'vie , pour seuver chélle d'eune fénme ! Un brave ! Vlo , j'n in dirai poin d'pluss , cha sert à rien , J'ai étou inne pinsé pour  ses gins a ch't honme lo !  UN BRAVE est pérti din ch'temps* , qu'i r'pose in paix !


*Tèrintè = Hesitè
*Ch'temps = Le ciel

Nounours à l'hosto

Ecmint foaire pour aditer* chés nazus à n'pus tranner les berbettes edvant chés z'hopitals o bien chés blouses blanques* !

Cho'm mairrie d'Agen al o yeu l'idée d'ageincer eune piéche qu'a r'sanne à chés "urgences" avoéc du monne tout partout , un fourdoufe du diape  !
Chés margats is peut't-é y-apporter leu nounours à chés cérusiens  pi d'leu z'ésplitcher qu'i l'est patraque! o bien qu'i o du mau à s'gambe , a sés ziux , à sin tchul , tanq-é pi coèr ...
J'ai idée qu'a plache d'intibiotics ; chés tchots is r'pért'te avuc un pot d'mié *

*Aditer = Habituer
*Blouses blanques = Docteurs , chirurgiens

Arrien l'tabeau !

Pér après chés poupées in plastok eq min camarate ED i dvisoait hier sin blog Umeur et plaisi , pour chétlo qu'is l'éroait't oblié !!

Mi j'vo vous berdler in-nhui d'eune cose poin ordinaire , cha s'passe étou à Péris din ch'seiziéme arrondichmint , à chu musée d'art content pour un* dé ch'palais d'Tokyo .
Fidjurez vous qu'el chonq moai os pourrez visiter chu fameu musée nérnu conme un vér . Pour raviser chés créations ed Neil Boulafa , Kader Attia, J-J Lebel !!  Sié;  in t'nue d'Eve o bein d"Adam .

Ma pinse un peuw , d'ordinaire ch'est chés visiteux qu'is r'béy'té chés tableaux d'gins débillés ; pi lo cha sro tout du contraire .  Ch'l intrée al est libe pour chés 161 parson.nes qu'is ont té coési pérmi chés 26000 qu'is ont dmindé  à vnir  ( j ai idée qu'is dvoait't attinne al tcheue leu-leu) ... Gratoss d'accord mais o nous dit rin su ch'prix d'chu  véstiaire . Ben , feudro bien qu'chés gins is s'débill'te in arrivant . Népoint !!

*Content pour un = Contemporain

Jéjter l'érgent pér chés f'nétes

I croéyaoit arnéquer chés gindarmes , pi ch'est li qu'i s'a foait blouser* !

Un rastaquoère ed 31 ans i l'o r'fusé d's arter* à un contrôle , chés cadoureux is l'l ont poursuit à toute bérzingue din chés rue d'Besançon . Voéyant qu'i n'sarait poin s'mer chés gindarmes , ch't apote la i l'a baché sin carrieu et i l'o garotté eune coupe ed billets d'banque din chés rues .
Pinsez don , tartous chés gins qu'is mérchoait't su ch'trottoèr is leus ont précipité pour raveinne* ech magout , du coup chés cadoreux is ont té ralinti ; qué l'infilure * !

Margré* tout chés gindarmes is ont yeu l'temps d'prévnir leu collègues un molé pus loin ; pi un peu conme amon chéq améritchains , cha s'fini bien , pisque ch't houstaba i s'o foait péquer !!!

*Blouser = Tromper , surprendre
*Arter = Arrêter
*Raveinne = Ramener vers soi
*Infilure = Ruse
*Margré = Malgré

Oui cheffe

Et ouais n'y-o dés fénmes cheffes , mais is sont moin connute eq chés "chefs" ! In tout lés cas ch'est moins aisé dé z' zés démucher !

Pour se foaire Télérama i l'o satché* eune carte ed France dés cheffes din chu guide gastronomique . I n'in n'a pus d'troés chint soéchante dix , pi ch'est poin toute i sanne à lire qu'i viénne'té d'nin rajouter unne coupe , sié , 80 in ramindo* !

*Satché = Tiré (utilisé ici dans le sens de publié)
*Ramindo = En supplément

Un selfésse* ed chu Machu Picchu

Ch'est un Allmand , un Suisse , et un n'Hollandais . Min billet i cminche conme eune cacouille , mais cha n'est mie rigolot por tout l'monne !

Chés troés rastaquoères lo , i leus ont foait éspulser rondébilis  du Machu Picchu cho's célébe forteréche inca pér chés cadoreus dé ch'parc . A coeuse qu'is s'prindoait't leu tchul in "sélfi" probabe qu'a doét s'appeler un sélfésse ? !  M'ouais ...
Mon chés Péruviens os ons mie l'droét dé s'débiller pou s'prinne in photo din cho's citadelle !!

*Selfésse = C'est quand on prend ses fesses en photo

Din ch'cabinet

Ouvrez vo ziux pi vo bouques
Pour vir et pour acouter
Ch'brave honme avoait dés blouques
D'argeint à sés deux sorléts
S'n allant tchier
L'unne à foait flique flouque
S'écapant d'sin sorlet
Queut din l'privé ( les W.C)

*******************

O croéroait inne histoère comique contée pér éch Guss o bien Nénésse . Poin du tout .
Ch'est un poéme in patois ed François de Cottignies dit Brûle-maison (1678-1740) qu'i réstoait à Tourcoing .
I raconte écmint un Tourquénnos i pérd el blouque ed sin sorlet pi qu'al queut din ch'cabinet !

Illeuminé !

Ch'est ti un illeuminé ch't honme lo ??   Ch'est à vous d'vir !!

El maire ed Belgrade , i l'o décidé d'inlver chés décos d'Noé din ch'moés d'Mars . Est d'trop térd dautchun diront . Pi dé z'zés métte in séctémbe ; ch'est d'trop tôt qu'is diront coér sartains !!

Pou s'défeinse , ech maire i l'o déclatché : Os sonme eune capitale Européenne , feut attirer chés gins ! pi chés  gins quante is décid'te ouéche qu'is vont passer leu nouvieu an ; ch'est in join* ; o bien in juyet *; mais seurmint poin ch'vingt- chon déchimbe !! népoin !!*

*Join = Juin
*Juyet = Juillet
*Népoin = N'est ce pas

Bénaise dé t'vir fiu

O  dit souvint qu'os ons tojours dzoin d'un plus tchot qu'li ménme !

Un habitant d'Caroline du sud mon chés Améritchains , i n'n a foait lés frais ! Atandis qu'i rabistoquoait* s'n auto , tout d'un coeup vlo qu'i l'intind un "crak"  !!  Bernique , ech crick i vnoait d'lacher , pi tout l'poéd dé s'carette (unne mustang) al érposoait su sin tchaisson * .

I cminchoait d's étouffer , à s'étotcher , a mi , a mi ; qu'i djeule din un darnier souffe, vnoait à m'n ayude* . Atandis ch'temps la , sin voésin d'neuf ans qu'i s'éjuoait din ch'gardin , i l'intind qu'o crie ; i s'radine et i voét ch't honme avoéc és n auto su s'poétrine . Ahite , ahite ech'tchot qu'i sait s'y prinde pachque sin onc i y-o foait vir écmint qu'o s'sert d'un crick ! I pompe , et pi l'voéture a s'étampie *

Ch'honme i l'est seuvé , grace à sin voésin d'neuf ans ; mi j'dis qu'ch'est bieu !!
Pi cha fini tojours bien mon chés ricains !!!!


*Rabistoquoait = Réparait
*Tchaisson = Ici pour dire la poitrine
*Ayude = Aide
*Etampie = lève

I n'feut poin tchair din l'panneau

Chés voétures garées d'berlons* , o bien su ch'querpion* , in doublé-file , dés blocs ed béton un molé tout pértout ; sié;  os éte à Marseille .

Hormis sés " clichés" eq tout l'monne i connoait , ch'qu'i fou  in rogne in ch'momint chés marseillais ch'est chés panneaux in cintré -ville . I veut miu avoèr fiate* à sin GPS !!
Un panneau qu'i indique un réstau su cho'c corniche qu'i est à l'arbout dé ch'boin séns !

O bien alors un panneau qu'i indique eine queuchie* avoéc 2 boutiques ed luxe ; qu'is sont cinsées éte din cho'r rue ; hormis qu'la chés boutiques is sont éloégnées ed 2kms l'un d'l eute !
Qué courache !!! Ej su fin bénaise su l'côte d'opale !!

*Berlon = DE travers
*Querpion = Trottoir
*Fiate = Confiance
*Queuchie = Route

T'as pô inne tige !

Én seuchez mie surprins si un jour os voéyez un sinche din un zoo aveuc un patch à s'n épeule* !

Din un zoo in Indonésie n'y-o un type qu'i o garotté unne cigarette din l"gayolle* d'un orang- outan . Chu sinche i l'o prins cho'c clop pi l'o saqué d'sus ! Pour seur eq ch'est du rékeuffé o l-l ons djo vu pu d'un coeup un sinche qu'i funque*! mais j'n in sus résté béc -é borne avu chol darainne phrase dé ch'l artic ;qu'al disoait qu'in 2012 din un eute zoo n'y o un sinche qu'étoait dévnu dépindant à ch'toubac ; is ont du l'seuvrer !

Édon , si l'prochain coeup os allez vir éd'z orangs outans,  os pouroéte li jéjter din cho'g gayolle dés mac-mac* al nicotine !!!

Epeule = Epaule
*Gayolle = Cage
*Funque= Fume
*Mac-Mac = Chewing-gum

Sourd d'un eul avule d'eine oréle

Unne tchote cacouille déteupée din ch'darin lanchron .

Éch'l appareil auditif d'éch pére à Lolote i l'est mort . I n'na acaté un neu . " A va gramint miu , qu'i li dit ch'l éspécialiste qu'i li a posé . A douot vos cangeu , vous pi vo famille , surtout ?

- J'én l ai point coér dit à parsonne , qu'i répond grand-père . Ej m'assis et pi j'acoute... J ai déjeu cangé trouos coups min téstamint ."

Tchittez chés bétails trainquille

Au matin j'vouroais don.ner m'n avis ! proufitez n'n in ch'est très rére qu'j él foais .

Din no gazette ed chu littoral , al pointelette is pérloait't d'un honme qu'i s'a foait vérbaliser pour awoèr baillé à mier à chés coulons ! Ch'est sin voésin qu'i o porter plainte , pachqu'i dit qu'cha raméne dés rots* .
Ch't honme qu'i nourrit chés pingeons i rinfique :  J ai toudis don.né à minger à chés coulons , cha n'est mie possibe qu'i n'in resse quiques frouettes * pour chés rots piq'chés coulons is maqu'té toute , dés qu'j el garotte* .  Pi in ramindo* ej sus pour l'écologie , drés qu'i n'y-o un papier à terre j'él ramasse , si j'voés unne plante o bien un abe qu'i aglave ed soé * ; ej l'arouse * ! Pi lo i foait froéd (ch'étoait mi-février) ; chés moénieux is ont du mau d'démucher leu coaille* . Alors j'el foait pour euss !!

Attinne un peu min camarate( Zéf qu'i pérle ) . La ouéche  qu'ej su poin du tout d'accord , ch'est qu'la NATURE qu'a seuche chés bétails o bien chés végétals ; is n'ont mie attindu l'ayude * ed chés gins pour vive pi survive ! Est vrai eq quante i foait - 10° ch'est poin aisié pour chés bétail dé s'nourrir , à ch'momint la d'accord ....mais ch'réstant d'l énnée is s'triboul't*-é fort bien tout seu , is n'ont mie dzoin d'chés gins.

Cha m'foait rapinser éq quante ej vivoais din l'midi; ed mai à séctembe j'avoais quére d'aller nager din la grainde bleue conme is dit't . Bé , un jour quoé qu'ej j'voés , deux , troés pinsion.nés noèrs conme du carbon avoéc ed l'ieu jusqu'à leu jnoux in route à ....bailler du pain à chés pichons !!!

La j'croés qu'oz o attind ech couplet* d'la connerie !!!

*Rots = Rats
*Frouettes= Miettes
 *Garotte = Jette
*Ramindo = En plus
*Soé = Soif
*Arrouse = Arrose
*Coaille = Pitance
*Ayude = Aide
*S'tribouler = Se débrouiller tout seul

*Couplet = Sommet

Dés cadoreux vraimint "mobiles"

Din chés campinnes os avez des mobils-homes qu'is sont immobiles ! Mais lo ; y-o dés gindarmes mobiles qu'is sont vraimint mobiles ; pisqu'is ont disparus , involés !!

Mais d'où qu'is sont ! El commune ed Castillon la bataille in Gironde al cache pér après sés cadoreux d'pis 6 moés !!  Oué mais ch'est unne farce qu'i dit ch'maire din cho'g gazette , ch'est li qu'i-o passé ch' l annonche pour foaire réagir chu gouvernemint !
Ch'est hontabe ed vir cho , vlo ti poin qu'o crée chés PSQ *  . Pi mi o m'inléve chés pécaillons qu'o m'don.noait pour chés ZSP* !!  A torne poin rond mon ch'gouvernemint !

J'ai tout inséyé pour foaire réagir chés politics pour qu'is m'foaich'te révnir més gindarmes ! O n'm acoute poin ; édon asteure j'ésséye l'humour ! O voéro bien !
Pour seur qu'os ons  poin chol délinquance ed Péris ou d'eutes grannes villes ; mais ch'est surtout au vrépe , et pi in fin dé smainne eq chés cadoreux is mainqu'te

*PSQ= Police de sécurité au quotidien
*ZSP = Zone de sécurité prioritaire

El chef i l-l'o poin belle

Ech chef ed tchuisine T. Marx i doét avoèr sés oréles qu'al siffe in ch'momint !
Tout ceux  qu'is défind't-é la tchuisine Niçoise is sont r'montés conme eune pindule avoéc un r'sort in bos !

Quoé qu'is li r'proche ??  Ben d'ervisiter un molé d'trop ech Pan bagnat ! Dins ch'l aréoport ed Nice os povez treuver des "Pans Bagnats"  : Poulet miel ; jambon mozzarella ; unne pissaladiére à l'émulsion d'parmesan !

Os ons ti l'droét d'foaire inne saquoé parél ? D'égzémpe dins l'Nord os avons chol tarte à gros bord , obien tarte papin , voér minme libouli  ;cha dépind d'vou coin !  Prindons un chéf , un chéf d'ein  eute région , et qu'i méttroait d'z abricots a plache ed bouter dés prunieux . Marche , i l'o l'droét qu'os allez m'dire ! Pour seur qu'i l'o l'droét , mais cha m'froét drole ed vir cho't tchote pancarte su cho't tarte avoéc mérqué d'sur  " Tarte à gros bord " Pour mi ch'est pus unne tarte papin ! népoint !!

Mérci ch'boin coin

Grace à sin manicraque* , un honme i l'o pu récouer sin frégidère !

Cha foait un momint qu'i foait batir , li pi sin blanc bonnet * is sont à deux doégts d'inménager ; is améne'te a mzure tout chés agobiles , incriquillaches , outieus , pi tout ch'réstant !
Pér nuit sémdi à diminche n'y o un gazier* qu'i s'o introduit din leu moaison et qu'i o barboter* leu frégidère tout neu coér din l'imballage !!

Mais conme ech proprio i n'mainque poin d'gingin , i l'o yeu l'idée d'aller ziuter su ch'boin coin la d'où qu'o vind inne sécant d'bricoles !
Poin mantché ! Sin frégidère i l'est lo , coér din sin paquet ! Ahite* , ahite ch't honme i téléphon.ne pour dire qu'i est intéréssé et qu'i varro après-none !!

Su les coup d'quatre heure d'érmontée , ch't honme i s'présinte a l'baraque ed chu dégazeux* ...aveuc chés cadoreux qu'is ont arté ch'jone nivlet da peine vingt ans . Os m'avourez qu'i n'mainque poin d'toupet s'goret la ; ch'nom dé ch' proprio  i l'étoait coér su ch'l imballache !

*Manicraque = Ordinateur
*Blanc bonnet = Femme , épouse
*Gaziers = Drôle d'individu
*Ahite = Vite
*Dégazeux = Chapardeur , voleur

dérouffleu ch'est un métier

Is pinsoait't foaire ech casse du siéc !!   Din cho't tchote ville ed Cazeville in Aveyron deux honmes sont intrés pér nuit mon  ch'concéssionaire ed voétures à la marque au losange !

Tout alloait pour lé miux , is r'pért't-é chatchun avoéc un manicraque* pi surtout inne auto .
 Stapindant* , allez sawoèr a coeuse chés 2 hocleux la i s-sont rintrés d'dins , in éstchintant chés pilasses pi inne coupe ed moaison au passage  !
In'n o un qu'i est à ch'poste aveuc chés cadoreux* , pi l'eute à l'hosto !
Drole d'étchipe !

*Manicraque = Ordinateur
*Stapindant = Cependant
*Cadoreux = Gendarmes

Gaston tin téléphone i son.ne

D'z éstations éssences i n'n éro ed moins in mois in France , sié , ménme dins chés grannes villes !
A péris n'y-o un type qu'i n'mainque poin d'gingin ; i l'o yeu l'idée ed vous livrer l'éssence d'où qu'os voulez , a l'heure qu'os voulez .  Qu'a seuche dins un parkinne , vo moaison , obien  ou à ch'burieu .

Qu'a seuche ed l'éssence obien du diésel . Chés méneux d'éssence* is ont té formé à chés transports ed matières daingereuses . Pi ch'est mie toute; pér après avoèr foait ch'plein , is r'luqu't-é vo carette , et si vo tneus* is sont un molé dégonflés is z'ergonf'te , pi is décrap'te* vo cassis *.
Pou l'momint ch'est qu'a Péris , mais cha va biétôt s'abouler dins chés grannes villes Françaises

*Tneus = Pneus
*Décraper = Nettoyer

Malin conme un r'nard

Pour un coeup , eune foés n'est poin " costume" i y-avoait inne saquoé d'racachant a ch'poste ed télé Mardi au soèr ; ch'étoait un érportage su chés bétails ; chés prédateux* .

J'ém raminteuve dé ch'l ors* é-polaire ; pour seur qu'in hiver su cho'b banquise i-o granmint d'phoque à matcher , mais quante s'aboule ech boin temps , chés bieux jours  ;quante cho'b banquise al s'o déssaquer , ch'l ors i l'est sé* conme un sauret ; i l'o pu grand cosse à mier ; i l'est arcran , téné ; i l'aglave !

Conme i li résye un molé d'forche i prins sin courache à quate pattes et i vo s'incrintcher* su chés falises* adou qu'i n'y o inne sorte goélands pour matcher chés oeus .
Pi i l'o vnu à sés fins ...pér après avoèr mié eune vingtaine d'eus ; i s'a rin-aller . Ej warderai toudis din m'cawoéte ch'l image dé ch'l ors à deux doégts d'tchair ed cho'f falise !!
Avoéc chés drones achteure os ons d'bélles imaches !!

*Prédateux = Prédateurs
*Ors = Ours
*Sé = Sec
*S'incrintcher = En hauteur , difficile à atteindre
*Falises = falaise

Un tchutéreux arragé d'l OM

O n'in pérle granmint à chu salon d'chés tchutéreux à Péris . Un cinsier du Doubs (25) matché d'Footéball pi surtout dé ch'clup' ed foot ed l'OM !

Élveur ed toérs* et d'vaques , i l'o don décidé ed bailler à sés vaques dés noms ed grands jueux dé ch'l étchipe ed l'OM . Adon, i n'est poin rére eq din s'n étabe oz intind : Ahu* Nasri . Atcheu*  Cantona .
Obien coér Mandanda .
Ech darin* vieu qu'est né smaingne passé i s'appelle Lucas Ocampos ; forchémint ch'est l'énnée d'chés " O " !!   L'énnée qui vient cha sro chés " P" ! Y éro pététe unne vaque Payet ! Va t'in vir !

*Toèrs = Taureaux
*Ahu , atcheu ou atcha =  Droite , gauche
*Darin = Dernier

Atiffé al mote "saggy"

In Caroline du sud mon chés Améritchains , n'y-o unne loé  qu'est su l'poin d'éte voté !  Ed quoé qu'i n'n in r'torne :

Tartous chés gins qu'is sront hérnéqués al mote "Saggy" , cha vut dire qu'ech patalon i l'arrife in dsous la taille la d'où qu'o voét vo pieu* et pi vo canneçon  . L'ameinde al sro d'vingte chonq dollars !Et ch'l ameinde al rinquériro* a chaque coeup qu'os vous frez r'péquer* .

Quoé qu'a dit vraimint cho'l loé : Ech patalon i n'doét poin éte à plus d'sept chintimétes in dsous d'chés hanques* din un liu d'où qu'i o du monne !
A vir écmint qu'is sont gréyés* ; mi j'éroais putôt dit qu'ch'est l'mote "Baggy"  Ch'est à dire habillé conme un sac !!!! Népoint !?

*Pieu = Peau
*Rinquérir = Augmenter
*R'péquer = Reprendre
*Hanques = Hanches ( Pour ma part je ne l'utilise que très rarement mais dans certains coins on l'entend souvent )
*Gréyés = Drôlement habillés (surtout employé du coté de Boulogne (62) )